【校園】【愛情】A0毒男的愛情史: 【溜冰場】

走去櫃檯畀錢買飛個陣，啊晴拉一拉我衫袖。

「嗯?」我察覺有東西在觸碰我。

「不如我畀翻錢喇，好似唔係太好，你今日都請咗我食飯喇。」啊晴已經將銀包拎出嚟。

「唔緊要喇，今日洗費有家姐嘅贊助，唔使擔心我破費喎。」

「不過......」





「真係唔使，你多謝我家姐算啦，佢先係今日最大金主。」

「咁好啦，你翻去幫我多謝Chloe姐姐喇。」

之後過程就係買飛，換溜冰鞋。

「啊晴，你等我一陣。」說罷我便走向了櫃檯問少少嘢。

「唔該，想問下呢度仲有冇得租護具。」我對住員工說道。





因為以前經常性溜冰跌倒(仆街)，個感覺又痛又凍，我唔多想啊晴第一次溜冰就有呢種壞體驗，保護措施有就最好啦。

「有，依家唔使錢，為咗避免客人受傷，我哋免費提供使用，你拎住張飛去嗰度揾人幫你就得。」工作人員指向遠處說道。

「唔該曬。」咁好死嘅，唔通佢哋良心發現過唔去，點都好，我嘅目的依舊達成咗，我拎咗護膝手套同頭盔翻去。

正式的踏入冰場，啊晴雙手緊緊捉住場邊的扶手顫抖地站在冰上。

「啊晴，其實溜冰好簡單㗎咋，你唔好咁緊張，保持好個重心先。」我說道。





「好驚吖我。」啊晴說道。

「你企穩個人先，慢慢呼吸。」

「...」幾分鐘後，啊晴終於停止了顫抖，呼吸也比起剛才好多了。

「你去玩先喇，我自己慢慢嚟。」啊晴說道。

「唔得，我唔放心，我慢慢教你喇。」要我掉低啊晴走去自己玩，我仲係人嚟嘅。

「首先我要教你點樣跌倒同企番起身先喇。」

「乜跌同企都要學㗎咩。」

「要，你留心聽，膝頭向前著地，跟住隻手掂住冰面支撐，你有帶裝備唔使咁驚。」





「...」啊晴聽足指示做。

「好，依家到起身，隻手放喺膝頭外側支撐住冰面， 唔使用到手掌，十指手指就夠。」

「咁樣?」啊晴問道。

「冇錯，之後試下一隻腳用冰刀企穩冰面，大髀再用力少少向上支撐一下，另一隻腳再用冰刀企穩冰面，隻手記得暫時唔好離開冰面住，然後再慢慢起身，隻手就可以放到膝頭再用少少力撐起你上半身。」

「我得咗喇。」啊晴興奮地說道。

「哇，你學得咁快嘅，我細個都唔知跌幾多次先做到，唔通你係天才??」我半開玩笑地說道。

「你教得好啫，之後呢之後呢。」





「之後就到行路，隻腳向外踩八字企穩，記住膝頭同埋腳尖要同面向一個位，不過好彩依家冇咩人，如果唔係實撞死你，之後....」

「吖！好痛啊。」啊晴心急地踏出第二步就摔倒在地上，這情況再也正常不過。

「我都仲未講完吖。」我滑到啊晴旁邊說道。

「Sorry囉，我太過心急。」

「用頭先個方法記返起身先，嗱我講多一次，兩隻手向左右斜前方平舉，望實前面條路，唔好淨係掛住望自己對腳，將膝頭向上抬，刀面同冰面平行向下踩，記得要直行，腳踭千祈唔好落地先，唔係跌死你呀。」

啊晴緩緩站起身來，實現我剛才所說的教學，雖說不是能夠完全做到，但已經有個形狀。

「吖！」啊晴的第二次摔倒。

「你冇事啊嘛。」我上前問道。





「冇事，冇跌親。」

「一係你拖住我行喇，揾到個竅門先啦。」終於，我終於都講咗呢句嘢出口。

「好吖，靠曬你喇。」啊晴回道。

「YES！」我心裡暗道，處於精神世界嘅我已經興奮到手舞足蹈。

我捉住啊晴對手，雖..雖..雖然係第一次拖女仔隻手，緊張萬分，但我好快就平復下來。

「你記得幫我睇後面有冇人喎。」我說道。
「放心喇，如果有人我會叫你停㗎喇。」啊晴迫不及待地想在冰場上滑動。

我改變踩法，內八字形式緩緩向後走，咁樣先可以向後溜冰(拋下書包先🤭🤭)





「Wuu， 行得好快啊。」啊晴說道。

帶啊晴行咗兩圈之後「我好似揾到竅門喇，畀我試下自己嚟吖。」啊晴說道。

「你因住喎。」我不情願地放開手。

啊晴一支箭咁飛咗出去，初頭行就係冇問題，之後就出事啦，我好似唔記得教佢點樣剎車。

「砰」一聲巨響響起，我不敢直視，不過我深知發生咩事，啊晴佢收唔住速度撞咗埋墻。

「汪小姐，做乜嘢溜咁快啊。」啊晴佢跪倒在地上，一副令我哭笑不得的模樣。

「啱啱真係好有feel㗎，點知，點知...」啊晴說到一半停下來。

「點知有人因為唔識得剎車，搞到撞咗埋墻係咪。」我替她說出。

「慢慢嚟啦，學溜冰冇得急㗎。」我說道。

玩到差唔多夠鐘個陣，都準備離開，啊晴由場的另一端緩緩走過來，睇嚟頭先嘅教訓有記住，不過呢度有班細路仔橫衝直撞，完全唔睇路，啊晴快要到出口時被他們從後方撞倒了。

如是者，碰巧我就剛好在啊晴正前方，我上前伸手扶穩，根據物理學慣性，啊晴整個人失去平衡，壓倒在我的胸膛前，換得暫時嘅擁抱。

未完待續...................