《愛在。貴族學園》: Ch 27 ~ 第一次約會 Part 3

Ch 27 ~ 第一次約會 Part 3（連載日期：2024/02/23）

「啊……呢度好多書呀…… 點算點算，我唔可以自控啦……小喬！你點知我想嚟呢度咖？同埋點解…你會知道我都鍾意圖書館嘅？邊個話你知咖？」
 
「因為知道你都鍾意睇書，而且我地開始邂逅嘅地方，就係喺圖書館裏面呀嘛！再加上我自己都鍾意打書釘嘅，所以我咪帶你過嚟囉！係咪好有心思呢？」

俊軒聽罷就點點頭「多謝你呀，小喬！」韻喬見到俊軒咁自然都好開心。

「不過你都仲未答我，邊個話你知我鍾意睇書咖？係咪殷殷同你通水咖？」俊軒又繼續追問韻喬，但係韻喬依然都係守口如瓶「我唔話你知，等你心思思！好啦，我地唔好浪費時間啦，上去睇書啦！」





「嗯嗯！」俊軒點頭同意之後，韻喬就同俊軒上去圖書館3樓。

其實頭先喺由IFC坐車去中央圖書館嘅路上，兩口子喺巴士上面都係拖住手咁依靠對方。但喺上到中央圖書館3樓之後，韻喬就試圖鬆開手，去搵自己鍾意嘅書。

但結果又畀俊軒拖得更實，韻喬於是好細聲咁抱怨「（衰人呀！你捨得放開我隻手未呀？你捉到我咁實嘅話，你叫我點去攞書呀？！）」

「（唔得喎，鬼叫我依家拖住嗰個人，係我呢一世最愛嘅人嚟咖！梗係要拖實唔好畀佢走甩咖啦！）」俊軒於是就好細聲咁，喺韻喬耳邊講。

不過，今次俊軒就趁附近冇乜人，順便就喺韻喬耳邊輕輕一吹。





之前完全冇戀愛經驗嘅韻喬，喺受到俊軒如此公然嘅挑逗之後，身體即刻有反應，變得臉紅耳赤，一臉尷尬咁嘟起個嘴話「（嗯…你你你你你你你……個衰人，真係畀你激死呀！帶你嚟睇書咋嘛，邊個畀你喺圖書館度…挑逗我咖？！）」韻喬結果都出咗好大力，先至可以抽出一直被俊軒緊握嘅手。

俊軒見到韻喬嘟起哂個嘴表示不滿之後，先意識到自己頭先好似做得有少少過火咗咁，於是就第一時間向韻喬道歉「（好啦好啦，對唔住啦。唔玩你啦傻豬，快啲去去去去去……搵你嘅書啦！）」

韻喬見到俊軒咁緊張咁同自己道歉，於是都破防，對俊軒回頭一笑話「（哈哈！我都唔係真係嬲你，傻瓜！）」然後就喺俊軒嘅臉上送上一吻「（你都快啲去攞書睇啦，然後我地一陣間就坐嗰張枱啦！）」
 
兩個人將唔貴重嘅野，放喺凳度霸位之後，就各自去攞書睇。

而喺睇書嗰陣，俊軒同韻喬兩個人都繼續甜笑，見到書裏面比較有趣嘅内容，都會同對方互相分享，然後就一齊喺度笑。
 




俊軒愛好嘅書，都係推理、科幻、武俠小說，以及科學類型嘅書。

而至於韻喬，就同時下普通女仔一樣，都係鍾意愛情小說、美容之類嘅書。

不過身為一位學霸，社會、科學、推理類，都係韻喬鍾意嘅類型。
 
大概6點半嘅時候，睇咗兩個鐘頭書嘅韻喬，伸個懶腰之後就望一望表，見應該都差唔多時間要去餐廳攞位，於是就同俊軒講話「（小軒，我地差唔多時間食飯啦，要行過去啦！）」「（好呀女朋友！）」

當然，俊軒見到韻喬咁好嘅身材，都有少少興奮。

而俊軒答好之後，大家都將書放返上書架上面之後，韻喬就帶俊軒離開中央圖書館，去到銅鑼灣某個商場裏面嘅餐廳，準備去食or玩佢地嘅大阪燒。

去到餐廳門口之後，韻喬先見到咁多人「嘩，好在我地有book枱咋！如果唔係都唔知要等到幾時先有位呀！」

「咁都係我女朋友夠聰明啫！」俊軒又喺度氹韻喬開心，搞到韻喬都面紅紅「做咩又喺度讚我呀，你個蠱惑友！一定有問題啦！」





「幾時有喎？」「我話有就有啦！」

（待續 ~）

IG link https://instagram.com/bear_big_big_writer