《我同幾條女嘅瘋狂往事》: 4.1
「凡一代有一代之文學……」
「……」
「……」
「……」
「元曲有冇同學舉到例子？」
「……牡丹花下死，做鬼也風流！」
身旁某君聲線激昂，我迷糊睜眼，意識朦朧。
眼前站著的好像…好像…好像是老夫子裡面的大蕃薯？
「呀哈哈哈……男同學專記埋呢啲…呀哈哈…連隔離個同學仔都即刻扎醒，哈哈哈……」
那大蕃薯不知怎地笑得開懷……
惺忪睡眼中驟見數十張面孔轉頭迎來，能想像到人類的發笑形式，無一不在其中。
我有如被冰水淋頭，瞬間清醒萬分。
聚光燈般的視線又馬上燒得我耳根發熱。
「哈哈哈…好啦好啦…就夠鐘喇，望返過黎先。」
同學大多應聲斂笑回頭，零星幾雙眼睛仍然留戀。
「今日就大致講咗楚辭、漢賦、唐詩、宋詞、元曲，咁大家都要開始諗下個present題目喇。做明清小說果組落堂之後可以再約我consult，今日就唔夠時間講啦好嘛。係嘞仲有，未有組嘅同學陣間可以留一留低，睇下再點安排。冇咩特別問題嘅話，今日就係咁多，落堂。」
話畢周遭同學收拾的收拾，走的走。
面對路過男同學的注視和女同學的側目，我連忙逃離現場，趕赴緊接的大課。
「喂頂，唔叫醒我。」我惱羞。
「你訓到死咗咁，想我點叫。」
「頂，好柒。」我拍頭：「無啦啦係度噏乜做鬼也風流啊你。」
「人地做鬼也風流，你就做夢也風流，啱先訓到流曬口水，發綺夢呀？」
「你估我係你咩。」
「對咗兩日啲o camp囡囡，都難怪你。」他一臉訕笑：「呢兩日冇出到火咩？」
「出鬼出馬咩，攰都攰死啦，今日仲要九點堂，七點就要起身喇我。」
「咁遠返九點又冇得住hall，比我就走堂。」接著，他忽然變臉奸笑：「同埋真係奉勸聲，後生仔谷住冇益。」
他好心規勸，殊不知我已丁爆他女神。
「講經咩，世傑兄。同埋，又唔係計你缺席，你點講都得啦。」
「噫，但你啱先都冇簽到attendance。」
「唔係呀嘛，你冇幫手簽埋㗎？」
「諗住你落堂都簽得，點知唔記得咗提你。」
「屌。」
今天運氣爛透了。
走在與真正大學生共用的校園內，擦身而過的男男女女全都精神抖擻，行路帶風。我不期然地也挺起胸膛。
「唉，以後冇得同Crystal一齊上堂了。」謝世傑好像真「謝」了似的，死氣沉沉地說。
「係喎，頭先好似真係唔見佢。」
「o camp都完咗仲黎sit堂扮新生咩。」