《愛在。貴族學園》: Ch 25 ~ 開始 Part 4

Ch 25 ~ 開始 Part 4（連載日期：2023/04/21）

林俊軒於是就好大聲咁講「前面嘅張韻喬小姐！唔知你可唔可以話我知，你依家到底喺度搵緊啲咩呢？」

韻喬聽到後面有人叫自己之後，就成個人停咗喺度，然後嘗試搵出聲音嘅來源。

雖然自己認出係俊軒叫自己，但偏偏就係搵唔到俊軒，於是好激動咁講「小軒！係小軒把聲呀！！小軒你喺邊呀？你快啲出嚟啦小軒！你唔好嚇我呀嗚嗚嗚！」然後又再一次喊得好大聲。

當然呢一切，都畀喺其他地方部署嘅天殷同禮謙聽到啦，因為俊軒個耳機，一直都同天殷佢地connect緊。而佢地兩個都一邊食花生，一邊喺耳機裏面鼓勵俊軒。
 




眼見聰明嘅韻喬，不停左望右望搵自己，俊軒就掩住半邊嘴偷笑，頓時覺得對方依家好蠢。不過，俊軒見已經胡鬧夠，時機都成熟，於是自己就行出走廊中間，開口同韻喬講...

「傻妹，我喺呢邊呀！搵咁耐都搵唔到咖！」

韻喬聽到之後擰轉身，就見到自己一直擔心嘅俊軒，冇穿冇爛咁出現喺自己面前。韻喬先係覺得奇怪，然後就掩住自己個嘴話「小軒！！係咪你呀小軒？」

「係呀，係我呀！張韻喬你個傻妹！」
 
韻喬確認之後，就即刻向住俊軒嘅方向跑，直接撲入俊軒嘅懷抱裡面，放聲大哭。





就係呢個時候，上次嗰種安全感，再一次喺韻喬心中出現，於是韻喬過咗好耐都唔肯放手，一直咁抱住俊軒。
 
呢種安全感，其實就係上幾個星期五，喺郭氏嘅 anniversary party上面，韻喬已經親身感覺到過。

而到咗依家，韻喬見到俊軒表面上完全冇事，能夠將對方畀自己緊緊抱住，就覺得好安心，完全唔想再放開俊軒一樣。

而俊軒為咗好好咁安慰喊到梨花帶雨嘅韻喬，於是輕輕咁抱住對方，再親吻對方嘅前額。呢個動作，佢地一直維持咗接近兩分鐘，韻喬先願意輕輕咁放開放開。

「小軒！見到你冇事就好啦嗚嗚！你….你到底出咗咩事，要嚟呢度睇醫生呀？」韻喬繼續喊，但係韻喬都已經有少少脾氣。





呢個咁甜蜜嘅情景，自然都引起醫院工作人員，以及其他病人嘅注意。俊軒最後都忍唔住，將韻喬帶到去靠近牆壁嘅地方，然後先至開口話...

「傻妹，呢度醫院嚟咖！你就唔好喊到咁大聲啦，嚇親其他人呀！」
 
俊軒於是用紙巾幫韻喬擦去眼淚，而韻喬喺點頭之後都開始慢慢收聲「小喬乖啊。不過，頭先喺我去洗手間嗰陣，我就聽到你好大聲咁叫我個名喎，做咩呀？你好擔心我啊？」俊軒好親切咁問韻喬。

韻喬聽到俊軒咁講自然紅都面哂，但同時都鼓起泡腮、大法雷霆咁質問對方「你個死人頭林俊軒！！依家邊…邊個咁得閒要擔心你啊！？你依家冇穿冇爛就得啦！李天殷頭先仲要喺電話度講到咁大單，早知我去擔心禮謙好過！你地兩個冇良心冇良心冇良心呀，夾埋喺度呃我！」講完之後韻喬仲連續打咗俊軒手臂幾下。

不過，俊軒當然心甘情願畀韻喬打啦，而且仲面不改容咁有得韻喬發泄。之後俊軒仲笑起嚟。

「你個衰人喺度笑咩呀？！快啲講呀！到底你個有錢仔發生咩事要走嚟瑪麗醫院睇醫生呀？」韻喬繼續好不滿咁喺度問。
 
「冇呀，因為今朝出門口之後，見個胃有少少唔舒服，仲開始狂肚瀉，但係平時睇開個醫生今日又冇開門，於是咪過嚟瑪麗睇急症囉，而且仲等緊見醫生呀！做咩啊小喬喬，你仲好擔心我呀？」俊軒非常得戚咁講。
 
「你同我節省少少啦！哼！我先唔擔心你呀，你同天殷兩個冇良心喺度呃我！你呀最多咪腸胃炎，抖兩日自然冇事咖啦！」韻喬一邊繼續抗議但同時都繼續問「仲有呀，禮謙唔係都出事咖咩？依家要擔心都係擔心佢先啦，點解我仲要擔心你啊？！衰人衰人衰人！！」





俊軒於是再喺韻喬耳邊，好溫柔同細聲咁講...

（待續 ~）

IG link https://instagram.com/bear_big_big_writer