《愛在。貴族學園》: 特別篇 4 ~ 朋友們的新年記 Part 2
特別篇 4 ~ 朋友們的新年記 Part 2（連載日期：2025/02/02）
上到俊軒間房之後，天殷毫不猶疑就直接坐上俊軒張床度，呢個動作，其實由佢地兩個細個嘅時候都已經係咁，直到依家已經中四都冇變過。
然而，就算學校裏面有人知道佢地兩家人好熟都好，就係冇人知道俊軒同天殷會係呢種關係。
俊軒見到天殷問都唔問，就直接坐上去，就話「殷殷，你真係當正呢度係自己屋企咖喎！咁唔客氣都有嘅？」
「咩喎！咁我由細到大，每次上親你間房都係咁咖啦！你係咪嫌棄我先林俊軒？」天殷今次就顯得少少不滿，仲嘟起自己個嘴。
俊軒見到天殷咁樣，就即刻走去天殷旁邊，然後話「殷殷啊，我都點會嫌棄你先得咖？」但係天殷都仲係嘟起個嘴，扮到好似好嬲咁，就唯有繼續氹天殷「細個嘅時候我咪應承過你，我會一直度畀你咁做咖嘛！」
天殷偏偏都要繼續閙俊軒小脾氣「我…點知你喎！自從你上到中學之後，你真係有好好照顧過我咩？我點知你最後係咪可以守到對我嘅諾言喎！」
「我就梗係會啦殷殷！」俊軒依家要做嘅，係安撫一下天殷嘅情緒。
然而天殷都選擇繼續同俊軒“開年”「我同你講啊林俊軒，雖然我地唔可以喺埋一齊，而且就算唔可以畀其他人知道我地呢種關係都好，但係都唔該你喺學校度，都唔好再咁樣成日亂溝女啊！」
「其實我一直都知道，你喺學校裏面嘅目標係邊個，但係人地就係因為怕咗你呢啲性格，所以人地先一直都唔敢同你相處啊！」天殷繼續喺度投訴俊軒風流成性嘅壞性格，搞到俊軒完全駁唔到，但係俊軒又偏偏唔甘心去問天殷。
「殷殷，你係講真咖？」「我呃你做咩啫林俊軒，呢個真係喬喬同我講咖！」天殷即刻反駁俊軒嘅質疑...
「不過呢，我就覺得你都唔好諗太多啦，喬喬佢啊，就算係再好嘅男仔，都會拒絕嘅，所以你就呃…可能真係要下一世先再排隊追喬喬啦下！」
俊軒聽到韻喬可以係咁揀擇嘅時候，一下子覺得同韻喬相處係咁難，更何況如果自己對韻喬動情嘅話，想將韻喬追到手的話，睇怕都會難上加難。然後天殷再打擊一下俊軒話…
「其實呢，喬喬依家對於男女關係，都好似無欲無求咁，一直都係話要讀書行先，話唔定以後喬喬都係同我一樣，一齊住喺一間姑婆屋裏面做老姑婆啦！」
「你咁講會唔會誇張咗少少啊？」俊軒又一次懷疑天殷嘅說話。
「我好認真嘅！」天殷講嘅時候就好似呢句說話咁認真「所以呢，依家你屋企人就知道我地之間有喬喬喺度啦，但係到底我地可唔可以三個人一齊，喺大家父母面前出現呢，就好睇造化啦，林俊軒！」天殷講完嘅時候，都輕拍一下俊軒嘅膊頭。
之後俊軒同天殷都挨喺俊軒床上面，繼續喺度傾計「係喎殷殷，你頭先咪話你好攰嘅？係因為畀你啲姨媽姑姐不停問問題？」
「唉，咪提啦軒仔！」天殷一聽到姨媽姑姐就即刻頭都爆埋。
「基本上佢地乜都問一餐，學校成績嗰啲就唔在講啦，基本上個個都會問啦。跟住呢今年又問埋我咩感情狀況啊，咩有冇男朋友啊、冇就幾時搵男朋友啊，今次仲話啊，咩有男朋友就記得帶上去畀佢睇下喎！」
「真係搞笑，你啲親戚咩料啊？」俊軒聽完之後都感到難以置信「明明拍拖係自己嘅事，都唔明點解要畀佢地睇過先，真係食花生多過咩囉！」
