【校園】【愛情】A0毒男的愛情史: 【細心舉動】

「乜你同呢度老闆娘好熟㗎。」啊晴問道。

「係啊，細細嗰個陣啊媽唔得閒照顧我同家姐，成日擺低我哋喺度，因為經常性過嚟食晚餐，夏姨姨呢間鋪頭又偏僻，冇咩客人，所以我哋就變咗常客。」我回道。

「原來係咁。」啊晴道。

「你睇下想食咩先，我雖然就話唔係全部試過，但大部分都好食㗎。」我將餐牌遞給啊晴。

「嗯....」啊晴看到餐單上繁多選擇苦惱著。





「啊晴不如試下呢個E餐。」老闆娘把洗用餐具的熱水杯放在桌子上說道。

「嗯...好吖，麻煩你喇。」啊晴道。

「圓仔呢。」點解老闆娘對我嘅語氣咁差，我嚴重懷疑有性別歧視，唔排除提告。

「照舊啦。」我有選擇困難症。

「淨係識食同一個飯，冇啲大志。」老闆娘落完單就翻咗去廚房。





......

話咁快就上餸，我叫咗嗰咖喱薯仔牛肉飯，呢個係由細陪到我大嘅飯，點樣都食唔厭，啊晴嗰個E餐係澳洲牛肉眼意粉，話貴唔貴，話平都唔平，都要$60幾蚊，不過今日唔驚，我銀包裡面有家姐嘅助攻，有金主就係無憂無慮。

「いただきます」鐘愛日本文化嘅我每次食飯都會雙手合十表示我要開動了。

「いただきます」啊晴見到我嘅幼稚舉動後相繼模仿。

我眼尾見到啊晴準備食意粉嘅配菜紅蘿蔔，突然間好似諗起啲嘢咁....係咩呢.....仆街啊晴有光敏感㗎喎，記得之前喺網上面特登check過有咩食物會搞到光敏感發作。





我瞬間抓住啊晴的手腕制止她，她同時也被我這個舉動所震驚了。

「做咩事啊，你想食咩。」啊晴說道。

「Er...乜你唔係唔食得紅蘿蔔咩。」我說道。

「點解嘅。」啊晴疑惑。

「你之前講過話自己有光敏感㗎嘛，你唔記得喇。」我說道。

「你咁都記得，話時話紅蘿蔔好似真係唔食得，但係點解你會知嘅??」啊晴問道。

死喇，我好似真係冇咩原因會知啊晴唔食得紅蘿蔔喎，唔通講我特登上網search過咩，成個stalker咁款，唉...點兜好呢....

「Er..家姐都好似有你呢個皮膚病，所以我咪知囉。」對唔住喇家姐，借你過一過橋先。





「你真係細心㗎啫，不如你幫我處理咗佢吖。」啊晴說道。

「哦，好吖。」女神嘅施捨，難得一遇啊，想當然不容有任何理由的拒絕。

......

食完飯過後，閒聊一番，準備埋單個陣，老闆娘拿著數個馬卡龍過來「啊晴請畀你食吖。」

「咁客氣啊，多謝老闆娘。」啊晴禮貌回道。

「唔洗，真係有禮貌啫。」老闆娘說道。

「夏姨姨，我嗰份呢。」我明知顧問。





「要食自己買，28蚊一份。」老闆娘說道。

「唔公平吖，咁樣對我㗎。」我抱怨。

「唔好嬲，我哋一齊食喇，反正咁多我都應該食唔曬。」啊晴提議。

「你睇下人哋啊晴幾好，識得無私分享，唔似夏姨姨你吖。」我說道。

「你講多次??」老闆娘瞇起雙眼冷笑說道，看到這種神情不禁令人背部發涼。

「冇，冇，冇，啲馬卡龍真係好食㗎啫，啊晴你快啲試下。」我連忙吃完馬卡龍說道。

.....

「Bye 夏姨姨，我下次再嚟捧場。」我在店口門外說道。





「再見老闆娘。」 啊晴說道。

「你嚟唔嚟都唔緊要，啊晴記得得閒多啲嚟就得。」老闆娘大聲回道。

未完待續..................