【校園】【愛情】A0毒男的愛情史: 【威脅信】
(簡略談近況，搞乜鬼咁耐都唔出文，第一，創作低潮期。第二，屋企人發生咗啲事，搞到要成日來回醫院。第三，就嚟考試，仲有其他大大小小事情，我知大部分都係藉口，在此講聲【對唔住】，亦都好多謝有人喺IG提醒我要出文，呢篇文就係今日打嘅，當當少少謝罪，1月1號，新年快樂，新嘅開始，盡我所能打多啲文，唔阻你哋睇文。)
一如既往的上學日，同樣的道路，同樣的風景，只不過我身邊有位女生跟我一起上學。
冇錯，我又晨咁早起身撞啊晴一齊返學，經歷過多次「假」偶遇失敗後，我終於發現一件事，就係啊晴佢每次都會喺7:30分出，就如同邪教般，堅守自己的原則。
喺同啊晴返學校嘅途中，我莫名其妙察覺到一種視線，還帶有點惡意，而且我原本對視線非常敏感，就好像有落葉觸碰到你的手臂上，你的皮膚會透過神經系統轉達到你的大腦，告訴你有東西碰到你的手了，對我而言視線也是這回事，只要有人盯著我三秒以上，我身體便會打冷震告訴我大腦，令我有所察覺。
我立即轉身看向後方，尋找視線來源，啊晴對於我這舉動也是很愕然，我只看見有一個身影消失在小巷裡。
「邊個嚟。」我眉頭一皺。
「咩邊個嚟。」啊晴問道。
「哦，冇事，應該係眼花。」肯定唔係眼花，我背部感到前所未有的震抖。
.........
學校，小息時刻。
朝早冇食早餐嘅我，去咗小食部呢個呃學生錢嘅地方維持人體所需嘅營養，頂，咁多廢話，咪即係食早餐囉，食早餐就食早餐啦，繼續。
買咗燒賣同魚蛋嘅我，揾咗張角落嘅檯坐低，慢慢咁享用浪費金錢嘅味道。
食到一半個陣，朝早那令人作嘔嘅顫抖感再度襲來，隻手不由自主地抽搐，我抬頭四處張望，面前係人山人海，有啲就係度傾計，有啲係度排隊，仲有一堆坐低喺度食嘢，我完全分辨不了到底係邊個，但我一抬頭呢個舉動，令我嘅顫抖有所緩減，睇嚟條友都驚畀我發現。
我快手快腳食完，掉埋啲裝熟食嘅膠袋，就翻咗班房。
我預先準備下堂家政堂嘅file同書放曬喺櫃筒，諗住提早落去家政室，扮下乖學生，摷摷下櫃桶，摸到張紙嘅觸感，下意識拎咗出嚟。
封信上面寫住係我個名【林梓圓收】，但係冇著名係邊個寫，基於好奇心害死貓嘅邏輯之下，我乜都冇諗就打開咗。
內容如下:「我知你哋係扮緊拍拖，我亦都知道好多嘢，如果你唔想某日全級都知情，就喺一個星期內同汪芷晴結束呢段假關係。」
喺我睇完封威脅信最後一粒字個陣，原先仲算係良好嘅心情瞬間跌落谷底。
到底係邊個？佢仲知啲咩？唔通今朝嘅視線就係呢條友？
我有無數個問題，但係冇人可以解答我，但我呢刻清楚知道，我絕對要揾到呢條友出嚟，唔理用咩方法，都唔可以畀佢傷害到啊晴。
......
午膳，課室。
家政兩堂之後上埋數學堂。
「你今日粒聲唔出嘅，唔似你喎，係咪有啲咩事呀。」坐喺我隔離嘅阿晴問道。
「冇事。」此刻我仍在煩惱那封信的來源，不過為咗唔好令啊晴擔心，善意的謊言是必要。
「真係冇事？」
「真真真係冇事，琴日唔夠瞓咋。」我仲特意假裝打了個哈欠。
「冇事就好。」啊晴說。
「佢哋係咪等緊你？」我指著門口那二人，分別係我哋偉大校園愛情故事嘅支線任務Amy(張靖欣)，以及有大家姐風範嘅kristy(陳曉彤)
啊晴向門口一撇，再把目光放在我身上「咁我走先，Bye~」說罷便離開了班房
.........
依家那封信的問題仍在不斷糾結著我，我想破腦袋也猜不到寄信人是誰，也罷，民以食為天，先去享用午餐吧，填飽肚子也是今天重要的一環。
在這區附近有兩所學校，外加上午餐的人潮，理所當然我找不到正常餐廳，大部分都是橙色熒光背心的地盤工人們滿席，另外就是我們與鄰近學校的棕色校服。
喺萬念俱灰嘅時候，我打算去附近劣食餐廳隨便填飽肚子，我聽到一把熟悉的女生聲音。
「我都冇從呢度離開過，邊有可能喺佢哋先。」一位女聲說道。
「唔好意吖小姐，佢哋兩位啱啱好可以坐滿 嗰枱，依家繁忙時間，你一個人霸住兩個位都唔好啦。」那位譚仔員工說道。
我沿著爭吵聲源頭靠近，途中不斷重複「唔好意思」「唔該」「麻煩借過」終於到達戰場，因為真係好！好！好鬼死多人排隊，如果真係跳過飛要重新排過隊，放飯時間完咗都未食得嘢落肚。
如我所料，呢把聲音果然係冰女王，至於點解咁啱得咁橋撞到，我估計應該係個天憐憫我，唔想我食埋啲咁差嘅劣食。
「啊姐，呢度夾埋兩位，張飛number都係我哋先，應該冇理由唔係我哋入去先啦。」我跳出來說。
冰女王先係以錯愕嘅眼神看著我，但腦袋瞬間
轉換過來便說「冇錯，我哋都係兩位。」
「妖，仲要等幾耐吖。」剛才跟我們爭位的港女說道。
「好快喇BB，仲有兩個number咋。」港女男友說道。
「一日最衰都係你啦，食咩譚仔啫，我不嬲都唔識譚仔㗎呢啲cheap嘢㗎喇，一早叫你book好餐廳又唔做，依家嘥曬啲時間。」那港女繼續發佢小姐脾氣。
「對唔住吖，唔好嬲啦BB。」其實都真係幾嘔心，大庭廣眾BB前BB後。
我理所當然冇作任何理會，純粹當花生咁聽， 同時亦都當故仔咁寫，所以呢個故事咪誕生囉，呵呵。
我同冰女王一前一後坐低，兩邊互相望住對方，都幾尷尬下，佢嗰樣仲要欲言又止，我頂唔順做咗話題開啟者。
「唔使多謝我喎冰女王，如果真係想多謝我，不妨呢餐就交畀你埋單。」我開著玩笑說。
「邊個要多謝你，冇你我都拗得贏。」冰女王死都要同我唱反調，接著又說:「同埋我都話我叫周婉兒，唔係叫乜嘢冰女王好唔好，唔好用埋曬呢啲奇怪名叫我。」
場面一度冷落下來。
「上次....你冇事？」冰女王戰戰兢兢地說。
「乜嘢上次。」我當時真係諗唔到。
「咪...我Daddy佢...無端端兜巴星你嗰次。」
「哦，你唔講我都記唔起，咁我係咪應該呃你Daddy一筆醫藥費，最好就要埋精神損失費，哇，都幾大筆錢下。」黑色幽默。
「仲識得講笑即係冇事喇，但我點都要同你講聲對唔住，畢竟係因為我先搞到你畀人兜巴星。」
「可唔可以唔接受道歉。」
「咁你想點。」
「今餐交畀你。」我原本諗住話講下笑，其實我已經接受道歉，點知.......
「冇問題，叫嘢食。」唔通呢啲就叫豪氣！？
「吓.....」有點錯愕。
「吓乜嘢，唔係你叫我請你咩。」
「冇，原本我諗住講下笑，點知你咁認真。」
「點都好，你就當係我嘅請罪啦。」
......