「咪就係，都唔明佢地做咩咖！」天殷都即刻表示認同。
「仲要呢平時都唔見我地，一到新年就問問問，煩死人！」俊軒繼續附和天殷，然後就將話題轉一轉「算啦，都係唔好講佢地啦！話說謙謙有冇搵你拜年啊？」
天殷之後就即刻話「冇啊，我地屋企同佢都唔係好熟咋，佢有上嚟同你拜年咩？」
俊軒對於天殷個答案都好驚奇，於是就話「佢有啊，而且呢兩年都有喎，但係今年就約喺年初四上嚟啊！你要唔要到時候都上嚟見下咁？」不過天殷對於俊軒嘅邀請都唔係太熱衷，於是就直接婉拒對方。
「只不過咁，軒仔，反而有一個人我就等緊佢通知，幾時會上我屋企拜年就真！」
天殷嘅呢一句說話，就搞到俊軒非常感興趣「邊個嚟咖？呢個人我識嘅？」天殷於是就點點頭話「係啊，你識咖，因為係我地學校嘅人囉！」
俊軒就開始諗下到底係邊個，俊軒好快都講過幾個同學嘅名「都話過唔係呢一班人囉！」
天殷已經對俊軒亂咁估表示極度不滿，於是講上一句話嘅時候，已經有一啲小脾氣。
「算啦，都係等我開估啦。我都冇諗過你會估唔到…」
「答案係咩啊殷殷？Sorry 殷殷我真係冇乜頭緒！」俊軒非常抱歉咁同天殷講，但俊軒都估唔到天殷嘅答案居然係...
「係你一直想要電話嗰個啊！4A嘅張韻喬！」
「你話係張韻喬同學！？」俊軒仲要瞪大對眼望向天殷，而天殷即刻點點頭「真係啊，之前幾年其實都有嚟我度逗利是咖，只不過今年仲未定好時間啫。」
“叮”就係喺呢個時候，天殷嘅電話就傳出訊息聲。天殷於是就喺裙袋裏面拎出自己部電話，一望之後就微笑咁對俊軒講「哈哈！就講就到！係喬喬啊！等我睇下喬喬講咩先！」
俊軒聽到之後就即刻話「係小喬？！睇下佢點樣同你講？」
天殷於是就打開韻喬嘅訊息，原來就係問天殷如果年初四上去李家大宅拜會李家會唔會方便。天殷好快就答話轉頭問一問媽媽個schedule。
對於俊軒嚟講，如果可以參加呢個聚會，就固然最好啦，因為有一個機會可以喺學校以外同韻喬相處，自然都可以順便抄埋韻喬牌，就可以完成佢嘅大滿貫偉業。
不過，俊軒好快就諗到，禮謙都會年初四上自己屋企拜年，自然都唔可以去李家大宅同韻喬見面，即刻流露出失望嘅表情。
話到明已經識得好耐，天殷見到俊軒咁嘅樣，就已經知道俊軒想點「真係唔好意思啦，我知道你喺度諗乜嘅，不過，聽講你應承禮謙同學在先，而我就會同喬喬同佢媽媽見面，所以，以後有機會先啦！」
然後天殷都用手點下俊軒個鼻。呢個動作，都係得俊軒同天殷獨處嘅時候先會做，就連兩位嘅父母都唔知道。
「而且我地都有三年同班，大家讀嘅科都係一樣嘅，我覺得如果你真係肯收心養性嘅話，話唔定你真係會有喬喬電話呢？」天殷一邊笑住一邊好溫柔咁同俊軒講，但話風一轉，天殷就嘟住嘴問俊軒一個好似幾嚴重嘅問題…
「如果你到最後真係有喬喬電話嘅話，你仲會唔會唔理我啊？」冇錯，依家天殷嘅眼神，就係水汪汪好似好可憐咁望住俊軒，同時天殷都將自己個頭，挨喺俊軒心口前面。
俊軒知道自己都係時候要安撫天殷，就輕聲同天殷講話「我又點會唔理呢？我地嘅關係唔係因為有邊個喺度，就可以打破到咖！而且，就算你唔鍾意我都好，我都唔會掛住理你個好姐妹而冷落你！」
