[個人傳記] 年少荒唐回憶錄: 32. 斷片酒
講完啲情感故事，今日分享下一個幾有趣既經歷。如果有落有追開既讀者，都知道我同幾個朋友form左個小圈子個個星期飲酒。以下係其中一個星期六既對話
言: 「各位兄弟姊妹今晚又去邊間好呀？Richy?」
Yanis: 「尋晚先蒲通宵，今日又去Richy? 好悶囉喂，唔好去酒吧搵啲新意得唔得呀你？」
言: 「Yanis姐食仔太多飽到反胃？如果博物館開到夜晚12點我一定提議同你去，夜晚係得呢啲節目架啦屌」
小M: 「咁不如今晚抖下？」
保少: 「真抖？咁我約人架啦」
大摩: 「保少節目多到呢，毒撚表示羨慕」
高: 「保少節目多到呢，毒撚表示羨慕」
Yanis: 「保少節目多到呢，毒撚表示羨慕」
Jennifer: 「保少節目多到呢，毒撚表示羨慕」
Daisy: 「保少節目多到呢，毒撚表示羨慕」
保少: 「你班仆街仔，今日唔串言哥串鳩我？」
就係咁，今個星期六我地罕有地冇約出黎。咁果時我又冇女想溝，原來就打算係屋企睇波既姐，點知忽然有人搵我，係小M。
「言，今晚唔飲咁你仲上唔上深圳呀？原本仲諗住叫你幫買少少野過黎」
「應該唔啦，你可能要等到下個星期啦哈哈，你本身要買咩？」
「女仔野咋嘛，啱啱用哂呀」
「一係咁，我地兩個食個飯囉，如果你冇約人」
「可以呀，唔好食燒烤唔該」
各位都知道我同小M之間既關係，講真，你話我唔再鍾意佢，冇感情就假既，但有啲野真係冇辦法強求，可能得唔到手先至會咁難忘啦。以前我同佢拍拖又好，一齊玩完食宵夜又好，我都好鍾意去食木屋燒烤，佢個雞皮串真係J死我，估唔到食到小M有陰影。
咁我攤抖左一陣就換件衫去上水幫小M買埋啲野，買野既同時，我見到條街好多當年好興既斷片酒—4LOKO。果陣我都未試過，但香港至深圳，所有social apps都舖天蓋地出現呢罐野，由於係大陸好難買到，所以更加增添左佢既神秘色彩，號稱飲一罐就斷片，我呢啲酒鬼就梗係唔信啦，呃𡃁妹既姐，唔飲得既人飲snowball都可以醉啦屌。
我影左張相send俾小M問佢有冇興趣，呢啲貪玩既女梗係鍾意潮流野，叫我買啲上去試下，然後係個group度問有冇人有興趣，毫不意外地，條條女都話想試。小M就話今晚約左我食飯，不如食完飯唱K飲呢個，突然變左個即興活動，而人數都居然有7個咁多，一人兩罐都14罐啦，結果我買左18罐上去，屌佢老味，重到仆街呀。
咁夜晚我就同小M撐台腳，呢part唔多講啦，有機會之後我再寫下我同小M既糾纏不清。夜晚去K房我地按最低消費嗌左酒就準備開始，大陸啲K房通常都係咁樣收錢法既，比如你book一間大房，佢就會要求你消費1000蚊咁，你去佢個士多買酒買零食買夠呢條數就得，當日我都好似叫左一支威士忌加啲mixer同小食only。
係房拎返我果堆重到hihi既4Loko出黎之後，成班女梗係即時影相打卡po朋友圈啦，我同大摩笑而不語。果晚就得我地兩條仔，保少真係約左人join唔到 (事後屌哂鬼)。一輪相機飲先之後，準備開波之際，個侍仔忽然入黎話不能進食非本K房食品，叫我收返起啲酒，佢keep住先，走果陣俾返我。我地個個目瞪口呆，唔係咁撚on9呀嘛？我又唔係冇俾夠最低消費。
我捉個侍仔出房，隊一舊俾佢叫佢當睇唔到佢都唔肯，傻的嗎？間K房你老豆開架咩？好歹我都係熟客丫，嬲嬲地我拉隊離場抗議，酒就飲唔成，負重又增加左，我將K房買果啲野都拎走埋，再行多兩步我都應該斷氣先，仲斷咩片。忽然小M靈機一動，佢話之前係深圳住過一間酒店都幾大，不如book間大房自己玩算，上網一睇仲有房，成班女因為大家都係熟人，完全唔介意，即刻就起程出發。