舉手，落order
譚仔阿姐行埋嚟「要啲咩。」
「炸醬，墨魚丸。」我同冰女王異口同聲地說，雙方視線對上後都不禁莞爾一笑。
「咩湯底。」阿姐追問。
「清湯！」「我要清湯！」雙方都唔認為對方會選擇呢個寥寥無幾嘅選擇，可惜現實卻打了雙方的面。
「飲咩。」阿姐再追問。
兩人的眼神似有靜電流出傳遞般，絲毫沒有退讓，莫非要拎出最後嘅殺著了嗎。
「凍檸茶走甜！」我說。
「凍阿力！」冰女王說。
Yes！贏咗，我嗰杯凍飲健康啲。
「估唔到，你都會揀呢幾樣。」冰女王說。
「我都估唔到你會揀清湯，我識嘅朋友每個都揀食辣，佢哋根本就唔明清湯嘅美妙。」
「講得一啲都冇錯，清湯先係譚仔之最。」
我微笑點頭，忽然有種英雄惜英雄嘅感覺。
傾計都會消耗體力，等候餸菜期間自然係拎出手機嚟玩我沉迷嘅皇室戰爭，同場加映打機識女仔。
「登冷登冷登，登登冷登冷登」開啟遊戲聲。
呢隻依家2022變成冷門嘅遊戲，當時可以話風靡全球。
「你都有玩？」冰女王先看了看我手機，再向我發問。
「唔係吖，你唔好話我知.......」
「登登，喺度。」冰女王握著手機在我面前晃來晃去。
「你叫咩名吖。」冰女王問道。
「吓....我咪叫林梓圓。」名吖嘛，呢個都係名吖，下次唔該你講清楚係遊戲名定係真名，不過應該唔會有下次。
「...」冰女王反了反白眼，無奈地說道:「邊個問你真名，問你遊戲名。」
「...」尷尬程度120%
「咁唔該你睇一睇你Whatsapp，我畀咗個好友鏈接你。」
「哦，係係係。」
封存，封存，第一個就係著名(麻煩友冰女王)，畀佢見到個聯絡人名稱仲得了。
「有喇。」你願意接受【小魔女doremi】的好友申請嗎？確認。
「哈，你改埋曬啲咩名。」我不禁一笑。
「你好好咩，乜嘢【位於星球以上的人】仲奇怪啦，好意思講我。」
「彼此彼此。」
「反正都有排等，玩翻鋪？」
「冇問題。」
......
勢均力敵，我未遇過啲咁難纏嘅對手，唔通捉象棋嘅人思想更加細密更加快？唔清楚。
最後打和作為結局，不過如果放喺依家呢個版本，點都會分出勝負，純粹講下，唔使理我。
「清湯，炸醬，墨魚丸。」終於嚟到。
「唔該。」「唔該。」
「估唔到你都玩得幾好喎。」我說。
「使咪講，我文武雙全。」冰女王回道。
「乜打機都可以算係武㗎咩。」
「唔好在意呢啲細節啦，你知我想講咩咪得。」
「係嘅係嘅，食麵食麵。」依舊標準雙手合十，感謝接下來嘅民間美食。
......
「點解得你自己一個嚟食嘅。」我食到一半嘅時候問。
「我冇朋友。」冰女王目無表情回道。
「邊有可能，你咁健談，我打死都唔信。」講真，一個正正常常嘅女仔，又唔係樣衰，性格又唔係差，邊可能冇朋友。
「多謝，不過我係講真，係唔知點解對住你先特別多口水，可能係因為我哋有共同嘅嗜好(係象棋！象棋啊！唔係其他)。」冰女王面上多了幾份憂鬱。
「...」我又唔係幾識答佢嘴，又唔好意思講埋曬啲人生大道理安慰佢，安安靜靜食米線算。
......
完食，埋單，聽完一輪咁沉重嘅話題，我都唔好意思要佢請客，所以都係自己埋單，不過過程都幾搞笑，請細閱下述搞笑無厘頭內容。
「喂，你做咩。」冰女王見我自己拎咗單。
「埋單囉，咩做咩。」
「咪話咗我請囉。」
「唔要。」我拎實自己張單。
「咩唔要，冇得你唔要。」冰女王伸手要搶翻張單。
我以迅雷不及掩耳嘅速度跑到去收銀處，冰女王跟隨其後。
我哋兩個喺收銀處爭嚟爭去，目的就係一張40幾蚊嘅單。
「拎嚟。」
「唔要。」我搖頭
搞咗一輪，五分鐘過後，仲未埋到單，差唔多全部人都喺度望我哋嘅弱智行為。
「你話你冇朋友呀嘛，咁呢餐飯就留住先，等你如果下次再孤零零一個人，我再陪你食，到時你再請我，點睇。」我提議。
「咁.....」冰女王猶豫中。
「就咁話，下次等你請客，我返學校先，再見。」我畀完錢就走咗，因為就嚟遲到。
未完待續.............