《愛在。貴族學園》: Ch 25 ~ 開始 Part 6

Ch 25 ~ 開始 Part 6（連載日期：2023/04/28）

韻喬聽到禮謙嘅解釋後，好似仲係好唔高興，於是鄒起眉頭質問佢地「乜……乜嘢“和我一起”啊？依家邊個要同邊個一起啊？仲要咁多地方唔揀，偏偏就要走嚟急症室玩？啱啦！你地係咪發高燒呀？係就快啲去排隊掛號睇醫生啦！」

「喬喬呀！你就真係唔使擔心我地幾個啦哈哈，我地幾個真係冇發燒，唔洗喺度掛號。就係除咗小軒今日真係開口中肚痛之外，所以先要喺度睇醫生！」天殷跟住解釋「反而你呀張韻喬！都唔知你係真唔知道，定係假唔知道啦！」

「咩野我真唔知定假唔知呀？！喂！你地好是但搵一個人，好話我知到底依家發生咩事啦下，唔係之後真係no friend do！！！！」韻喬見自己仲處於下風，而且開始意識到自己今日畀人玩，所以就話想出“大技”去得知真相。

俊軒於是仰天長嘯話「哈哈哈！小喬不愧真係小喬呀，平時喺學業上面聰明絕頂，贏哂包括我在内嘅全級同學。但係今次就居然去到依家，都搞唔清自己想點！真係明白哂咩嘢叫做“聰明反被聰明誤”啦！係咪呀各位？」天殷同禮謙都即刻點頭同意。





「嗱小喬，我地都係實不相暪啦，今次我地呢個計劃，咪就係要你同小軒“一起”囉！以小喬你平日嘅聰明才智，你冇理由到呢一刻，都可以唔知發生緊咩事掛？咁樣完全唔似平時嘅你喎！」禮謙再補充咁講。

韻喬聽到之後恍然大悟，而且再一次瞪大對眼，好嬲咁話「喂！你地究竟喺度玩乜嘢呀？！我都冇話過鍾意林俊軒！而且，你地畀個理由我啦，點解我一定要鍾意佢先咖？」

面對呢個情況，俊軒唯有開始引導韻喬，嘗試由自己身上搵出答案「張韻喬，我就係想你自己講！不如你就話畀我知呀！你對我……有冇曾經有過一刻嘅心動？」
 
「啊唔係，應該話一秒，一秒都好，到底有定冇？」

「心動？到底係咩意思啊？我唔係太明你……」此時韻喬嘅表情已經由憤怒轉為疑惑。





俊軒見到韻喬一臉疑惑，之後都deadair咗幾秒，喺組織咗自己思路之後，就好溫柔咁對韻喬話「點講呢？啊！就係，你有冇試過為咗我，又或者見到我而突然心跳加速？而且成個身體，都好似着咗火咁熱？」
 
「又或者，你又有冇試過我嘅面孔，會無啦啦咁出現喺你嘅腦海裏面，然後你就會自己喺度傻笑？」

韻喬聽到呢度之後，居然點點頭認同俊軒，然後完全冇再出聲，忽然之間塊面就比頭先更加紅。
 
「我再問多你少少啦，喺你心目中，我又有冇試過，畀到你有好大嘅安全感？又或者，我又有冇試過，喺你嘅夢境入面出現過？而且仲要唔止一次？」俊軒又再繼續講落去。

韻喬聽完之後，就即刻諗返起喺呢幾個禮拜裏面，發生喺自己身上同夢境裏面嘅奇怪事，然後就不停咁點點頭表示同意之餘，而塊面就再紅多一度「全……全部都有啊！不過呢啲夢境、感覺，又有咩象徵意義呢？會唔會只不過係一啲普通生理反應嚟咋？」





天殷聽到之後撲哧一笑「唉呀喬喬呀，一個女仔無厘頭又點會對一個男仔覺得有安全感，或者夜晚訓教或者日頭發夢嘅時候會突然之間出現，又或者突然之間身體會好似着火咁先得咖？你呢啲叫十月芥菜，又或者發春夢囉好冇！？」
 
韻喬聽到十月芥菜之後，就用雙手遮住自己早已紅過蘋果嘅面「喂呀，咩十月芥菜發春夢呀，你講嘢唔好再核突啲好冇呀李天殷！」

聽到韻喬咁樣同天殷抗議，俊軒同禮謙聽到之後都喺度笑。
 
「我唔係核突呀，我都係講事實咋張韻喬！」天殷一臉正經咁喺度否認...

（待續 ~）

IG link https://instagram.com/bear_big_big_writer