《愛在。貴族學園》: Ch 18 ~ 鬧翻 Part 5

Ch 18 ~ 鬧翻 Part 5（連載日期：2022/08/22）

(連載一周年，送畀自己嘅生日禮物，多謝大家過去一年嘅支持）

「咦小軒、小喬，你地到啦？」同佢地兩個講野嘅，係林太「Auntie你好！」「係啊，媽子！」韻喬同俊軒都先向林太打招呼。

「媽媽，我上去換衫先，小喬你喺度等我一陣啦！」韻喬點點頭之後，俊軒就返上自己間房，然後大廳裏面得返林太同韻喬喺度。
 
「小喬，今日你着得好靚喎，唔知套衫係咪小軒幫你揀嘅？」林太見到韻喬情緒好緊張咁，於是就想打開下話題，但結果就……
 




「eh auntie……其實我都係試咗幾件裙咁，然後就自拍畀小軒揀，最後佢覺得呢套衫着得最好睇，而且又顯得大方，所以我咪揀咗呢條裙！」韻喬今次都為俊軒講咗個大話，但其實俊軒頭先都係喺張家，先第一次見到韻喬呢件衫。
 
「哦！咁小喬你嘅fashion sense其實都唔錯喎！我諗如果有你喺度嘅話，我地以後就唔需要擔心小軒會亂着衫哈哈！」林太喺度同韻喬講笑，而韻喬都因此有多一樣嘢可以嘲笑俊軒。
 
「哈哈auntie你真係過獎啦！其實我揀衫都只係一般，唔係話好叻咖咋，可能今晚可以揀到呢件衫我都真係好彩啦……」韻喬好靦腆咁笑去回應林太，但心裏面都唔太想林太知道，今晚又係同天殷借裙。
 
「係啦小喬，唔知道…你依家身體好返未呢？因為我都有聽小軒講，之前嗰一個星期，你因為發高燒肺炎而入咗幾日醫院，而且佢都同李家小姐佢地，都有去醫院陪咗你幾日…」林太一臉關心咁，問候韻喬身體情況。
 
韻喬聽到之後都覺得好窩心，雖然對方唔係自己真正嘅未來奶奶都好，但係都感受到林太對自己嘅接納同愛「我好返哂咖啦，多謝auntie你嘅關心，不過我到依家都仲有食緊出院藥。」
 




「咁樣都幾好呀小喬！anyway auntie都祝你早日完全康復，而且我見小軒呢幾日，都咁用心照顧你，我個心都安樂啲，而且證明佢開始長大，有對你地之間嘅感情認真。」林太一邊set頭一邊道。
 
「係啦，小喬呀，今晚可能好夜先會有飯食，你要唔要飲杯茶，再食兩件蛋糕打個底先？因為我都怕你會餓到。而啲蛋糕，頭先我去IFC嗰間Lady M買，我地可以一齊share食。」
 
「嗯…可以呀，不過都要多謝auntie先！」「唔使客氣，隨便揀兩件享用啦！」同時間林家嘅另一位管家，就沖咗杯英式紅茶，然後再分咗兩件蛋糕畀韻喬。
 
食過Lady M蛋糕嘅讀者，都應該知道呢間鋪頭以千層蛋糕為主打，價錢一個slice都要70-80蚊。但對於林家嚟講，食文華餅房出嘅蛋糕都唔會覺得貴。
 
「張小姐請你慢用！」管家同韻喬講「唔該你！」韻喬於是就開始喺度享用眼前嘅蛋糕「蛋糕好好食呀！多謝auntie！」
 




「乖啦，而且小喬鍾意食就好啦。呀，時間都唔早啦，我上房換衫先，失陪先啦小喬，你慢慢食啦，記得同小軒講啲蛋糕都有預埋佢喎！」

「知道啦auntie！」林太講完之後就離開大廳，而韻喬就專心一邊享用蛋糕，一邊等候俊軒換好衫，順便都影咗幾張蛋糕同自己嘅相。
 
就喺韻喬差唔多食完嘅時候「韻喬？你件蛋糕好食嘛？」韻喬一聽到係俊軒把聲之後，就即刻擰轉頭望向樓梯嘅方向，微笑道「小軒你…落嚟啦？件蛋糕好好食呀，你要唔要過嚟一齊食呀？」

「好呀！我依家落嚟啦！」俊軒於是就慢慢步入大廳，然後就走到韻喬面前，好誠懇同溫柔咁問對方「小喬，你覺得我套衫好唔好睇呀？我係認真問！」

（待續 ~）

IG link https://instagram.com/bear_big_big_writer