辛辛苦苦打的去到酒店，今次我醒啦，廢事一棚人入去俾佢話太多人入住唔啱規矩，就叫小M陪我去check-in，大摩就係樓下睇住班女先。唉，又諗起第一次同小M去開房既畫面……。迅速搞掂之後，俾個房number大摩然後大家好似屈蛇咁前後腳上去。幾經波折終於可以開始，唯一既缺憾係冇冰，得個雪櫃仔，同埋冇骰盅，好在大摩醒目係等我果陣去便利店買左副啤牌。
通晚係房既有小M同佢家姐、Jennifer、Daisy、Yanis、仲有我同大摩。講真，大家都熟得太緊要，點樣坐點樣身體接觸都唔會介意，其實咁樣玩都幾正，private party咁。講返果罐咩斷片酒先，隻隻味都真係甜撚到糖尿咁，我一開始既感覺係酒精濃度高啲既cocktail味飲品，用甜味去吸引啲女飲多啲先搞到飲醉斷片，純粹marketing炒作。(但點知後來上網睇新聞先見到話呢罐野係台灣俾警察驗到有迷姦水既成份，無色無味)
大家都係老江湖，啪左成罐都冇乜反應咁，依然精精神神繼續玩game。宜家睇返，又話係有鎮定劑會斷片，但我記憶中個個都只係玩到好high，就好似買果陣話係indica，但原來係sativa咁 (明就明，唔明就算)。好在係K房支威仔我拎埋過黎，唔係真係唔夠飲，過多陣小M家姐就要走，佢男朋友打黎催交人，仲揸左車黎接佢，小M呢啲爛玩友就梗係玩到家姐係邊都唔理啦，而我見半夜三更一個女人落樓唔多好咁就送佢落去陪佢搵男朋友。
由於之前我同小M加佢家姐同男朋友試過double dating，大家都叫做識得，佢男朋友都唔會
話有咩不滿，仲唔該我送佢落樓，換轉係第二個人，有條三唔識七既仔同你條女去party玩，仲送埋佢落樓兩個人獨處，真係唔眼火爆就假。佢地走左之後我就收到message，Yanis問我去左邊，我話我送左家姐落樓，佢就話咁就啱，大家有啲餓，叫我買野食上去。屌，當我南亞仔咩？deliveroo呀？
我去便利店執左啲零食同杯面就上返去，呢班友平時又唔見咁食得，忽然個個都話肚餓，成個杯面清哂都仲要搵零食，唔知同罐野有冇關係呢。係酒店玩有個好處就係你隨時都可以去沖涼瞓覺，佢地就一路玩一路輪住沖涼，成班人係個廳度都完全冇所謂咁，大家咁放得開，早知我就扮嘔沖入廁所𥄫下野啦。
話就話係大房，其實都係得一張大床一張細床，而且冇房，只係有啲櫃呀傢具隔住下，床同床之間係望到大家既。果晚留宿既有小M、Daisy、Yanis，我同大摩就梗架啦。大家沖完個涼想抖之際，點搞好呢？我原本就叫佢地上床攤啦，我同大摩係梳化hea下就得，順手清埋啲酒。
咁Daisy就話同小M瞓大床，Yanis自己瞓張細既，然後Daisy望一望我地，行埋黎撓住我話你地兩個係梳化好慘咁，張床又咁大，佢同小M又瘦，三個人瞓一陣都可以呀。所以話，Daisy個衰妹真係好鬼貼心抵錫，果下我都有啲呆一呆，我望一望小M佢微笑左一下，我直情尷尬到唔敢望大摩，佢個死仔又識do，佢話你地搞掂啦咁，佢去梳化攤啦bye。尚書大人都算機靈呀……
如是者我就跟佢兩個啦，唔好意思，要打斷下大家既性幻想，係冇得左擁右抱既，小M係左，Daisy中間，我係右邊，咁我都刻意保持距離唔想掂到Daisy，你知啦，呢啲肉體接觸好易出事架嘛。我上床都唔夠10秒，對面遠處既Yanis就發酒癲大叫
「阿言！過黎陪我瞓呀！你迫過去做咩喎！」
唉屌，呢獲真係尷尬到一個點，我已經幻想到梳化果邊傳來花生香味同恥笑聲，我究竟應該係度唔郁享受兩女既溫柔定係過去制服Yanis隻癲雞好呢……