【智鬥／校園】 過三爆四俱樂部！ (每日更新): Part II :: 造勢大會

一份份厚重的文件壓在桌上，卻被井然有序地放入各色文件夾，連紙的邊角都沒起一點皺摺。

「我就單刀直入啦，今朝我哋 book 場嘅時候遇到啲意外。」盈盈今天依然絕色可人，卻帶有一絲倦意。我這才想起距離學生會報名只剩下兩個星期，當然每個人都忙於準備了。

都怪昨晚跟誠哥瘋癲太久，竟忘了原來的目的是募集十萬大元。不過最麻煩的資金問題都解決了，還能出甚麼意外呢？

事實是，我真的太天真了。

「相信大家都知道學生會選舉有一個主要活動，就係造勢大會。」她似乎注意到我茫然的樣子，補充道：「即係舉辦一個有各樣表演同遊戲嘅嘉年華。」





「咁麻煩㗎，唔搞得唔得㗎？」誠哥打著呵欠不耐煩地問道。

我也一臉黑人問號：「而且可以咁樣向選民提供娛樂架咩？唔算犯規？」

盈盈優雅地拿起茶杯，道：「造勢大會並非正式競選活動，而係一項不成文嘅規定。只要未正式報名，任何內閣都不受規例約束，只要冇直接要求學生投票，就不會被取消資格。」

她又呷了一口熱茶，續說：「當然，唔搞都唔影響參選。但造勢大會係一年一度嘅大型娛樂盛事，如果唔搞恐怕會令好多人失望，更甚者，會質疑我哋內閣嘅能力。如此負面嘅第一印象，必定不利往後嘅選情。」

「但呢啲都係意料之內嘅事，到底出咗咩問題？」說話的人是哈利仔。他正端坐在鍵盤前
劈裏啪啦地敲鍵盤。





盈盈正要回答的時候，某個渾身酒氣的少女倒在沙發上，打斷道：「啊啊啊……晨咁早講埋啲咁無聊嘅嘢。」她今天穿了一條短得不能再短的熱褲，又圓又挺的屁股上方延伸出一道紋身——應該是一葉輕舟。

「比起呢啲，」Whisky原本埋在沙發裡的臉轉過來，邪笑道：「何解誠仔同嘉敏會一齊返嚟嘅，而且渾身酒氣，一臉倦容。難道昨夜乾柴烈火，情難自禁，買得一支春欲放？」
「冇、冇啲咁嘅事！而且你有咩資格話人成身酒氣！」我揚起眉毛，看著誠哥少有的慌張，竟搶在我之前辯解，內心沉睡的八婆DNA馬上偵測到事有蹺蹊。

「哦，真係無癮。」Whisky自討沒趣轉身便走，但盈盈馬上叫住了她：

「唔好走住！今次呢件事只有你先搞得掂！」