《愛在。貴族學園》: Ch 21 ~ 一巴掌 Part 8
Ch 21 ~ 一巴掌 Part 8（連載日期：2022/12/02）
喺返到5A班房之後，衆人又開始一日嘅學習生活，就連加入學校幾日就搞出唔少大事嘅嘉惠，都好專心咁上堂聽書，而且冇再講呢幾日發生嘅事。
至於俊軒，佢喺上堂嘅時候，就耐唔耐會偷望遠處嘅韻喬，一來擔心坐喺後面嘅黃嘉惠，又突然之間會對韻喬做啲咩出格行為。但更重要嘅，就係俊軒當然都掛住自己個“女朋友”嘛，自然上堂就冇之前咁專心啦。
而喺轉堂時間之前嘅20分鐘，俊軒喺之前用嚟籌劃“綁架”韻喬去林家大宅見家長個signal個群度，搵天殷同禮謙，準備商討應對嘉惠嘅下一步嘅對策……
「5A林俊軒：喂兩位，你覺得我一陣間小息，應唔應該去同Ms張講，嘉惠蝦小喬嘅事呢？ 09:41」
「5A林俊軒：定係你地想放學先講，或者有其他建議？ 09:41」雖然依家上緊英文堂，但係禮謙同天殷都好快就睇message……
「5A程禮謙：我覺得係一定要同Ms張講，畢竟嘉惠同學咁樣打人係犯咗校規，按道理要接受處罰都係天經地義 09:42」
天殷好快都答俊軒，完全無理到旁邊嘅韻喬，可能會因為見到自己玩電話，而喺小息嘅時候教訓自己…
「5A李天殷：正常都應該要嘅。不過，嘉惠佢話哂都叫做新同學，可能Ms張會以嘉惠未熟校規為理由，放鬆手處理呢件事呢？ 09:43」
「5A林俊軒：但如果係用新同學唔熟校規就理由而放鬆處理，唔通嘉惠咁就可以免受處分？我覺得咁樣對小喬好唔公平喎！ 09:44」
「5A林俊軒：而且，唔可以喺學校打人呢條咁basic嘅校規，唔係應該間間學校都有咖咩？唔通嘉惠以前間學校就可以打人啦喎！？ 09:45」
「5A程禮謙：呢個就係我嘅意思呀小軒。不過我有一樣嘢會擔心，就係到時候如果Ms張問起，點解嘉惠同學會打小喬同學嘅話，你會點樣答先？ 09:45」
「5A李天殷：其實我都唔知點講呀謙謙，始終……party部分嘅事，畢竟都唔係學校入面發生，Ms張同訓導組都可以大條道理話唔會處理 09:45」
「5A李天殷：但今日嘉惠打人嘅事，偏偏就係同party有關。 09:46」
「5A李天殷：不過，如果要證明嘉惠同學佢，的確係因為出於妒忌心而打小喬嘅話，我地就一定要講哂所有嘢，包括你同小喬所謂“拍拖”嘅事畀Ms張知道。雖然俊軒真係追緊小喬，不過事實係未追到手呢……嘿嘿嘿 09:46」天殷將一大段說話斬開send。
但係禮謙都好快就得到答案…
「5A程禮謙：既然我地暫時都唔知點講，不如我地都再諗下點present，搞掂先上去staff room啦？而且，我覺得我地應該等放學之後，我地幾個先再帶埋當事人去同Ms張講？ 09:48」
「5A李天殷：我覺得都可以呀，一係咁啦，一陣轉堂嘅時候，你就同Ms張講定話，放學之後有事搵佢，你就睇下Ms張得唔得閒囉！ 09:49」
俊軒好快就考慮好天殷同禮謙嘅建議「5A林俊軒：就咁決定啦！為咗小喬啖氣，今次我地一定要做得好好睇睇！ 09:50」
「5A程禮謙：一齊加油！！ 09:51」
「5A李天殷：一齊加油！！ 09:51」
過多差唔多十分鐘之後，落堂鐘聲就響起，於是喺Ms張執好嘢離開班房之前，俊軒就急步走向Ms張，好誠懇咁問「Ms張，我想請問你今日放學之後，會唔會有空閒時間？我有少少事想放學之後同你傾。」
Ms張聽到之後好愕然，然後就答返俊軒「咩事呀林俊軒同學？放學之後……我應該得閒嘅，不過，我想問下係關於咩事嘅？」而遠處嘅韻喬，就冇為意俊軒喺度做咩，只係留喺自己位度繼續睇書。
「其實Ms張……呃，係關於新到嘅黃嘉惠同學嘅。不過我覺得喺咁多人面前講嘅話，我怕唔會太方便，而且我都怕打搞Ms張你嘅休息時間。所以我就想喺放學之後，先同張韻喬、李天殷同程禮謙同學，先一齊去搵你講呢件事…」俊軒講出咁做嘅理由。
不過，聽完俊軒咁樣講，Ms張嘅表情就變得非常疑惑「咦，關於黃同學啊？咁等我諗下先……今日放學……我記得唔使開會，我應該可以嘅。咁好啦，你地幾個放學之後，就過嚟staff room搵我啦！」Ms張答應道，然後就準備返去教員室。
「知道，多謝Ms張！」俊軒鞠躬感謝之後就返去自己位，然後就即刻通知天殷同禮謙。當然，天殷都趁住小息嘅時候，喺出面同韻喬講呢件事，而韻喬都應承天殷放學之後一齊去見Ms張。
（待續 ~）
IG link https://instagram.com/bear_big_big_writer