【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 37.[送別]

整間酒吧內，只得吧檯前開了一盞柔和暖光燈，照耀著余程天一個顧客，他獨自趴倒在吧檯前，喝著一杯又一杯。


門外的牌掛著未營業，除他以外的地方漆黑一片，常日羲擔當調酒師的位置，不過她所做的只是一直斟酒，抹枱，斟酒… 


檯面總是有片水漬，水滴偶然隨邊界滴在地面上。


淚痕在他臉上從沒乾竭，酒瓶在枱面上陸續有來，酒與淚越發變得淡而無味。






常日羲望著他悲痛欲絕樣子不禁嘆息一聲，想起記憶中久遠的自己，偶然看見牆壁上滴答響的時鐘，他已經在這裏喝了數小時，還有數分鐘就十二點。


常日羲走到大門前，似乎決心想做什麼，隨即雙手合十聲線溫柔的呼喚「錢凱婷，錢凱婷，錢凱婷，速速前來!」


「啷，啷」酒吧大門被打開，余程天已經爛醉如泥，口中依然喃喃自語不知說著什麼。






凱婷比平常更加安靜，看著周遭熟悉的環境「我又嚟幫襯啦。。估唔到你哋會係接我走嘅人……之前我仲喺你哋面前講唔信神佛……諗起就好笑。」 


環顧一眼後發現余程天獨自倒臥在枱上，凱婷掀起一絲不安「佢…佢，個傻仔唔係自殺死咗呀!?」


常日羲捉著他的雙手「放心唔係…你應該有啲嘢想同佢講㗎嘛?」






「算啦…我…」凱婷低頭看著自己殘破的衣服。


「你唔講嘅話，至少望多佢最後一眼。」常日羲輕輕微笑，話語間她像是仙女教母，朝著凱婷施展法術「呢套衫我自己整㗎，就借住畀你先啦。」


凱婷沾滿血簡陋的白衣服，逐漸變得潔白無瑕，款式變成了吊帶白襯衫，拖鞋變了高踭鞋，短牛仔褲換然一轉成了黑色短裙。


她輕輕坐上了吧檯，俯視著余程天的臉龐。


常日羲玩味一笑，輕輕打一下響指，余程天的思緒從醉酒中變得清晰，緩緩睜開雙眼，再次流下一滴淚。






「凱婷…」余程天一副愕然的表情 


 「你見到我……?」凱婷輕輕轉頭，看見常日羲的表情，便知道是她搞的鬼。 


「對唔住……」余程天他在枱前啜泣


「你有咩好對唔住?又唔關你事嘅…」凱婷輕輕抬起他頭用手幫他擦掉臉上的眼淚。


 「收聲，男人老狗，唔準喊!」凱婷裝作嚴厲的指著他。






凱婷輕嘆一聲，忽然看見枱面上自己做的手作銀包 「早知會死就唔畀心機整喇……」


余程天真的停止了哭泣，沉默地斟了一杯酒一飲而盡，忽然大喊一聲「錢凱婷!」


「唔好意思囉講笑咋嘛……嘩!!」余程天在凱婷驚訝的面孔中緊緊抱住了她，凱婷瞬間心臟小鹿亂跳，滿面通紅。


「我唔知幾時會醒，都唔知你會唔會聽到…但係……」余程天情深地說 


「我應該喺探靈嗰陣就交封信畀你……我嗰陣仲講啲咩只係想把握好機會，盡量唔好有遺憾啫……簡直係笑話。」






「可能早啲同你講，結局可能會唔同。」


凱婷逐漸睜大雙眼「封信……封信? 嗰陣封信係畀我嘅? 」


「你之前話過，我可能鍾意嘅只係有人陪伴嘅感覺……我諗咗好耐，我而家好肯定，我鍾意嘅係你。」


「點解我唔早啲講……」余程天欲哭無淚的低下頭。


毛月永進門留意到他後，與常日羲四目相對，正當他想舉起手臂，常日羲瞬移到他身前捉著他的手。






「畀佢留喺度一陣。」常日羲眼神異常堅定 


「你又想做多餘嘢。」毛月永態度亦異常堅決 


「只係一件小事啫，生離死別嘅感覺你應該好清楚…」


「係咪過咗幾千年身份唔同咗，你就唔記得咗嗰陣嘅感受?」常日羲眼神閃爍著綠光，用力捉緊他雙手，知道敵不過他的蠻力，便驅使法術從衣袖裏延伸出無數絲線束縛著他的右手。 


