【智鬥／校園】 過三爆四俱樂部！ (每日更新): Part I :: 不知不覺間

不知不覺間我已坐在麻雀檯旁邊，正手忙腳亂地搭橋。

「雖然同你諗嘅有啲出入，但我哋確實係你口中嘅俱樂部。不過直到最近之前都冇咩目的，單純係一班唔鍾意大學文化嘅怪人……一筒！」眼鏡男試探性地瞟了下家的高挑美女一眼。

「不過奇怪喇，我哋冇開到你所講嘅post，究竟係邊個呢……二萬。」她不僅肌膚勝雪，而且完全是模特兒身材，多一分胖少一分瘦。如果我沒記錯，她應該是在拍 UTube 上拍lookbook 片的那個超有名 KOL，在社交網站坐擁數十萬追隨者！

「上啊！盈盈真女神！人善心美！」紋身女笑著對美女說：「但係咁都幾好吖，反正我哋急切需要宣傳人才啊！」

盈盈美眸內光波流轉，又問眼鏡男：「哈利仔你覺得呢？」





「只要佢願意，我冇咩所謂。」他看一看我打出的牌後淡然道。

「不過，」紋身女氣勢如虹，語氣也特別強勢：「你應該有聽過最近學校發生咗咩事？」

我嚥一嚥口水，戰戰兢兢答道：「係咪指學生會因為冇譴責鹽殺蝸牛事件，而被勒令解散？」

「嗯，」紋身女追問：「你有冇諗過呢一切都係陰謀？」

「喂。」哈利仔對她微微搖頭，再碰了她的牌。





「用人不疑，疑人勿用……暗槓。」Whisky 藏起四隻牌，等待著我的回答。

「……我唔明點解學校要咁大反應，好似想搵機會趕盡殺絕。」

「咁你覺得新嘅學生會係咪應該做校方嘅看門犬？」

「再碰！」這次哈利仔拿牌砸檯的力度更大。


Whisky 看一看檯面，揚起眉毛，問：「冇需要咁拆散哂啲牌掛？」





「啱吖，冇需要囉。」

骨碌，我吞一吞口水，二人之間的空氣漸漸變得凝重，搞得我想馬上逃離現場。也許是聽見我內心的吶喊，門外忽然傳來三長兩短的敲門聲。

「我去開門！」我從椅子上彈了起來，雙腿瞬間化為蚊香一般的螺旋圈圈。

身後傳來哈利仔的呼叫：「呃，等等……」但太遲了，我打開了門，映入眼簾的是一個幹練成熟的男人，他身後卻是穿著清涼小背心的性感女生，不知怎的總覺得她好臉熟。

然後，一股噁心的感覺沒來由地自胃裡直湧而上。