[個人傳記] 年少荒唐回憶錄: 41. After party
講起台灣同我地去蒲，果個冇乜出黎玩開既兄弟，係經過4-5年既愛情長跑之後，終於同女朋友步入婚姻既殿堂，而我地幾個當然係幫佢做兄弟啦。我唔知大家有冇，但我每次做兄弟既時候都會期待下有冇after party既，但呢位兄弟老婆就乖乖女黎，身邊朋友都唔好話蒲話劈，酒都唔飲多杯，而重點係，質素都真係一般。
我地班兄弟自然不甘寂寞啦，咁啱佢就係尖沙咀擺酒，酒席散場都先係十一點幾左右。我地四條仔即刻就行去諾士佛台，搵間酒吧隊下酒又整支shisha啦。果晚其實都好多人，好多都係男男女女咁，我地四支公仲個個西裝骨骨都有啲顯眼，but who cares。只要你唔尷尬，尷尬既就係人地嘛。不過更尷尬既事黎啦，四條仔唔通玩骰互隊咩，所以加埋百鳩幾歲都玩埋啲小朋友野，猜枚輸左就去搵個女仔請佢飲酒果啲核突野呢。
作為七省拳王既我，為左避免尷尬就梗係十成功力應戰啦，結果我地就踢左其中一個兄弟去老尷啦，佢揀左成間酒吧最入果張台，果度五條女零條仔，都係係度shisha緊。我諗個死仔應該望左好耐，因為我一路都冇留意到有台人係全女班。Anyway，佢尷尷尬尬咁請人飲完酒就死返黎啦，同時間佢傳來捷報，班女話反正佢地都係得幾個女仔，問我地有冇興趣一齊玩喎。今次真係屎忽撞棍，玩出個未來啦。
咁識新朋友大家就梗係正常自介下，然後就開始cheers啦，兩杯落肚之後都係玩下圍枚果啲野啦，玩圍枚有個重點既，就係男同女如果唔係隔住坐都幾無聊，打個比喻，大摩叫中就我飲，我叫中就保少飲，Yanis叫中就小M飲咁，你估我地會有幾認真叫丫嗱。
咁我就話不如大家隔開坐先啦，佢地又OK喎。講真，由你地見我地幾支棍就叫我地一齊玩開始我都知你地亦非省油燈啦，志在俾個借口大家行動姐，如是者，Katrina 就坐左係我身邊啦。其實我就有少少面盲症既，佢地自介完一輪之後我都已經開始唔記得邊個打邊個，不過平心而論，五條女都係可食用級數既，又冇邊個特別出色咁，所以我都冇記得幾多個人。大家都係正常咁玩，正常咁飲，又互相試下對方支水煙咁，氣氛幾融洽先。
但圍枚呢啲遊戲節奏太慢，玩左一陣大家都想抖抖，就開始分兩台係度各自玩骰啦，我唔敢自稱老江湖但總算縱橫酒場多年，輸少贏多就應份架啦，一陣如果又好似係台灣咁貓撚左就真係嘥餐士。不過Katrina技術就麻麻，見佢接連幾杯落肚， 一時之間都好似飲唔落咁，難得今日我一身西裝骨骨，做晚紳士幫你頂兩杯啦，班兄弟就當然搞事起哄啦，而啲女都係度偷笑。挑，我光明正大有咩怕你地笑。
但亦係呢個舉動我就成為左呢台既焦點，班女見我咁勇就梗係想黎挫一挫我銳氣啦，班兄弟就借機話partner黎挑我同Katrina，唉，你估型真係唔使付出代價咩，雖然我技術高，但一個打幾pair人喎，好在擺酒果陣冇飲幾多，唔係真係冇貨賣。Katrina都唔忍心見我係度苦戰，就話俾我地抖下先啦，啲女當然起哄話幫住哂啦，佢都尷尷尬尬咁拉我埋一邊坐低傾下計。
傾傾下先知原來呢班女係大學同學，大家都係好間唔中先會約出黎飯聚飲野Girls talk，亦都好奇下我地個個老西係咪傳銷或者保險撚啦，慢慢就會講下自己既生活同性格果啲，原來我同佢係同一個星座，又係住同一區，思想或者觀念上亦有啲地方幾近，咁我就大佢三年，而且工作需要成日都四出奔走，見識亦都自然夠我同人有足夠話題唔悶場先 (當然冇講啲廠又帶我Call G唱仁K果啲啦)。Katrina果時先畢左業2-3年，career path仲係屬於初始期，當然覺得我呢啲哥哥見多識廣，聽故仔都聽得好入神。
同時我地都會share下大家既感情狀況，係佢眼中，我同佢都係幾stable既人，大家都有一個拍左好幾年拖既伴侶，都係果句，又冇講錯既，只係我有時唔止一個伴侶姐，又有時有啲性伴侶姐，你唔問我咪唔講囉，就算你問，都係一樣啦，狗咬都唔撚認啦。我自己有個壞(？)習慣，就係一坐低傾計，如果面前係有野飲，我係會瘋狂吸入，個人冇乜意識地係咁拎起杯野飲，可能噴得太多口水要補充返水份啦。Katrina亦都一直陪我飲，講到一啲地方我地幾match果陣，又會cheers。
結果係我地之後都冇乜點玩，一路都坐埋一邊吹水，冇乜點睇時間，直到佢地話都飲得七七八八，支水煙都冇味啦，果時好似都三點幾，我地班餓狼又點會咁順攤丫，我就話不如過imagine下半場啦，尖沙咀Imagine係當時我認知當中唯一一間開到天光既酒吧，班女都意猶未盡，咁就埋單起行啦，佢地仲會埋返部份單呢一下值得加分表揚返港女先。
咁Imagine就係海防道既，由諾士佛台行去海防道話近唔近話遠唔遠啦，我都唔記得我地成棚人個陣式係點樣行法，因為Katrina拉住我Drop到最後，兩個人一路傾一路散步過去，我都冇乜為意大部隊係點行，其實行過去果陣我地都分享左好多生活點滴，比如平時鍾意去邊度旅行，鍾意食咩呢啲，亦都慢慢講到另一半身上，我都好坦白咁講出我同女朋友之間既問題(當時我係拎左我同Ex既故仔黎講)，而Katrina都話佢同呢個男朋友太耐，中學開始就一齊，好多野都好順理成章，好似冇哂激情火花咁，個男仔係好好，好乖，個個都話佢會係一個好老公，但Katrina呢個年紀，係多FF架啦，都會想有多啲心思野，我又開始share我果個玩夠既男仔比未玩過既男仔更好既大道理，出奇地Katrina都幾受落幾認同，認同請分享！ 開始係咁話我地性格好似好夾，價值觀同想法都好match。
講真，我地行過去果陣我真係冇乜特別想法，都係抱住一種放監出黎玩既心態姐，但同Katrina傾計果陣又會覺得佢係一個唔錯既傾計對象，雖然佢一直話我地好match好夾我覺得有少少over左。我地因為行得慢，佢地上到Imagine，已經坐低哂，酒都叫埋，我地兩個就繼續坐埋一邊係度傾，連佢班姊妹都開聲話「你地有冇咁好傾呀？」。出奇地Katrina唔知係飲大兩杯定點，係咁宣揚我同佢好夾呢件事，我班兄弟就陰陰咀望住我笑。喂，我乜都未做喎。
咁一班人飲野，冇可能就兩個人吹水吹到天光架嘛，成班人又開始玩酒game，拎左副啤牌，我就開始教佢地玩「陪酒員」既遊戲，即係你地宜家睇到澳門Youtube channel 「X辣」玩既大排檔，我係早唔知幾多年已經嘔到出神入化。咁當然呢啲高殺傷力既遊戲玩兩舖大家都要抖抖先啦，玩返truth or dare呢啲中學雞遊戲，佢班友不論男女都係做鳩我同Katrina，又攬又咀又交杯酒咁。
其實我就還好既，Katrina狀態持續高漲，休息之際我同佢又開始係度傾計，都係圍繞返男女關係，只係今次佢講佢既事比較多。佢所謂既男朋友原來係佢未婚夫，兩個人拍拖長到所有人都肯定佢地係一對，佢鍾意咁樣又唔鍾意咁樣。交代返，唔係我打錯字，係女人就真係咁矛盾，佢鍾意呢個男人乖又對佢好，但又唔甘心呢個男人悶，咁早就已經冇哂火花。
好典型既辯題，「是否應該和老實男結婚」，咁作為一個有啲經歷既人，都好冷靜去同佢分析兩方面既好壞，但當然我唔俾任何意見啦，所以講白左，就係講左一大堆廢話。不過Katrina又好似中左邪咁，我講乜都覺得人生大道理咁，喂屌咩，我只係summarize左一次pros and cons咋嘛，呢啲野我就唔信你唔知同冇諗，不過由我把口再講一次姐，但佢就係覺得我好明白佢，好了解到佢真實需要係乜。Well，唔知Katrina你又有冇諗到我宜家需要係咩呢？忽然佢爆左一句，「我真係冇遇過一個咁夾既人，都冇諗過真係有一個咁樣既人，點解你要咁遲先出現呀……」。
………唔撚係掛.jpg，我屌閪舞王幾時變撚左尖沙咀情聖架喂？劇本唔係咁寫架喎，霞姨！！！然後Katrina眾目睽睽之下又拖又攬又錫我，大家都O哂咀，兩秒之後陰笑既陰笑，眼突既眼突，個個都默契波咁扮冇事，我唔知，我睇唔到咁。既然係咁，我就老實不客氣啦，送到上門又唔差，Why not？欲知後事如何，且看下回分解。