【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 29
「你呢封…」凱婷焦急的搶走他手上的信。
「喂，攞返嚟!唔睇得!」余程天立刻反應想要搶回，拿到手的凱婷，在昏暗的環境下定精細看了幾秒，卻發現顏色與自己那一封並不同。
瞬間余程天便搶回了，凱婷有一刻曾想過，這是一封給自己的信，但很快便打消了這個念頭。
「情信嚟㗎? 畀佢嘅?」凱婷輕輕一問
「…你估下。」余程天盯著手上的信，停頓數秒後又說
「我冇興趣知。」凱婷裝作毫不在意
「唔窒我嘅? 你應該會話點解會寫信咁老土之類嘅嘢。」
「我係覺得幾老土，但係幾符合你性格。」凱婷說
「咩呀，戇鳩仔呀?」 余程天自嘲著
「你咁有米，之前又話過屋企人市儈功利乜乜乜，你一定鍾意嗰啲有心機嘅手工嘢，我有冇估錯?」
余程天只是輕輕一笑此刻從背包中拿出兩支維他命水一藍一紅。
「我原本幻想過，會唔會有機會好似而家咁，兩個人會突然韞住咗係一間房…嗱，而家啲支畀你飲。」
凱婷接過紅色的維他命水，看見他背包裏還有便利店三文治，不禁開聲「可惜我唔係李彤，要你失望添。」
「不過你覺唔覺得你準備充足到有啲嘔心?」
「我只係想把握好機會，盡量唔好有遺憾啫。」余程天咬下一啖三文治 「反正呢啲都係小事，做多少少又唔會少忽肉嘅。」
「超，懶有型。」不料她說完這句後肚子馬上咕嚕響。
走廊外，剛才那隻橙色小貓嗅到一絲食物的味道，跳上一道破窗走進了課室內，余程天回頭發現小貓在自己靠依的木枱上，目光緊盯著自己手中的三文治。
「呀~」余程天拿起三文治就遞在貓的面前。
凱婷在餘光中看見三文治，一早已經心意煩亂的她腦海中掙扎著 「他要餵我嗎? 我要吃嗎?要嗎?」
一剎那的猶豫後，她閉起雙眼朝著三文治一大口咬下去。
隨後她緩緩睜開雙眼，鼓起的面頰看著眼前，余程天用一臉難以置信的樣子看著自己。
剛才即將要把三文治吃到嘴邊的小貓彷彿一臉失落，凱婷好像在小貓的眼神中覺察到一絲的悲傷，看見這一隻小貓以及余程天的反應，才明瞭原來他不是要餵自己吃。
「唔使餓到咁呀，同隻流浪貓爭嘢食，你肚餓出聲吖嘛我仲有一個喎。」在余程天嘲笑聲中，凱婷羞愧到耳朵都紅了，連忙遮住自己面頰。「你好煩呀收聲啦。」
余程天把剩餘的分給小貓，撫摸著他粗糙的皮毛。
她偷偷探頭看一眼，這一瞬間被余程天的眼眸捕捉到，讓他霎時心動了一下， 他在一旁靜靜地看著凱婷，忽然開口問道。「你覺得我交唔交封信出去好?」
「你交唔交關我咩事啫?」 凱婷嘀咕著
「可能關事呢，我而家有啲搞唔清楚我嘅想法。」余程天看著眼前的女孩，不知為何面紅了。
「當你真係鍾意一個人嘅時候，根本唔會有第二個選擇。當你諗嘅時候答案已經出咗嚟。」
「可能你鍾意嘅只係有人陪伴嘅感覺。」余程天從未想過會在凱婷口中聽到這些說話。
「唔想遺憾嘅，就光明正大畀封信彤彤，等佢畀個確確實實嘅答覆你。」
凱婷鼓起勇氣，抬頭看著余程天「就算佢唔鍾意你，可能…都會有人鍾意緊你。」
「你呀?其實如果…」余程天輕輕一笑，還想說什麼卻被凱婷打斷了。
「我唔聽。我唔想知，至少喺呢一刻。」 余程天察覺到她眼眸有一絲閃縮。
余程天回覆「咁樣，等佢畀完答覆我，我再同你講。」
「是但你啦。」凱婷側過頭
余程天輕輕一笑「行啦，我哋落去搵佢哋。」
「我哋走啦貓仔。」 余程天輕撫牠的頭顱，再次嘗試打開門口，這次輕而易舉便開了，鍾隨心靠在走廊，剛才的對話她無意中全聽到了。
看著余程天不自覺上揚的嘴角，以及凱婷的嬌羞臉，她默默感歎著 「明明直接說出口就好了。」搖搖頭笑一笑後跟在他們後方。
余程天在凱婷後方，輕輕打開那封信，上款第一句「TO: 凱婷」，僅僅只是看了一眼
便默默把信封收回背包。
余程天操弄著手中的攝錄機「差啲唔記得咗，繼續影下先。」
聽罷，鍾隨心馬上走到一幅牆後躲著，待攝錄機掃過後才探出頭來，心裏默默表示「呢嚿嘢真係麻煩…」
同一時間， 劉世檜在廢校大門附近閒逛，李彤顯然有些不情願，雙眼總是看著地上，生怕會看見什麼來。
「你有冇試過遇到啲好恐怖嘅鬼?」李彤問著
「有，細個。」
「係咪七孔流血，眼裏面有血絲披頭散髮咁樣?」
劉世檜冷笑一聲「電影咩，可能真係有呢啲，不過我未遇過。」
「咁你見到嗰隻恐怖嘅鬼係點?」
「外表同人冇咩分別，仲要比平常人更加善良，但係其實內心一直想謀害你，不知不覺會畀佢蠱惑咗，呢啲先係最恐怖。」
「做咩呀成日撞鬼咩，去搵我阿叔幫你封咗個陰陽眼佢囉。」劉世檜笑著說
「咁樣好咩? 你以後都見唔到佢㗎喇喎。」李彤的回答讓他整個人沉下來。
「雖然我唔介意而家借個身體出嚟，但係之後呢? 你哋諗住點算?」
「太執著唔會有好結果。」
「唔試過又點知? 可能得呢? 」劉世檜眼神閃縮一下「依，女廁喎，未入過入去睇下先。」
李彤沒有再說什麼，跟隨在後方。
劉世檜經過著一排鏡子，頓覺得有種不自在的感覺，像是有視線盯著自己，眼睛瞥去鏡子，有一刻感覺他不是自己。
「終於要分離了。」 感覺熟悉的身影在自己身旁閃過，站在自己後方。
「你見唔見到…聽唔聽到?」劉世檜回頭一臉驚訝詢問著
「咩呀? 你唔好嚇我喎。」 李彤一面警惕看著四周
劉世檜困惑的朝著女廁盡頭走去，最後的厠格中，被放置了一塊全身鏡，外框是精緻的木雕，除了鏡面上的一個血印，其餘也頗為潔淨，與周遭殘破的環境格格不入。
「你…想做咩呀?」李彤有些驚訝地問