「你唔記得我地細個勾過手指尾？應承過對方點都好，一定要留喺對方身邊嘛！」俊軒繼續同天殷講返細個互許嘅諾言，天殷都即刻點頭話「我…信你咖林俊軒！」
「不過，殷殷啊！」俊軒嘅不過，自然都引起天殷嘅注意力，同埋戒心。
「做咩啊？你話仲有其他女仔喺度，而且對你有意思？」天殷未等到俊軒講咩，就已經知道俊軒想點，俊軒於是就話「殷殷你真係好聰明，點解你每一次都知道我之後想講咩。」
天殷就好得戚咁話「大佬，我地咩關係啊？你做咩我都知你想點啦！」
「你真係好誇張啊殷殷！」俊軒不得不佩服天殷嘅洞察力，而同時俊軒都決定唔再廢話，直接同天殷講…
「黃氏企業個大小姐，嘉惠啊，聽講好似話對我有意思。」「咩話！」天殷聽到之後有少少激動咁講「林俊軒，點解你依家可以連其他學校嘅人都吸引到咖！？」
但俊軒此時就糾正話「嗱嗱嗱，殷殷，我要澄清返先，唔係我自己主動咩咖！我都係喺早一排見黃家嘅時候，我先知道有呢件事發生。」
天殷都即刻感到非常不惑咁問「下，係嘉惠小姐親自同你講，定係喺人地口中知道先？」
「我自己就見到嘉惠小姐對我好似有心心眼咁，但係自己就冇親口同我講過啦下！」
但喺俊軒講完上一句之後，天殷就喺度哈哈大笑「哈哈哈！心心眼就話鐘意你，你都講得出口咖喎！你不如唔好話全校啲女對你心心眼就係鍾意你好冇？」
俊軒見天殷口氣咁唔友善，都即可忍唔住回應「咁又冇，就算我喺學校有好多女仔圍住我都好，唔通我真係話佢地全部都鍾意我啦喎！？」
「我又唔係呢個意思，只不過我都覺得你修心養性啦！如果唔係我真係怕你會拎唔到電話哦！」天殷都講出一個重點等俊軒注意。
「下？依家都唔係我話鐘意嘉惠小姐，但係都係嘉惠小姐對我奇奇怪怪，加上我爸爸都係喺黃uncle口中得知，話佢個女最近都開始留意我喎！」
俊軒喺講嘅時候，眼神中都流露出一股害怕，始終都好似畀人盯住，甚至可以話畀人跟蹤咁。
「唔係啊嘛，點解你講到嗰啲恐怖情人咁嘅？」天殷聽完俊軒嘅形容都感到難以置信，而且都有少少恐懼。
但係俊軒就話「我都唔知道啊，我自己都係唔會太理呢件事啦。」
但天殷嘅眼神仲有少少不安，俊軒於是都再一次安撫話「冇事啦，最多有update都會同你講啦，好冇？」
「好啦！但係呢軒仔，我有啲嘢想問你！」天殷居然仲有嘢問俊軒。
俊軒點點頭之後天殷就開口問「你…會唔會將我地嘅關係同其他人講，包括你個好兄弟禮謙同學？」
俊軒聽完之後就笑一笑「唔會啦，因為係秘密嘛！咁你呢，會唔會同張韻喬同學講？」
「我都唔會啊，因為我覺得唔需要同其他人交代！」天殷嘅語氣都比較堅定。
俊軒之後之後只係再輕輕一抱天殷，就走去書枱邊同天殷傾下功課，直到譚管家上去俊軒房間，通知天殷準備離開林家大宅。
臨走之前，俊軒都再一次抱住天殷，代表自己無論之後點都好，心裏面都仲有對方喺度。
天殷嘅眼中都滲出少少淚水，去回應俊軒對同自己呢段關係嘅承諾。
「走啦我，放完假返學校見啦！」「嗯嗯！放完假之後見，殷殷！」之後李家就上車離開。
（待續 ~）
IG link https://instagram.com/bear_big_big_writer
Threads https://www.threads.net/@bear_big_big_writer