《愛在。貴族學園》: Ch 18 ~ 鬧翻 Part 13

Ch 18 ~ 鬧翻 Part 13（連載日期：2022/09/16）

「林俊軒！你好過分好大膽呀下！！你居然夠膽喺咁多人面前，拒絕我黃家大小姐嘅要求？！」爭唔過韻喬嘅嘉惠，聽到俊軒嘅當然勃然大怒，塊面基本上黑過包青天。

但係韻喬都用非常唔友善嘅眼神望實嘉惠，因為韻喬自己都知道，依家唔係示弱嘅時候。
 
「我話畀你知呀林俊軒，仲有張韻喬你個死窮鬼！我只要喺屋企講兩句求一求我父母，佢地就可以畀你同我結婚，仲可以令張韻喬呢個賤人，同生佢出嚟獻世嘅貧賤家庭，徹底咁喺香港消失呀！！」

嘉惠繼續用好激動嘅語調，同俊軒佢地一行人講野。





不過，因為嘉惠實在叫得太大聲嘅關係，於是令到附近嘅賓客都望咗過嚟，睇下到底呢個女仔發生咩事。當然大家都令到場面非常尷尬。

面對咁嘅情況，大家都會覺得嘉惠實在太過分，而且都唔尊重場合。所以首先出聲嘅，係韻喬好姐妹，天殷……

「黃嘉惠同學！麻煩你就算你唔尊重自己同你父母都算，你都都尊重一下人地同場合啦！咩叫令呢個賤人同生佢出嚟獻世嘅貧賤家庭，喺香港徹底消失呀？」
 
「而且你咁講係咩意思？你憑咩要人地消失呀？有錢大哂呀依家？！定你想公然喺度搞歧視？定其實你想將喺學校發生嘅事，夾硬拎出離講，然後等大家今晚喺度出醜？」天殷平時喺外面同學校都好有禮貌，絕少會好似依家咁惡同其他人講嘢，所以都嚇一嚇到身邊嘅韻喬。
 
「黃嘉惠同學，我同你講清楚，如果你再喺度搞事嘅話，我會考慮通知保安處理！而且大家話哂都係一場同學，如果今晚嘅事傳到返學校嘅話，到時候大家都唔好落台呀。」禮謙都走出離指責嘉惠不是。
 




面對呢個極之尷尬嘅情況，韻喬由原先非常嬲，到天殷、禮謙先後為咗自己挺身而出，而變得好想喊。但韻喬又為咗唔想失禮主人家、林家家人同埋自己……於是好快就講左一句…
 
「咁多位，我都係失陪一下先，我想去一去洗手間，唔好意思！」講完之後，韻喬就自己一個唔再擰轉面，用右手掩住自己個嘴，然後急步咁跑向會場大門，直奔外面洗手間嘅方向。

而因為當時大家都係準備入去跳舞，照計都唔會有人喺呢個時間離開會場，再加上韻喬嘅表情非常尷尬，所以都有唔少賓客望住韻喬跑出會場，然後都議論紛紛到底依家發生咩事。

不過奇怪就係，班大人居然都冇趕到現場處理，只係繼續傾佢地嘅生意。

嘉惠嘅出格行為，成功咁引起在場嘅注意力。但韻喬嘅一衆好朋友，都即刻睥住嘉惠，因為不值其所為。





所以同頭先一樣，首先發炮嘅，都係韻喬嘅死黨天殷「黃嘉惠同學！你實在太過分啦！你居然將我地嘅好朋友兼同班同學鬧走？都唔知點解你可以咁不知廉恥！喬喬！等埋我呀！」
 
講完之後，天殷就跑去追住韻喬。同時一衆喺度繼續食花生嘅賓客，都開始改為望向嘉惠、俊軒同禮謙。

而部分其他都有在場嘅5A同學，都趕到去俊軒佢地面前，但係佢地好快都知道嘉惠喺度搞事。

嘉惠直到呢個時候，依然覺得自己冇做錯到，就算已經引來嘅賓客甚至主人家工作人員嘅注意都好，佢自己都唔認為咁做係咩一回事，並且反駁俊軒同禮謙嘅指控話...

「點呀？依家就兩個人走咗去咋嘛，然後你地一堆人望過嚟做咩啫？而且都係啦，張韻喬只不過係一個普通人咋嘛！都唔知點解你地係都要護住一個普通人囉！！」

（待續 ~）

IG link https://instagram.com/bear_big_big_writer