【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 43. [穿越?]
生死簿上，鍾隨心的名字從最尾的頁面漸漸浮現……
「之前搵唔到佢個名，原來係佢根本未出世……原來係咁……」常日羲恍然大悟看著嬰兒室裏正在哭泣的鍾隨心。
時間回到當天劉世檜向鍾隨心表白後，鍾隨心在公園看見自己的母親……
「……黑猫!」
鍾隨心在深夜的馬路中央不斷奔跑，不斷呼喊著什麼，彷彿追尋著什麼。
「出嚟呀，我知你望緊!」
「唔該你，出嚟見下我!!」 鍾隨心一直奔跑，漫無目的一直跑過馬路穿過車輛，直至到跑到海旁，前無盡頭才停下來。
她凝視著海面，在海浪的呼鳴聲中調整著自己呼吸，當她心中有些焦急的時候，漆黑一片的海面上，傳來一聲 「喵。」
一隻黑貓彷彿像是從海面直接跳上來，身上卻絲毫沒有沾濕，穩穩的站在欄桿上。
「呢段時間過得幾好吖嘛?」黑貓注視鍾隨心，俏皮的小孩聲瞬間在她腦海中響起。
「到底發生咩事?」鍾隨心靠向黑貓，焦急的問著。
「實現緊你嘅願望。」黑貓不慌不忙回應
「我唔係講呢一樣嘢，點解佢會係兇手? 我嘅意思係，點解佢會係殺佢嘅兇手?」
「佢地明明係兩個人，但係我眼前嘅佢……明明佢地係同一個人……但係但係……總之……你明唔明呀?」鍾隨心喘著氣有些語無倫次說著
黑貓擺著尾巴「睇嚟你好迷惘喎……要唔要返去一轉? 」
鍾隨心堅定的回答「我要，我要返去搵佢。 」
「老規矩……你記得㗎啦。」黑貓跳上他的肩膊上
「返去都要? ……OK」 鍾隨心有些無奈的回應
「好，你仲有一次機會。」黑貓話畢她身體開始消散，衪舔著自己的前爪，輕輕吐出一團毛球，看一眼面前的世界。
「這一團毛球，越來越有趣了。」
毛球落地的瞬間，連同黑貓一起消失不見，彷彿未曾存在於這世上。
鍾隨心慢慢地張開眼睛，感覺到周圍一片陌生。發現自己躺在一張陌生的床上，她試著坐起來，卻只覺得頭暈目眩，瞬間又倒回了床上。
她筋竭力疲，在朦朧中詢問著自己「我係邊……」
「……我返咗嚟! 」她睜大雙眼坐起來，看著自己的腹部包裹著紗布，未等他反應，一個蘋果便掉在地上。
「你醒返啦!?」鍾隨心聞聲發現自己旁邊坐著一個女人，在這室內環境戴著黑色口罩墨鏡，衣著剪裁非常精緻，渾身散發出時尚的感覺。
「你係……」
「你係咪瞓懵咗? 係我呀。」女人聲量降低，輕輕拿掉墨鏡和口罩。
「李彤姐!」鍾隨心受寵若驚。
「細聲啲，我唔想畀人認到!」李彤慌忙的捂著她的嘴巴，隨後靠前身體輕輕抱著鍾隨心「你冇事真係太好喇，估唔到嗰陣睇到嘅夢境……竟然係真……早知唔介紹你哋兩個認識。」
「佢居然會做啲咁嘅事……」 李彤努力忍著眼中的淚水在自言自語著。
「講起呢樣，劉世檜喺邊?」鍾隨心問著
「我想見佢一面，你識咁多人一定可以幫到我，唔該你。」李彤看著他誠懇的眼神，苦皺眉頭再三思量後，還是點頭答應了。
永倫精神病院大門外，李彤走下了箱型車，她的助手攙扶著鍾隨心坐在輪椅上，李彤接過輪椅把手，吩咐司機和助手在這裏等著。
而她獨自推著鍾隨心進入裏頭，兩人隨著醫護人員的帶領下，來到了一間很狹小，中間夾著一塊玻璃的房間，牆邊位置似乎有些蜘蛛網。
看著有些骯髒的環境李彤略有嫌棄的說「呢間就係探訪室?」
