[個人傳記] 年少荒唐回憶錄: 38. 一念天堂，一念地獄
我同瑜瑜去到酒吧會合返班兄弟，去到跟住台號搵，離遠一望，咦，咁多人既突然，我差啲以為我睇錯number，行近啲先發現係佢地班死仔，但仲有Flora與她的朋友們，加幾件台妹咁。
故事是咁的，第一晚我兄弟寡不敵眾之時，拎左個台妹contact，約佢今晚出黎玩，個台妹俾Flora兩個朋友夾擊之時都交換左Line，佢地又係起勢Yo果個台妹，台妹見我地兩班都係香港人就話不如一齊玩啦。Well，成件事我都唔知情喎。講真，雖然我都鍾意熱鬧，但我就唔係幾想既。
第一，為兄弟黎睇，多個香爐多隻鬼，宜家多夠兩隻，假設你分開約，但你有張台，條女基本上都會揀搵你玩啦，所以等如係拎自己資源去益人。
第二，我今晚同瑜瑜一齊黎，都九成九同佢走，Flora黎到望住我，我今晚到底應該留返個好印象等我返香港可以搵佢聚下好丫，定係盡情享受瑜瑜好呢。
不過既然都米已成炊，屌那媽頂硬上啦。第一件事就係揀位先，U字型梳化，兄弟就係正中間，Flora一行人居左，幾個新識既台妹居右。正路就揀係揀右邊啦，新女之餘仲要係台妹，又唔使面對Flora咁尷尬，但我反其道而行，只因為一個義字。一世人兩兄弟，識左十鳩幾廿年，講義氣架嘛，今日我拖住件台妹，自己有飯開就要開始幫助同伴啦。個排位就變左
左邊
「══兄弟
║
台妹
║
港男朋友1
║
港男朋友2
║
港女朋友1
║
Flora
║
瑜瑜
║
我
一坐低就梗係黎個全場大合唱，一齊飲返杯先，我花朵酒場巡警，飲淨一滴都叫你瀨返乾淨佢，之後就圍下枚熱下身先，叫中指兩個飲。以技術黎計呢兩條仔應該平時都冇乜猜開，屎忽撞棍就實有既但普遍命中都唔高。唔好以為圍枚呢家野真係純靠運呀，8個人8隻手都真係有人夠膽死認真叫收哂同開哂。基本我都係會指佢地其中一個男仔先，再搭一個女或者even兩個男既，酒過三巡熱完身就開始換game玩下骰仔。
8個人正常就應該4打4啦，但我絕對係不走平常路既人，我話同兄弟猜partner，unfair。即係我同佢包剪𢱕，贏左揀一個partner，之後再猜，最壞情況係我連輸6舖包剪𢱕，咁就要一個挑佢地七個機，俾幾秒大家思考我點解要咁安排
一
二
三
其實好簡單，因為咁既情況之下有利我操控賽果，球証、旁証，加上主辦、協辦機構，全部都係我既人，你點同我鬥呀？你冇得同我架fc鬥呀fc鬥呀fc鬥呀！我想輸果陣就拉兩條仔，想贏果陣就拉淨兩條仔，基本上佢地都飲左9成啦。當然就唔會舖舖係咁，嚦咕嚦咕新年財入面話齋，「大同小異啦，我地都想搞多啲花臣」。
咁好多時都係我求輸多，一來我比兄弟飲得，二來兄弟仲要留返有用之軀，三來我仲有瑜瑜呢個溫柔鄉俾我依靠。講開又講，唔知係咪我心多定係點，Flora對陣瑜瑜果陣好似特別賣命咁，可憐我瑜無辜硬食，佢又唔多飲得，我都要幫佢頂下酒。咁你知人多飲酒，總會有人話要去廁所之類架啦，Flora同佢女仔朋友去廁所之際，我都殺得性起坐入去追擊兩條仔同條台妹，想左右逢緣丫嗱，想食兩家茶禮丫嗱，今晚準備食我兄弟條蕉啦！
果兩條仔可能到宜家都未知咩事，果晚係咁俾我㩒住砌，如果你地有幸睇到呢篇文既，同你地講返聲唔好意思，但各為其主，你地都明原因啦，希望你地會釋懷啦。佢兩個見我戰力都唔係講笑，有少少上頭既情況之下就借尿遁先，瑜瑜都坐左埋一邊休息一下，咁唔好意思啦，得返件台妹係度俾我地蹂躪啦，我地兩皇戰一后你想插翼都難飛啦，不過呢條𡃁妹以寡敵眾都依然氣勢十足，係我酒場巡警既法眼下佢都真係飲得又急又足。
