《愛在。貴族學園》: Ch 31 ~ 求婚 Part 1

Ch 31 ~ 求婚 Part 1（連載日期：2025/03/01）

喺小息過後，5A班房嘅氣氛其實同小息之前比都冇太大分別，大家都係繼續安靜咁上堂。唯一而且係最大嘅唔同，就係因為今日嘅quiz，會喺午飯時間之前一堂先會進行。

所以大家都表面上好專心聽緊呢堂嘅老師講解，但實際上大家就不停喺櫃桶裏面溫書。

不過，因為俊軒將隻戒指，收埋咗喺櫃桶裏面，變咗俊軒喺櫃桶裏面嘅動作，都唔可以太過大。

不然，聰明過人嘅女朋友韻喬就會發現，然後以韻喬嘅性格，自然就會向俊軒逼供。
 




好在呢幾堂都無驚無險咁過，而且今日嘅quiz都冇話特別難。但無論點都好，大家都好不容易，先可以等到中午放lunch嘅時間可以放鬆。

至於韻喬，佢暫時都冇發現俊軒今日嘅異樣，唯獨因為俊軒仲未就尋晚冇聽電話嘅事，正式同自己道歉，所以韻喬到呢一刻，都仲喺度嬲緊俊軒。

而喺打鐘過後，俊軒就同禮謙、韻喬同天殷四個，一齊去附近嘅餐廳度食飯。
 
雖然都係一個普通嘅日子，但就喺今日行路出去嘅時候，平時好鍾意同禮謙、韻喬佢地傾計嘅俊軒，卻異常地一粒聲都唔出。而且仲同包括韻喬在内嘅其他人，行得離行離勒，但唔使好耐佢地都已經去到餐廳。

至於俊軒今日唔出聲嘅原因，其實係因為除咗要諗住，一陣間點樣送隻戒指畀韻喬之外。





另外一件事，就係俊軒都諗起，林太尋晚同自己講，關於劉家同佳澄嘅事。

所以俊軒今日都嘗試留意一下韻喬嘅外貌，方便自己將韻喬同劉太比對。
 
然而，就喺餐廳度坐低之後，俊軒不停發夢嘅事，終於都畀身邊嘅好朋友發現…

「軒仔呀，做咩你今日嘅表情，好似奇奇怪怪咁嘅？你係咪唔舒服呀？」講出呢句說話嘅，竟然係天殷「定做咩事呀你？係咪頭先嘉惠同學喺小息嘅時候，同你講咗啲嘢，令到你覺得難過或者唔開心啊？」

天殷一邊睇餐牌一邊問俊軒，然後坐喺隔離嘅韻喬，同埋對面禮謙，都即刻望住俊軒。
 




「唔…唔係呀殷殷，我又點會無端端唔舒服呢？」俊軒聽到之後，就即刻掛返起自己嘅招牌笑容出嚟，試圖令大家感到安心；但係試圖支吾以對嘅俊軒，心底裏都好佩服，點解天殷會睇得出，自己真係有嘢唔開心。

不過正因為俊軒呢一下變臉，就引嚟女朋友韻喬嘅不滿啦「係囉可！我都唔知個衰佬囉，尋晚到依家喺度搞咩鬼！尋晚先又喺Singal度話，今日會有嘢畀我！結果我呢，就期待咗成個上晝，到依家都仲係得個吉！哼！你個林俊軒咩都唔識，剩係識得蝦我！」
 
「我唔知你呀！總之本小姐我依家仲未嬲完你呀，你自己一陣間醒定啲呀！哼！」

「唉呀小喬呀，你就唔好話大佬軒住先啦，可能佢真係有準備到surprise畀你呢？而且佢都話到明係surprise，就梗係唔會咁容易畀你知道啦！」禮謙幫俊軒解圍道「好肚餓啊，不如我地叫咗野食先啦！」之後幾個人就order好野食。
 
而喺等食嘅時候，就算韻喬仲未原諒俊軒都好，俊軒同韻喬不時都喺枱底拖住手，喺面上洋溢住幸福嘅氛圍，咁佢地都係因為想同對方好好咁過呢兩個禮拜。

而喺食飯嘅時候，大家都係討論頭先嘅測驗，以及學校最近嘅是非。

當然，身為男朋友同女朋友嘅關係，俊軒同韻喬都好似普通一對情侶咁...

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer