[校園][純愛]《身旁的那一個》: 第五十一章

好快就去到6月，

考完呢個學期最後一次試

唔知大家係咪咁啦，

我哋學校考完學期最後一次試之後呢

就有試後活動呢樣嘢





你當可能6月中考完試啦，

之後6月中至到開始放暑假嗰段時間

我哋係需要返去參加啲活動

可能係聽下講座玩下比賽咁囉，

你見我喺呢個故事咁多廢話，





都冇一樣關運動比賽事

就知我呢條友冇玩開運動啦

任何球類活動都唔啱我

除咗羽毛球之外

利申我打羽毛球就唔叻嘅





不過點解會玩

因為打羽毛球一定有嘢睇

唔知你哋知唔知我講咩啦下

總之呢我就係一個好溫柔嘅男仔，

有時上pe堂打羽毛球

通常都男女一齊玩

我通常呢見到男仔打波，

我就唔會去嘅





因為好多男仔都好衝動

下下當自己打奧運咁樣

跳到高一高跟住大大力扣殺

第一我擋唔到

第二個反應夠快我都唔會擋，

因為好撚大力

打到真係有啲痛





都唔係娛樂性質嘅，

你知啦好多雄性動物

見到在場有雌性動物嘅時候，

唔知點解就零舍積極

完全都唔係娛樂性質

當正我係殺父仇人咁撚樣

我為咗唔想做沙包肉餅，

基本上我見到有班玩開羽毛球嘅男仔喺度呢





我就唔會同佢哋打嘅

真係唔夠水平唔好意思啦

之但係我啲層次擺去同女仔玩嗰陣呢，

唔使問就梗係綽綽有餘

咁當然呢啲屬於娛樂性質嘅比賽

仲要對住女仔

我點會好似嗰班癲狗咁樣





下下都全力扣殺丫，

溫柔嘅男仔

首要就係要兼顧在場嘅女性㗎啦係咪先

如果唔係你學咩人講溫柔

就算係打波都要溫柔地打

對住女仔冇理由用力量取勝，

咁樣贏都係勝之不武

所以我多數都係會兼顧住佢哋

一下長一下短，

等佢哋不斷騰嚟騰去

要瞻前又要顧後

佢哋又覺得happy因為有得走下，

你知啦啲女仔好撚鍾意郁下當減肥㗎嘛

同我打羽毛球就啱晒佢哋

講明先我係專心打波嘅，

絕對唔會掛住睇波唔打波

下下扣殺個畫面邊度生動

佢哋唔騰嚟騰去又覺得減唔到肥

我又冇得打波對拉過下癮

更加冇得睇波

大家都唔爽

點解要咁做呢係咪先，

不過咁喎，

有個人一定唔會同我打

唔使問當然又係嵐嵐條友

佢話佢知道我想點喎

所以肯定唔會同我打，

呢條友對我真係太大誤解.


唔好意思講羽毛球講多咗，

返嚟故事入面先

話說今次其中一個試後活動呢，

冇記錯好似係天才表演

我個班主任真係益我，

竟然叫我同嵐嵐做司儀

因為有一日佢放學特登叫我同佢兩個留低

班主任:「知唔知我搵你兩個咩事」

我:「真係唔知道喎」

嵐嵐:「係囉我都唔知」

我心諗你冇講，

我撚知咩

不過算啦喺miss面前唔可以爆粗

如果唔係又罰抄

班主任:「我同其他老師傾好咗喇

嚟緊試後活動我哋咪年年都有天才表演嘅，

今年都唔例外」

我:「下我正垃圾喎

完全唔識表演」

班主任:「唔好咁急住

我唔係叫你表演」

嵐嵐:「咪就係囉，

咁你就唔得啦東仔

等miss講埋先丫嘛」

條仆街又喺度扮乖學生

我:「咁係咩事呢miss」

班主任:「我哋傾好咗想搵一男一女做司儀

盡量想呢兩個人本身friend開夾開，

個效果會好啲」

我:「唔係啩我同佢唔係好熟咋喎

不如搵賓仔」

嵐嵐:「係囉我同呢條友唔係好friend㗎咋」

班主任:「你兩個唔好扮嘢啦

我中一已經教你哋，

今年做埋你哋班主任

點會咁易畀你呃到」

我:「講真丫我真係未做過喎

都唔知要講咩」

班主任:「你放心啦我哋會慢慢再夾

我覺得你哋好合拍好夾

我哋呢級嘅老師都覺得係，

所以一定係你兩個㗎啦」

嵐嵐:「嘩真係受寵若驚

我都冇乜經驗喎」

班主任:「嵐嵐你ok嘅

巫澤軒呢個人好容易亂噏，

一定要搵個熟啲嘅人旁住佢先得」

我:「咁可以唔搵我嘅啫」

班主任:「你又厚面皮唔怕醜多嘢講

搵你上去真係啱去

唔好問㗎喇係你㗎喇，

下個禮拜搵你兩個返嚟練下」

嵐嵐:「知道miss」

我:「收到係嘅」

miss講到咁，

即係冇得走啦

無啦啦玩啲咁嘅嘢

真係服咗呢個miss.