詎料係呢個時候居然仲有個程咬金，Flora返到黎之後話佢啲朋友去跳下舞，佢黎繼續玩，人數上又形成返均勢。不過Flora都唔係省油既燈，見幫條𡃁妹手自己都要瀨瀨地野，不如轉會幫我地隊個台妹。阿妹就好似東星耀揚咁，一子錯滿盤皆落索，居然捉我兄弟話要單挑，有腦！邊個仆街再敢話波大無腦我實打柒佢。
結果8個人玩酒game，轉下眼就得返我同Flora係度，你班友好唔好意思呀？正當我想放慢返個節奏𥄫下女之際，Flora一句得埋黎
「唔叫返你個台妹返黎玩？」
「人地酒量差嘛，你又唔搵個台仔幫拖？」
「我使叫人幫拖？再講，冇乜睇得上眼喎，個個都好似你咁成個色狼樣出哂黎」
「咁好正常丫，呢度酒吧呀，你估圖書館咩，你又何嚐唔係鍾意呢個人間妖域丫」
「係冇你咁識食姐，個台妹幾得意幾正丫，你鍾意呢啲乖乖女type又落黎酒吧？」
「係同你唔同類架啦，but why not both？」
「屌，cheap到你呢」
「做好人有好處咩？種善因得善果呀你估？仲信報應呢啲呃細路既野？全部都係廢話啦」
「Damn right，呢杯飲勝」
我都唔知點解會同佢由互窒變左講到人生道理，但我好似感受到啲醋意。雖然係咁，我地都係nobody，大家連一啲關係都冇發生，講咁多講經咩？我當下係有幻想過返香港係咪有野玩有下文，但宜家係台灣，尊重返呢個地方啦，何況幾時都係台妹>港女啦。
跟手Flora又開始撩我玩十五二十，作為新界區U23拳王既我梗係接受挑戰啦，我望左下瑜瑜，佢仲係有啲呆又有啲攰咁坐係一邊，就係我班兄弟旁邊，俾佢抖下先，我出手教訓下呢個不識好歹既女人。但奈何地方真係太嘈，我連Flora叫咩都聽唔到，只好越哄越埋，基本上我地要係耷低頭係對方耳邊叫枚，同時眼神係向下望睇出左咩。靠到咁近之外佢香水混合體香既味道都直衝我既鼻孔，向下望雖然Flora冇乜波路，但都見到微微突起又雪白既北半球，唔動心就呃人啦。
「你都幾香喎喂」
「死咸濕仔，你鍾意咩？你條台妹仲望住你喎」
「你問我鍾意咩先？咁我地都係正經玩枚姐」
「我既香味囉。你對眼正經咩，你估人地唔知你𥄫我呀？」
「Well，真是荒謬，把自己看的那麼高」
「係冇你個台妹咁宏偉架啦，但本小姐都總算有少少睇頭，都仲有唔少人想𥄫既」
「又冇話你唔好，估唔到你咁敏感喎，你都幾好丫」
「超，樓下街市賣菜都知啦」
「見好就收啦你，唔係咁易讚人架我」
「我受得起有餘啦」
我冷笑左一下就縮返開個頭，同時用餘光射向瑜瑜，冇黑面先，好在。呢個moment真係要拿捏好，一陣同Flora玩到過哂界我今晚同瑜瑜就碌柒啦。但Flora得勢不饒人，主動哄返埋黎同我咬耳仔，雙手仲放左係我大腿……內側
「唔使驚喎，我幫你望住條女，佢冇望向我地呢邊呀」
「小姐，玩緊火喎你」
「緊火？緊火果個係你咋掛」
我承認，係佢按住我大脾內側，成個身哄埋黎，香味又傳入我個鼻果陣，我扯左，而Flora都應該feel到。
「都係既，男人不咸女人不濕嘛」
「仲出唔出去跳舞呀？」
「唔啦，我留返啲體力」
「吹到好勁咁喎」
「講吹我估你應該勁啲既」
「吹你條命」
幾經辛苦先走得出佢個節奏，再咁跟住佢節奏行落去真係隨時魂魄都俾佢帶走埋。我起身去睇下瑜瑜點樣先，佢話佢飲得有啲多左，我就問waiter要左杯水，坐係佢身邊陪佢。望住雙眼迷離既瑜瑜，完全係四個字可以形容—我見猶憐。佢楚楚可憐既樣真係嚴重激發到我既保護慾，差啲就俾Flora個妖女迷惑到。係我陪佢坐期間，我feel到佢電話一路震，不過瑜瑜佢一眼都冇睇過，都幾諷刺，呢個場面我都試過，以前我有個女朋友又係係我出去玩果陣係咁打俾我同text我，我知道係佢，眼尾都冇望一下電話就繼續玩樂，唔知瑜瑜宜家又係咩心情呢？係咁搵佢既係咪如我所料係佢男朋友呢？