「根本唔會有人入嚟，所以呢度都空置咗一排。」 醫護人員退後一步。
兩人隔著玻璃看著另一頭的房間，李彤似乎有些不忍直視，稍為將視線移開「我……都喺出面等你。」
鍾隨心輕輕把輪椅向前一推，靜靜看著對面被五花大綁的劉世檜，頭髮凌亂，總是低著頭喃喃自語著什麼，不斷嘗試擺脫束縛。
「你，究竟係邊個?」 鍾隨心凝視著眼前的男人。
「我同佢一樣……我哋都係罪人。」 劉世檜聽到有些熟悉的聲音，緩緩抬起頭。
「你，係真係假? 定係幻覺? 冇可能，你死左，冇可能!!」轉眼他看見鍾隨心坐著輪椅，情緒變得激動起來。 「我唔係有心，係佢嘅錯! 唔係我嘅錯。」
「你講緊乜嘢，留心聽住我講呀，聽住。」鍾隨心似乎亦跟著激動起來
兩人互相對視，鍾隨心輕輕一問「你係咪我識得嘅劉世檜?」
劉世檜雙眼泛紅，聲線略帶悲哀的說「你唔記得我? 」
「明明佢已經韞住咗喺個燈籠……佢俾天收咗啦，黑白無常會困住佢係地獄……明明應該係咁，點解佢又會出現? 佢唔出現我就唔會傷到你……」
「一切都係佢造成嘅……呢個世界有bug，永恆輪迴，呢個世界有bug，永恆輪迴……」
鍾隨心從他的語言中找出了一絲重點 「乜嘢燈籠? 乜嘢黑白無常? 你講清楚啲!」
「時間捲到變毛球，我哋都要困住喺裏面，互相打咗一個死結……然後永恆輪迴等畀人消除……都係因為佢……」他開始自言自語
「答咗我先? 乜嘢燈籠? 你頭先講嘅係咩意思??」她激動的拍著玻璃，劉世檜情緒越來越激動，醫護人員終止了探訪。
病院大門外，李彤安慰她道「當係你有前世記憶，佢只係你嘅過去，而家嘅你要專注當下，忘記佢吧。」
「係喎話說而家佢哋點樣?」鍾隨心抬頭看著你李彤。
「佢哋?」
「凱婷同埋余程天。」
李彤停下了腳步「你點會識佢哋? 我冇同你講過……」
鍾隨心沒有把黑貓的事告訴她，臨時編了一個謊言「昏迷嗰陣，我又記返少少……前世嘅嘢。」
「佢哋而家喺邊? 係咪一齊咗?」鍾隨心好奇一問
李彤遲緩了片刻回答「佢哋……」
「……上車先我慢慢同你講。」
鍾隨心坐在車廂後座，聽完李彤的說話後一臉難以置信，一層陰霾籠罩在心頭，兩人就此安靜了許久，直至前方的紅燈久久不轉，望著窗邊的她忍不住發話。
「係咪有啲耐?」言行間轉頭看著李彤才發現一絲不妥。
並不是紅燈不轉……而是整個世界停下來了，副駕駛位置黑貓忽然探頭蹦出。
「喵~」
「黑貓……你嚟得啱啦，送我返去我要去救凱婷。」
「唔得。區區凡人想叫我幫你逆天改命?」黑貓直接了當的回覆，臉龐上彷彿擺出了一個嘲諷的微笑。
「點解，你都畀我回到過去啦? 有分別咩?」鍾隨心雙手拉緊安全帶，語氣略帶不忿。
黑貓跳上他的大腿上「好大分別，只係你仲未察覺到。」
「佢哋唔係同一個人，我識得嘅佢一定唔係精神病院嗰個! 但係……點解?」鍾隨心略為增大雙眼，彷彿意識到什麼。
「係囉，咁點解會咁樣?」黑貓瞇起雙眼，表情像是在微笑。
「你明明就知道，點解唔同我講!?」 鍾隨心不解的問著
「你哋啲凡人唔係最鍾意自由意志嘅咩?」
「講畀你聽，即係殺滅你哋嘅可能性，最後只會永遠係一成不變嘅事實裏面。」
「但係，我男朋友已經消散咗，呢個已經係一個事實。」
「只係對你嚟講係事實……」黑貓目光變得銳利笑容讓人有些毛骨悚然
「好好諗清楚……把握你淨低的機會。」鍾隨心看著自己身上的七彩心形頸鏈苦思著。