[校園][純愛]《身旁的那一個》: 第三十七章
其實我相信每個人觀察力都好好
特別係同人相處又或者關係轉換嘅時候，
可能只係唔識形容或者表達出嚟
但係自己會察覺到對比之前有咩變化
我講得呢樣嘢梗係又有嘢發生喇
其實都唔係好特別嘅戴定頭盔先
話說自從上次我同愷晴一齊搭車之後，
我feel到我同佢關係出現咗微妙嘅變化
第一喺msn傾計會多咗
現實亦都係不過個幅度就冇msn咁頻密，
你哋知㗎啦讀書嗰陣係咁
過咗咁多年我諗返起，
其實都唔知有咩要咁秘密
傾計咪傾計囉係咪先，
同性好異性都好
有咩咁唔見得光呢
不過以前就係會咁做，
大把人表面睇落去好似冇乜交流
我頂原來返到屋企會係咁同人chat
估唔到當時嘅我，
有口話人冇口話自己
講啲咩我就真係唔記得喇
嚟嚟去去都係學校啲嘢，
又或者係愷晴佢會分享佢嘅嘢
例如佢鍾意食乜，
得閒嗰陣會做乜嘢諸如此類，
有時佢問返我咁我都會照直講嘅
就係咁啦
返到學校唔知點解我對住佢會迴避眼神，
我feel到佢冇望過嚟呢我又會睇下佢咁
同我讀小學嗰陣鍾意女仔一樣
依家諗返起都唔可以叫鍾意嘅，
有好感啦下
我就係會做啲咁嘅嘢，
例如上堂嗰陣我就望住個女仔
原來佢用左手寫字㗎喎
原來佢隻錶帶右手，
等等等等
會懶係好醒咁樣柯南上身
將有好感嗰個女仔嘅所謂特徵，
一一收埋喺腦海入面
我嗰陣就係咁嘅心態對住愷晴
你問我係咪鍾意佢，
我唔敢講
因為我連我鍾意佢嘅原因都搵唔到
不過上堂又或者平時食飯會扮不經意咁望佢，
我亦都知道佢亦間唔中會望住我
之前冇咁頻密嘅，
而我同佢就好少單獨相處，
有時走廊撞到
我會見到佢似笑非笑咁樣囉
有次海狗都見到，
我都係求其hea咗佢就算
佢對住個個都係咁㗎
海狗就會即刻屌我
「又唔見佢對住我陰陰嘴笑
」，其實佢冇講錯嘅
佢呢個表情我睇得最多往往就係對住我做，
真係唔係我ff
始終呢啲表情代表咩啫，
唔會因為呢樣就覺得係鍾意架嘛
呢方面就係最大嘅唔同.
呢個行為一路都維持咗個幾月，
話說嗰陣我哋學校呢一年考四次試
上下學期各兩次，
三月尾四月頭呢
就係下學期嘅第一次
可能你哋都會問，
有冇利用溫書溝女
我依家就可以答你係冇嘅
依家諗返真係好笨柒
鬼叫嗰陣緊張成績咩，
事關我真係一個人溫書好啲
有其他人喺現場會令我分心，
就算係海狗都好，
我同佢都未試過兩個出嚟溫書
海狗呢啲係配角，
主角係班女丫嘛
細個真係死蠢
咁嘅機會都唔識把握，
抵畀你哋屌
所以呢個故事冇乜溫書情節只可以講
唔好再講傷心嘢啦
講返正題先
話說考完最後一科之後，
當晚我即刻收到電話
一睇，
屌又係嵐嵐
我:「鍾小姐做咩事
」嵐嵐:「講一單堅嘢畀你聽
」我:「做咩事呀
」嵐嵐:「頭先我同愷晴傾計，
佢話想約你約我去海洋公園或者迪士尼
」我:「三個人玩呀
」嵐嵐:「你放心我知你驚乜嘢
我唔會阻住你哋嘅
」我:「又唔好咁講
我冇所謂呀
約一班人都得
」嵐嵐:「講到懵人你都算係第一個
佢私底下講得就即係唔想一班人啦，
單獨呀死蠢
」我:「咁佢又叫埋你
」嵐嵐:「佢話唔知點開口丫嘛
咪諗住借我把口約
同埋佢話佢都真心想我嚟嘅
我哋三個有傾有講，
呢度講呢度散呀
」我:「唔係掛有幾難開口呀
我又唔係大牌
」嵐嵐:「人哋女仔怕醜丫嘛你識乜鬼
我知佢想點啦
所以頭先我即刻同佢講
『唔會阻住你二人世界』咁樣.」
我:「咁佢有咩反應
」嵐嵐:「冇呀咪就係笑囉
」我:「佢想兩個去晒呀
」嵐嵐:「唔係呀佢話二揀一
佢話想去迪士尼多啲因為有卡通人物
佢好鍾意跳跳虎喎
」我:「呢度講呢度散
」嵐嵐:「使唔使呢句都抄
」我:「屌唔係唔係
講真其實我想去海洋公園多啲
卡通人物我都冇興趣，
雖然兩個都唔鍾意㗎啦
咁但係二揀一我寧願玩刺激嘅機動遊戲囉
」嗰陣嘅海洋公園唔係今日咁潦倒
人影都冇隻咁
我唔肯定啦始終冇查數據，
咁但係我記憶上當時仲有唔少人
放假冇嘢做嗰陣都仲會諗起海洋公園
學生好情侶又好，
師奶湊住個小朋友都好，
總之都起碼會提下海洋公園個名
依家真係提都費事
嵐嵐:「我幫你問下佢囉
佢都有問我知唔知你對呢啲有冇意見
所以一路唔敢開口
」我:「老老實實迪士尼真係麻麻
咁講真佢約嘅話我都唔會有咩問題嘅
純粹自己二揀一鍾意海洋公園多啲啫
」嵐嵐:「一早知你啦死人頭
不過老老實實二揀一我都係揀海洋公園多啲
你知我冇邊隻卡通人物係好鍾意
不過你可以放心，
我唔會阻住你哋嘅好事
」我:「咁你幫我問下可唔可以唔去迪士尼去海洋公園
警告你呀唔好同佢講係我嘅意思
」嵐嵐:「得啦
借我過橋你就叻
」我:「我對你嘅辦事能力好放心
」嵐嵐:「愷晴鍾意跳跳虎呀，
我睇佢唔會變㗎喇你死咗條心佢
」我:「問咗先啦.」