[個人傳記] 年少荒唐回憶錄: 22. 兒子生性

講起大摩，我地一齊玩左都好多年，真係一星期見兩次果種。佢就幾爛玩既，但作為一個毒撚，性格內向左啲，外表平凡，無一欄可自滿，都唔係咁多時候有著落，有時望到佢就諗起當初既自己，真係衰係個毒撚格上面，明明都俾哂位入，仲要懶係紳士或者驚呢樣果樣唔去馬。You only live once, dude。
 
大家真係交心做兄弟既，有時都會替佢緊張同埋唔抵，但皇帝唔急太監急有咩用，Men talk果陣佢都係話隨緣啦，唔急，求飲酒求玩姐，唉，真係俾佢激撚死。
 
直到有一次，小M過生日，咁我地一大班朋友都開左幾台搞party一齊玩同佢慶祝下，呢啲俾面派對除左我地呢啲酒鬼，亦都有唔少佢身邊既良家婦女，平時唔多飲酒唔多蒲既女仔會黎到賀。作為主角既小M當然滿場飛杯杯清啦，而身為朋友既我亦都盡情享受呢個party。
 
可能大家都有幻想過有啲唔太識飲酒既女仔，可以好輕鬆隊醉佢啪啪啪，我可以同你講其實幻想成真既機率好低，因為佢地知自己唔識飲，都會好就住就住，甚至唔玩唔飲酒，坐低飲下水或者果汁就算，除非大家好熟，又或者係信得過既朋友。
 
基於我以前同小M過從甚密，我諗佢好多朋友就算冇見過我都聽過我個名，我估我係佢地班女人圈子入面風評都還好既，所以佢地都放心同我玩，雖然佢地成日都目睹有女跟我走。咁我地熟啲果班都係圍內玩小圈子，有三兩個新人咁，都係Yanis佢地既好朋友。但就係多左呢幾個唔多識飲酒既朋友，反而冇咁好玩，我地熟既就知道大家個底咩料，劈到嘔都冇所謂姐，但新朋友，玩得太串又驚人地唔玩得，劈得太盡又怕佢地唔飲得，我都玩得唔係太盡興，仲有時間周圍望下有冇女溝。
 


神奇既係，新朋友入面原來有一個係小M既表姐，我都係第一次見，但佢地關係應該都唔錯因為一上黎表姐已經認得我，仲話「哦~原來就係你」。我一面黑人問號佢就話冇野啦，搞到我都好奇佢地暗地講我啲咩。表姐好少飲酒既，坐低就猛拉住我問呢樣果樣，又問我同小M點樣，你問我不如問返你表妹啦唉，咁期間都係飲下傾下，至少我係啦，表姐飲幾多我就冇望。
 
點知放個水返黎之後，我見表姐已經貓貓地，好在既係大家都係自己人，冇乜太多想法，表姐一見我返黎又想繼續採訪我，我問佢，你飲好多咩？抖下先再講啦，佢就話佢飲左一杯正常既芝華士綠茶。果Jar野好似係我自己溝既，多茶少酒，糖水咁樣，成台都係熟朋友，更加唔會落藥啦，再加上小M親家姐見到都好似冇乜驚訝，可能都唔係第一次，結論係，佢真係好撚唔飲得。
 
而更顯然既係，冇乜人想理佢發生咩事，大家各有各玩，小M又忙住跑黎跑去，我同表姐就好似兩個路人咁坐埋一邊，見佢好似唔係好習慣醉酒既感覺就同佢落樓下行，飲啖水吹吹風，散一散啲酒。落左樓之後既表姐都醒神返啲，我地坐埋一邊佢又開始問問題，咁好多我都如實咁答佢，始終我對表姐又冇乜想法，作為朋友我又覺得唔使太多隱瞞丫。
就係佢問得興起既同時，我突然feel到我褲袋係咁震，原來我電話唔小心較左靜音，小M已經打左十個電話俾我。
 
「阿言！你帶左我表姐去邊呀？佢乖乖女黎架你唔好亂黎呀下！」
 
「下！佢飲醉左我同佢落樓抖下吹下風姐。使唔使咁睇得起我呀？」


 
我諗，我要收返我係佢地圈子風評還好呢句說話……
 
咁我就同表姐講小M搵我地啦，我地返上去先啦。上到去表姐就同小M家姐一齊係度坐，而我可能啱啱俾人窒完，就去舞池打下獵，難得大家咁睇得起我，唔露返兩手都對唔住大家既期待啦。係舞池攬夠女抽夠水，就返台坐下飲杯野先，補充返啲體力都要，返到埋去表姐都已經走左，保少同我講原來我出去玩果陣佢又飲左杯，又開始攤梳化，結果就由風評最好既大摩被指派送表姐走。
 
而最離奇既係，平時君子劍咁樣既大摩送完表姐走之後就再冇返黎，本身我以為佢嫌悶自己去按個邪骨算，點知第二朝我同保少起身想搵佢食晏果陣，佢就話約左人唔join，再三拷問之下先知佢同表姐食而原因係佢地仲係一齊。兒子生性病母倍感安慰，我同保少相視而笑，得啦，你慢慢嘆，我同保少撐台腳。
 
之後我地每次問起大摩果晚發生咩事佢都顧左右而言他，問佢有冇食到表姐佢又不置可否，而小M同Yanis佢地之後見面都會調侃大摩，雖然我心入面有個答案，但一日本人未証實消息一日都未蓋棺定論。但點都好，見到兄弟西圈開糊都替佢高興既，八番又好雞糊都好，起碼見到佢係開心先，做兄弟既，在心中啦。