《愛在。貴族學園》: Ch 18 ~ 鬧翻 Part 2

Ch 18 ~ 鬧翻 Part 2（連載日期：2022/08/13）

喺座駕閂好門之後，俊軒就同司機講「司機，麻煩你先開去張小姐嘅屋企樓下先，喺北角渣華道，你之前去過一兩次，都應該識路咖可？唔該！」

「知道，二少爺！我知道點去！」然後司機就將座駕開離學校。
 
「唔該司機！」韻喬都好有禮貌咁向司機道謝，然後就同身邊嘅俊軒講「小軒呀，你想一陣間，我去到你屋企先一次過換衫同上妝呀，定係你想我喺我屋企換咗今晚套衫先，然後先再去你屋企上妝呀？」韻喬好溫柔咁問問“男朋友”意見。
 
相對於之前嘅時候，韻喬依家對於扮俊軒嘅男朋友，都已經做得比較自然，而且都冇之前咁被動同抗拒。相當大嘅原因，都係怕林家嘅司機會同林太報寸。





俊軒喺諗一諗之後就話「嗯，我諗我今晚套衫，就應該準備好咖啦，如果要換都可以好快手搞掂。咁不如就…你就喺你屋企換埋今晚套衫，先再去我屋企化妝囉。而且，我之所以今日叫你坐我地車返你屋企，都係怕會塞車姐，你都知啦，尋日放學嘅時候……」
 
一講起尋日放學搭巴士嗰陣，俊軒同禮謙兩個少爺仔，不停咁喺自己面前嗌生嗌死嘅情景，韻喬就非常不滿咁喺度抱怨...

「你個死人頭！你唔講由自可，一講就把幾火呀！你地呀！兩個就真係冇鬼用呀！都係企一陣巴士啫，就已經喺度嗌哂救命咁！都唔知你地兩個係咪男人嚟咖！？」
 
「喂呀搞錯呀！張韻喬你又拎依個出嚟講！明明就係你冇話過會塞車！我地點知道會搞咁耐喎！？」俊軒聽到韻喬話自己冇用，就喺韻喬面前抗議。

「咁都係呀！企一陣就嘈嘈嘈！而且塞車呢啲嘢我點知咖啫，咪當你地兩個唔好彩囉！」
 




「仲有呀！你唔好以為我依家肯同你講嘢就好得戚呀！我仲未嬲完你兩個呀！」除咗搭巴士嘅事之外，韻喬都再一次提到尋日嘅另一件事，就係俊軒同禮謙為自己而嘈交嘅事。俊軒聽到韻喬咁講，就即刻同韻喬道歉…

「對唔住啦小喬，尋日都係我唔好，唔應該為咗自己而去傷害你，以後我都會注意咖啦，希望小喬你可以原諒我啦！」

「好啦好啦，算啦，今日唔同你計……」韻喬今次居然咁大方，咁快就原諒俊軒，但係……

「小軒呀，今日新嚟嗰個黃嘉惠，真係真係好乞人憎呀！」韻喬話鋒一轉，就去到新同學嘉惠身上「唉，今晚仲要喺個會場對住佢，小妹我其實真係接受唔到囉！」韻喬講嘅時候仲要反埋白眼，可想而知韻喬到底有幾嬲。
 
「其實好坦白啦小喬，我都唔係咁鍾意佢對你嘅態度。嘉惠佢，恃住自己係全班最有錢嘅同學，就走去歧視我女朋友，仲搬埋我父母出嚟攻擊你，真係太過分啦！」俊軒和應韻喬。





不過，當韻喬聽到俊軒稱呼自己做“女朋友”叫得咁順口，唔知點解喺心入面，就有種急速跳動嘅感覺。
 
但問題係，就算俊軒知道要點樣氹返韻喬都好，韻喬依然都仲係好唔開心，繼續同俊軒講「喂呀！我真心唔明白黃同學嗰啲係咩思想囉！玩種族隔離呀？！而且我更加唔明嘅就係，點解學校會收呢種人入嚟讀書咖？！」
 
「冇辦法啦，鬼叫黃家有錢咩！所以咪收！」「你話……嗰個嘉惠屋企係好有錢咖？」俊軒不經意嘅一句黃家有錢，就引起韻喬非常好奇咁問。

不過喺韻喬咁樣問一問之後，俊軒先發現自己講咗啲唔係太應該講嘅嘢出去「小軒你做咩呀？係咪我又有故仔可以聽呀？」
 
「算啦，本來就唔應該講嘅，但係我都洗濕咗個頭囉，而且我都費事要你估估下，所以我都係講埋落去啦…」俊軒勢色唔對咁望向韻喬，然後再講...

「黃家呢，就肯定比我屋企有錢咖啦，但多幾多就……我爸同我媽呢就冇同我講過，不過保守估計起碼都有我地20倍以上有多！」

「如果要將黃家，要同天殷嘅李家，或者禮謙嘅程家比嘅話，佢地屋企相對就更加有錢，所以黃家用錢收買學校而入到嚟嘅話，咁我就更加唔會覺得奇怪。」俊軒神色認真咁繼續同韻喬講。

「當然，我諗都以相同嘅理由，嘉惠佢今日先夠膽喺學校裏面搞事，甚至同你作對啦。」




 
「原來係咁，嘩！真係誇張呀！果然喺學校有錢就真係大哂，呢啲套路真係黑暗到爆！」韻喬聽完之後就搖頭嘆息…

「不過小軒呀，今日小息你行開咗之後，你同嘉惠去過邊？而且做過啲咩嚟呀？」

（待續 ~）

IG link https://instagram.com/bear_big_big_writer