「我就係太清楚，唔好唔記得鬼差都係罪人!」毛月永同一時間雙眼也露出金光，兩人對峙。


整間酒吧彷彿震動起來，卻絲毫沒有影響余程天兩人，常日羲身後彷彿有一幅無形的牆，分隔兩邊空間。


「我唔想再有咩差錯出現……」毛月永義正嚴詞說著 


「講咁多嘢你都係為咗自己啫。」常日羲後退一步，絲線從她背後漫天飛舞。


「咁多年都就咗你咁多次，唯獨今次唔可以。」毛月永掙脫了手上的絲線。 


 「點解? 點解唔可以? 明明就係因為你嘅失誤，搞到佢地魂魄攙和，你都係搞到凡間因果錯亂嘅罪魁禍首之一。」


「你驚有影響? 唔好唔記得你係最影響佢哋嗰個人。」常日羲説罷，漫天絲線朝毛月永飛奔而去。


毛月永手中顯現一條冰冷的鎖鏈，想要揮出的瞬間看著眼前的常日羲卻猶豫了，緩緩放下手。


絲線把他擊退到牆壁，意識到自己出手重了的常日羲把絲線化於無形。


「你冇事吖嘛，毛嘜?」 常日羲有些內疚地說著 


兩人化著淡光的雙眼慢慢趨於正常，毛月永坐在地上看著牆上的時鐘。


毛月永看了一眼她身後的兩人「你就係每次都講到咁應，你想點就點啦……就當係今年嘅七夕禮物。」毛月永放下燈籠轉身就走。


「毛嘜! 」常日羲連忙走進吧檯的櫃子中，拿出一個禮物盒，然後遞給了毛月永。


時鐘顯示現在十二小時多，常日羲情感複雜的說著「唔好咁遲返，七夕快樂。」


 「……我出去喇。」 毛月永接過禮物，便消失於門後。


與此同時凱婷身體輕輕靠近，翹起雙腿，整個人幾乎貼著余程天。「其實嗰日，我都想畀封信你，只係唔小心跌咗。」


「我一直以為你鍾意嘅…仲係……呵呵」凱婷無奈的笑出一聲 


「我哋真係白痴…呵…」余程天跟著一起笑，最後瞬間形容變得嚴肅的看著她


 「……不如你帶埋我走? 」


未等他反應，凱婷一巴掌打在他的臉上「聽住，你要長命百歲到自然死先好搵我! 如果唔係我打到你變豬頭丙!」


「日羲~聽講孟婆湯可以自己揀㗎喎? 我想要一罐1664!」凱婷高聲喊著 


「你…要飲啦?」常日羲有些驚訝 


「我驚再望到佢，會唔捨得走。」凱婷轉眼望回余程天，拿到啤酒後，她舉起一罐啤酒，對著被打得有些茫然的余程天問著「乾咗佢?」


余程天輕輕拿起檯前的酒杯，隨著一下碰杯聲，凱婷高舉啤酒就一飲而盡，眼角的淚水卻不斷流下。


空罐被用力放在枱面，凱婷溫柔的拉起他衣衫，聲音沙啞又倉促的說「聽住呀你之後，唔好食咁多煙……仲有，仲有好多好多想同你講，所以下世你一定要搵到我!」


凱婷思緒逐漸變得模糊，余程天的臉龐逐漸變得陌生……


「……差啲唔記得咗!」凱婷靠近余程天，對著他的嘴唇輕輕一吻。 


「我愛你，你冇得say no架。」最後一句在他耳邊輕輕說著 


「我都係…」余程天想要伸出雙手，待他睜開雙眼的時候……


「凱婷……凱婷!!」他已從現實中醒來，身影在餘光中逐漸模糊。


余程天雙眼泛紅對著空氣說道「我呢一世唔會再溝女，最愛嘅只有一個。」


凱婷輕輕一笑「超級大傻仔。」 臉上的笑意與淚逐漸消失，常日羲輕輕拖著凱婷的手


 「你係邊個?」凱婷站在原地輕輕一問


「我係帶你去投胎嘅人。」 常日羲用溫柔的眼光看著她


「咁佢呢? 總有種想打佢一下…但係又想攬住佢嘅感覺。」凱婷話畢已經手起刀落想打一下他的頭，可惜觸碰不到他。 


 常日羲失聲一笑「佢係今生你最愛你嘅人，你哋應承過下一世會繼續一齊。」拖著她朝著側門走去。