[校園][純愛]《身旁的那一個》: 第三十三章

香港唱k有咩地方可以揀

依家呢個時勢我真係唔知，

我哋嗰個年代嚟嚟去去咪又係得兩三間

最後我哋去咗尖沙咀安達Neway嗰度唱

我都係依家打文嗰陣順便google，





原來已經執咗笠

可能有啲讀者唔知我講邊個位

你當係尖東噴水池嗰個位啦

話說我哋卜咗禮拜六

一共十條友，





係咁咦都要講下十個嘅

我， 嵐嵐， 愷晴， ， Teresa， Teresa男朋友， Betty，

Davis， Manus， 主席， 賓仔，

就係呢十個

佢哋有叫我問埋海狗





不過海狗話同佢哋唔係好熟

又唔係我嗰班嘅，

咁就費事啦

所以最後佢就冇嚟

記得禮拜五嗰日，

我哋呢班一齊食lunch

順便講下聽日有咩安排喎

Teresa:「我哋一個人百零蚊一點唱到八點，





好似話到時可以再加鐘」

嵐嵐:「啱晒東哥啦可以唱咁耐」

我:「包幾多杯嘢飲

冇嘢飲頂唔到咁耐」

Teresa:「好似係兩杯無酒精囉

唔夠就再買」

我:「咁就實唔夠」





主席:「你係咁飲因住去廁所去死你」

我:「戇鳩嘅

人有得揸水好過冇得揸」

Betty:「東仔你真係呢

揸水」

嵐嵐:「佢係咁㗎喇算啦」

我:「不過啲嘢真係唔撚好食」

愷晴:「東仔你有去開」





我:「同海狗夾唔中去下

有時得閒咪打電話去問，

兩個人可以唱幾耐

逐間分店打

得兩個鐘就唔去喇

有時好似今次咁可以唱七八個鐘咪去玩下」

愷晴:「喉嚨唔痛㗎咩」





嵐嵐:「呢條友都唔知咩人

平時講嘢咁大聲喉嚨都冇事

唱k又係咁」

愷晴:「嵐嵐你有一齊」

嵐嵐:「冇喎

東哥話唔歡迎其他人喎」

我:「收皮啦你

明明去溝仔唔得閒」

賓仔:「邊個呀

我要睇下我嘅敵人

東哥幫幫手開名」

嵐嵐:「你唔好信佢啦

巫澤軒你再亂講嘢聽日就cut你歌」

我:「對唔住我錯」

賓仔:「我都知㗎喇

明明嵐嵐你嘅芳心就係屬於我」

嵐嵐:「你真係飲大咗啦」

Teresa:「講返正題先

佢話包咗每人一個小食同埋一個晚餐」

Teresa男朋友:「係囉唔夠嘅話咪出去再買」

暫時傾得好順利.

最後佢哋講好咗，

十二點九喺安達門口等

遲到就直入k房

老老實實我自己知自己事

唱歌真係唔好聽嘅

不過又真係好鍾意唱喎

同埋大家唔知會唔會有呢個同感

就係對於開聲會好執著

特別晏晝呢個時間，

就算八九點起身都好，

唔知點解去到晏晝都未開到聲

我頭先咪講過我間唔中會同海狗兩個人去唱嘅

後尾我研究到，

原來朝早做運動會有助開聲

講明先對我嚟講咋

我嗰次朝早去跑步

返嚟沖下涼上下網再出去唱

狀態相當好

高音位好多都去到又唔會話好吃力

理論係咩就真係唔知

我淨係知呢個方法會幫到我

同埋我唱k咁認真，

唔關要喺班女仔面前表演事

我真係冇呢個諗法嘅

純粹係好鍾意唱k

冇獎金冇獎品都好

都想認真去看待，

有時男人就係咁無聊

明明就冇人會留意，

更加唔會有任何獎勵

不過就係會好認真去準備，

純粹為自己去負責咁解，

甚至負責啲乜嘢都講唔出

就係會咁認真係準備某啲嘢，

講得好聽啲咪自娛

而我正正係呢啲人，

再加上平時放假我都唔會瞓到好晏

朝早起身食完早餐，

休息一陣就去跑步

返屋企沖完涼之後休息一陣再出發

嵐嵐問我一唔一齊去

佢話佢同愷晴Betty會早啲出去睇下嘢

今次冇呃佢，

我同佢講話我跑步唔去啦

咁佢都冇咩就話到時見啦咁

佢條友仔呢度好

永遠都唔會逼人

唔會恃住同你關係好就逼你做呢樣做嗰樣，

我估你哋現實世界都總有呢種朋友㗎喇

真係好乞人憎，

好彩我識嗰啲都唔係啫.