[校園][純愛]《身旁的那一個》: 第四十九章

之後都冇咩特別啦，

都係返學放學咁樣

玩嚟玩去都係嗰班人

不過呢，

最近學校有啲傳聞係關於嵐嵐





講返時間點先，

嗰陣都已經係五六月

差唔多放暑假，

我哋即將上中五

至於個傳聞係關於啲咩呢，





唔使講大家都估到啦

中學生所謂嗰啲傳聞，

嚟嚟去去咪就係關於情情塔塔嗰啲嘢

嵐嵐今次亦都唔例外

個主角當然唔係我啦，





因為我同佢中一已經傳緊

傳咗一排我哋都仲係咁，

你知啦中學雞都係三分鐘熱度

不論成功與否，

呢pair傳一陣之後就換過另一pair

同埋有個不成文規定，

就係呢pair傳完之後就唔會再重覆

所以今次嘅主角呢就唔係我，





當然啦更加冇可能係賓仔

由頭到尾係條撚樣成日幻想自己同嵐嵐係童話故事入面嘅主角咁

命中註定嘅一個，

不過睇緊你哋都知道，

嵐嵐請佢食咗檸檬多過食飯

所以都冇可能係佢，

咁至於個主角係邊個呢





原來係我哋級嘅一個男仔

佢叫做Oliver

佢同我哋一樣都係讀理科，

不過就唔同班

大家知大家係邊個，

因為以前同過佢一班

我同過佢一班，

即係代表嵐嵐都曾經同佢同班





我對呢個男仔印象就唔係好深，

大家玩嘅圈子唔同

我淨係知讀書正常，

唔係好差不過又唔係話好勁

同埋好鍾意打籃球，

打籃球係咪好勁我就唔識睇

不過知佢係籃球校隊，





我又覺得唔算好靚仔但都算係正常樣

你哋當係黑黑地好撚高嗰啲款啦

估唔到原來佢鍾意嵐嵐喎.

至於點解無啦啦會傳出嚟呢，

話說就係有一日

我哋想最尾嗰堂嗰陣，

個仆街老師竟然overrun

咁就搞到遲走啦

之後老師終於話上完堂啦可以走，

咁成班同學梗係好似投胎咁

執書包拿拿臨走人啦

跟住呢無啦啦見到Oliver同埋佢個friend喺出面鬼鬼祟祟咁樣

見到我哋嗰班開始少人，

佢卒之行入嚟講嘢

嗰陣大家都唔知佢搵邊個，

直至佢問嵐嵐放學有冇嘢做

大家第一個反應係愕然

之後就喺度wow

嵐嵐:「做咩」

Oliver:「冇呀

諗住去附近食下嘢好唔好呀」

我心諗唔係呀嘛

一約女仔就約食飯

邊有人咁叻仔用啲咁嘅方法㗎

我係女我都唔去啦，

又唔知你啱唔啱傾

無啦啦畀你捉去食飯咪盞自己辛苦

到時坐喺度你眼望我眼都唔知做乜

嵐嵐:「唔食

好飽」

Oliver:「咁算啦下次先」

之後佢就頭耷耷咁樣走咗

嵐嵐條友西起上嚟真係好勁

話唔去就唔去，

使乜俾面你嗰啲人

我心諗賓仔就話條件唔好啫

Oliver個package好好多喎

高大學校校隊成績唔差已經屈咗一半機

不過係約女仔差啲啫

咁急進一嚟就食飯

有機會再問下嵐嵐先，

後尾我知道發生咩事

你知啦讀書嗰陣所謂風聲，

都係傳嚟傳去

你見到有兩條友靜靜雞揞住個嘴，

跟住喺度眉來眼去

就知道肯定係講緊是非

呢個動作我喺中學成日都做

所以我好肯定，

今次Oliver開口約嵐嵐，

原來係因為Oliver條友同人打賭輸咗

打賭啲乜嘢我就八唔到，

總之願賭服輸之下就要溝自己鍾意嘅女仔

首先我唔明點解有呢啲打賭啦

不過中學嗰陣就係咁戇鳩

乜撚都打賭一餐

咁我之後就問，

唔通對方知道Oliver鍾意嵐嵐

如果唔係嘅話佢使鬼約嵐嵐

求其一個女仔都得啦

邊有可能向難度挑戰

之後我個來源就話係，

對方就係知道Oliver原來鍾意嵐嵐

所以Oliver冇得偷雞

呢個所謂嘅對方原來就Oliver個老友，

即係頭先我講喺佢隔離嗰個人

結果呢單嘢就係咁，

當Oliver頭耷耷食完檸檬之後，

在場最激動嘅只有一個

嗰個就係賓仔

條友好似癲撚咗

揸實拳頭跟住喺度望住門口個方向，

一路口噏噏我唔會畀你得逞

嵐嵐係我嘅之類

Teresa:「聽唔聽到賓仔對你嘅愛的呼喚」

嵐嵐:「聽到

夠鐘食藥喇」

呢句笑撚到我仆街

Teresa:「你就好啦咁多狂蜂浪蝶」

嵐嵐:「不如同你交換丫」

Teresa:「唔使啦我有個好鍾意嘅男朋友

佢喺出面等緊我拜拜」

賓仔:「東哥」

我:「你條友做乜無啦啦彈出」

賓仔:「幫我約Oliver出嚟」

我:「痴撚線關我鳩事

你約佢啦快啲同佢死過」

賓仔:「好」

真係傻㗎.