《愛在。貴族學園》: Ch 24 ~ 心碎 Part 10

Ch 24 ~ 心碎 Part 10（連載日期：2023/03/21）

「希望韻喬到最後，真係可以面對自己對小軒你越來越濃烈嘅情感，唔會浪費我地一番心血啦。不過林俊軒，唔該你到時……」
 
「自己醒目執生呀嘛哈哈！我諗以我嘅聰明才智，呢個問題都應該唔大啦。放心啦兩位好朋友，我為咗可以令到小喬肯面對自己嘅情感，而努力咁做好同改變自己咁耐，一定唔可以畀自己喺最後最後埋門一腳先嚟撻Q咖！」俊軒非常有決心咁講。
 
「哈哈，我就聽住先啦！林俊軒，你最好同我醒醒定定，記得我之前同你講過嘅說話！如果唔係嘅話，就算係兄弟都冇情講呀，知道未呀？」平日非常恭敬嘅禮謙，都非常少有咁要求俊軒，應承自己啲嘢。

畢竟喺呢件事上面，禮謙都叫為咗成全俊軒同韻喬，放棄咗自己嘅幸福。





「得啦長氣鬼！你呀，就留番啖氣練你嘅100米好過啦！因住比賽嘅時候畀人由頭帶到尾呀！」俊軒非常不屑咁講，令禮謙差少少就想黑面，同一時間佢地叫嘅食物都送到大家面前。
 
「哈！居然喺度話謙謙長氣，依家都唔知依家邊個話想喺陸運會度，特登報啲冷門項目，然後可以攞獎牌氹女呢可？」天殷反駁返俊軒轉頭，搞到俊軒就冇佢好氣，完全駁唔到，然後就好專心嘅食嘢。

但係，喺差唔多食完嘅時候，禮謙突然再一次提起嘉惠「係喎，自從考試之前，嘉惠同學畀學校記咗個小過，同埋罰留堂之後，點解佢最近好似冇哂聲氣咁嘅？」

天殷聽到之後就話「謙謙呀，話就話嘉惠接受咗學校嘅處分啫。但係以我所知，佢一直以嚟都好唔服氣，而且仲要想繼續報復軒仔同喬喬添呀！」

「咩話？！畀人罰得咁重都仲想繼續報復？！」俊軒聽完之後反應好大「不過殷殷呀，你點知嘉惠想點咖？」





「你真係當我李天殷傻咖？！我梗係有線人咖啦！」天殷對住俊軒反白眼講。

「呢位線人，咪就係方文曦同學囉！」天殷飲完一啖茶之後就話「其實自從調位之後，嘉惠就開始同文曦混熟，而且仲想搵文曦幫手，幫嘉惠拆散你地兩個…」俊軒同禮謙聽到之後，自然都非常愕然

「果然真係最毒婦人心呀！」禮謙總結咗一句。

但係禮謙講完之後，天殷就提出反對道「咩呀！就我同喬喬係例外呀！你就……就毒呀程禮謙！」

「哈哈，你同小喬點會毒呢？呢層我地當然知道啦！」俊軒即刻幫禮謙補飛道「算你聰明啦軒仔！」





「謙謙呀！你呀……唔準再亂講嘢呀！如果唔係……我會嬲咖！」天殷面紅紅又扮哂嬲咁喺度講，而禮謙都終於知道錯，所以都即刻同天殷道歉「對唔住呀殷殷，一定唔會再有下次！」

「你……係應承到我先好喎！」天殷再一次非常緊張咁講。再坐多一陣之後，三家嘅座駕都開到香港仔某個商場度，準備接佢地嘅少爺同大小姐走。

「好啦，我一陣仲約咗小喬練習呀！我地聽日再見啦！」天殷再一次講。

「嗯嗯！聽日見！」三個人之後各自上車散去。其實俊軒同禮謙喺下晝，都唔係話完全唔得閒，只不過係天殷話，想等韻喬喺唔見到俊軒之後，等佢對俊軒心掛掛，去激發韻喬對俊軒嘅思念之情。
 
而天殷喺上車之後，就即刻打電話搵韻喬，睇下對方出門口未，最後都有按照約定嘅時間，去到灣仔運動場搵韻喬練習。

除咗頭先所講嘅之外，因為陸運會都就快到嘅關係，天殷為咗唔想韻喬，懷疑自己私底下約其他人搞其他嘢，所以明知自己都有少少攰都好，都堅持下晝去練習。

（待續 ~）

IG link https://instagram.com/bear_big_big_writer