阿狗再襲: XII

一波未平，一波又起。

bio堂有個實驗要做，字典伯要我同阿狗一組。

冇計，鬼叫我哋又係1號同2號。

唉... 如果我唔姓陳咪可以同阿瑩一組。

不過同得旺財一組就預咗要食自己。





但係阿瑩好似... 唉，喊出嚟。

所有人都分到自己朋友，得我同啲唔三唔四嘅人一組。

我哋要整2舊啫喱，其中一個要將菠蘿掟落去。

首先要將啫喱粉溶咗佢。

...





阿狗今次係有幫手，但係攪勻啲啫喱粉嗰陣阿狗整到我成身都係。

啲啫喱仲要紅色，搞到我好似殺咗人咁。

其實我唔介意嗰啲係阿狗啲血。

我發覺佢一係freeride，一係爭嘢做。好似做唔到就會死咁。

但係即使佢幫手，都係幫倒忙，整到成pat屎咁。





我寧願自己孭晒，都唔要件on9仔插手。

切菠蘿嗰陣佢好似打尿震咁，睇佢幾時切親手指。

果然我嘅直覺真係好準，佢又真係切親手指。

「好痛痛...」WTF，咁都要疊字...

佢竟然會諗住阿瑩會幫佢整傷口，都唔搵老師。

今次真係柒俾班囡囡睇。

最後咪又係要我做晒...

之後嘅英文堂又係另一個惡夢嘅開始。