[校園][純愛]《身旁的那一個》: 第五十三章

第二日返到去就繼續排練

嗰陣我哋對住個rundown喺度講

Miss:「你估下你哋有冇辦法，

喺佢哋表演之前可以講啲嘢串連到丫嗱」

呢度我講下先





我哋學校嗰陣天才表演個玩法就係咁

基本上都係每個參賽者，

一個接一個咁樣出嚟表演啦

講得詳細啲，

個情況就係咁





首先啦我哋要主持開幕，

講下啲廢話啦，

而嗰啲廢話要兼顧返第一位參賽者表演嗰啲內容

例如佢唱歌，

咁我哋講嗰啲廢話就盡量要關於佢唱嘅嗰首歌咁樣囉





總之要盡量牽涉到表演者嘅主題

如是者啦我哋講完啲廢話，

就到第一位參賽者出嚟表演

當佢完成咗整個表演嘅時候，

咁佢就會離開個台

同時間會閉幕

因為要畀時間下一位參賽者準備，

亦都要等台下面嗰啲仆街老師評分，





跟住我同嵐嵐又要出嚟講廢話

講嗰啲廢話又要同下一位參賽者表演嘅項目有關

我哋有rundown㗎嘛，

所以會知道跟住落嚟到邊個

miss嗰日就係要求我哋，

參賽者表演之前講嘅廢話

要牽涉到接下來嘅表演主題





我:「有啲難喎miss

鳩噏我就冇問題

要有關係就真係難啲喎」

Miss:「唔該你呀巫澤軒，

上到去唔好講粗口呀

一定重罰呀講明先」

我:「係喎係喎唔好意思

亂噏我真係冇問題，





依家有內容我真係驚炒」

嵐嵐:「係囉miss

有時好難樣樣都有關

可以扯到去嗰邊講」

Miss:「我都知，

盡量啦兩位麻煩曬你哋

又唔使真係個個都要有關嘅





盡量就ok㗎喇

好彩今次校長唔喺度，

應該唔使咁嚴格嘅

都係嗰句盡做啦」

我心諗有得唔ok咩

個情況就好似佢係老細我係員工

畀柯打你唔通話做唔到呀

死都要死掂佢啦係咪先

之後miss就走咗

嵐嵐:「東仔你得唔得呀」

我:「嘩真係有啲難喎

我預咗到時攬炒㗎啦」

嵐嵐:「警告你呀唔好炒埋我」

我:「真係諗唔到就鳩噏算數

咁鬼難係咪先」

嵐嵐:「死啦我驚上到去忍唔到笑」

我:「痴線嘅我講嘢咁認真」

嵐嵐:「我知你忍到笑呀，

我諗起個畫面就係你一條友喺度係咁噏

跟住冇人明講乜嘢但係又唔敢叫你收聲

我就覺得好好笑」

我:「好彩有貓紙睇返個rundown

如果唔係都唔知點記」


之後放lunch，

我:「係喎你個friend今日係咪過嚟一齊食飯」

嵐嵐:「唔好我個friend前我個friend後

你都識嘅唔該」

我:「得啦唔使咁快畫清界線」

嵐嵐:「係呀尋晚同佢講咗你ok」

我:「原來你哋進展咁快」

嵐嵐:「有佢msn好耐啦

中三嗰年已經有，

佢話佢有時唔識

又費事返學先問，

咁我咪畀佢囉」

我:「估唔到籃球佬咁樣溝女」

嵐嵐:「你又唔好咁小人之心

佢真係大部分時間都係問讀書野嘅」

我:「我就唔信佢身邊得你一個讀書叻喇」

嵐嵐:「咁佢真係問讀書野唔覆佢咩

So far咁耐都真係喎

不過有時佢話順便想食飯我都冇應約」

我:「一定係順便啦」

嵐嵐:「咁佢咁講就咁聽㗎啦

你知我最憎人無啦啦約我，

我又唔係話真係冇嘢做

撞唔啱時間咪推囉，

我又唔會搵藉口嘅」

我:「我知你不嬲都有嗰句講嗰句

原來佢都食你唔少檸檬」

嵐嵐:「一兩次啫」

我:「警告佢呀陣間過嚟一齊食飯唔好係咁講讀書野

我搭唔到嘴㗎」

嵐嵐:「應該唔會啩

到時先算啦反正都係撞啱一次半次.」

我:「佢知我哋去邊度食㗎嘛

咁我哋去餐廳等佢」

嵐嵐:「佢知道呀我尋晚同佢講咗

佢話冇所謂喎咁咪我哋話事」

我:「叻女有主見識吊高嚟賣」

嵐嵐:「驚你呀大帝唔鍾意呀

到時又話呢樣又話嗰樣」

我:「真係了解我嘅啫」

嵐嵐:「唉行啦.」