《愛在。貴族學園》: Ch 16 ~ 麻煩的一天 Part 20

Ch 16 ~ 麻煩的一天 Part 20（連載日期：2022/06/27）

佢地試咗大概個半鐘左右，「咯咯」門外面傳來敲門聲音，天殷於是都好快應門「係！」

「兩位小姐，我地都差唔多夠鐘食飯啦！」蕭管家對天殷講。

「知道啦蕭管家，我地一陣就會落去，唔該你！喬喬呀！我地換返衫落去食飯先啦！」

「嗯！知道！」於是佢地就開始換返原本嘅衫準備食飯。
 




佢地兩個搞掂之後就一齊行落飯廳，而李生李太都已經坐咗喺度等天殷同韻喬到飯廳。

「Uncle, Auntie你好！」韻喬喺坐低咗之後，就先同佢地打招呼。
 
「小喬你好呀！」李太微笑咁同韻喬打返招呼，而李太都第一時間，關心韻喬嘅健康情況「我聽天殷講，話你尋晚先至出院？之前嘅肺炎已經好返哂啦？」
 
「係啊Auntie，但係我依家都仲要繼續食藥，多謝auntie你嘅關心先…」韻喬好有禮貌咁道謝李太嘅問候，同時都交代返自己情況「當然啦，我都要多謝天殷佢，呢段時間咁出力幫手照顧我，同埋都因為有你地煲嘅湯，我先會好得咁快。」
 
「可以咁快好返就好啦韻喬，不過韻喬你都真係要學識好好咁照顧自己，呢幾日女女佢一直都好擔心你嘅情況，食飯都食得唔安樂…」李生此時都插嘴道，而天殷都點頭表示同意。但最令韻喬介懷嘅，就係依家連李家嘅人都知道，自己唔識照顧自己。
 




「呃,其實麻煩到幾個朋友，要日日放學去醫院睇住我，我就真係過意唔去咖。所以我都覺得，我真係要學識照顧好自己，唔可以再做高分低能，哈哈！」大家聽到韻喬咁講都哈哈大笑。

「不過，我都真係真係要多謝殷殷，呢幾日真係出盡全力去照顧我咁滯，又幫我拎衣物呀、文具呀，仲要喺我吊鹽水嘅時候抹身。所以多謝你呀，殷殷！」韻喬咁樣講，就氹到身邊嘅天殷好開心。

「唔好客氣啦喬喬，大家一場好姐妹。好啦，不如我地都食飯啦，好嗎？爸爸媽媽！」李生之後就點點頭，然之後就開始食飯。
 
雖然李家都係好有錢嘅人家，但今晚晚飯其實都係普通嘅家常菜，完全唔似之前林家“見家長”嗰晚咁誇張。

「好食嘛，小喬？」天殷一邊夾菜一邊問韻喬，而韻喬都點頭話「好味道呀，殷殷，你都食多啲啦！」
 




「係啦韻喬，見女女今晚邀請你上嚟試衫，照道理講，聽晚你都會參加嗰個party吧？」李生一邊食飯一邊問韻喬。
 
韻喬點點頭表示同意「我會去呀李uncle，不過到時候會同一個男同學嘅屋企人一齊去，因為係對方邀請我出席嘅…」

「男同學？唔通韻喬你已經拍緊拖？」李生好奇嘅問題，就令場面開始尷尬，不過…
 
「係咪同你男朋友家人一齊出席呀小喬？」韻喬聽到李太咁問之後，就因為唔知點答而紅都面哂咁。

而天殷見到咁嘅場面，就想幫韻喬解圍「媽媽呀，小喬聽晚會同小軒屋企一齊出席，因為係林家邀請埋佢嘅…」

「至於佢地兩個係咪情侶關係，小喬一直都冇講過畀我知。但係以我所知的話，佢地未發展得咁快喎…..」但天殷咁樣講好明顯將事情越描越黑，所以韻喬都即刻望實天殷，就好似喺度叫天殷唔好再亂講。
 
「哦，不過係咪一齊緊都唔緊要咖小喬，後生仔女拍拖都好平常事，最緊要係自己啱feel呀，知道未呀？」李太再同韻喬補充。

但係韻喬聽完之後就更加尷尬「我…我知道啦李Auntie，多謝你地關心…」然之後韻喬再低頭繼續食飯。




 
喺食完飯之後，兩個女仔又返上天殷間房，繼續再試多幾套衫同一齊做功課。而喺試完衫做做下功課嘅時候，佢地又一次講起同俊軒、禮謙嘅事。
 
「喬喬呀，你就唔好怪我長氣啦！其實，你對於佢地兩個，我地先唔講今日發生嘅事先，你依家會唔會都仲覺得，自己仲係鍾意禮謙多啲？定係已經有其他諗法？」天殷一邊做英文功課一邊講。
 
韻喬聽到天殷咁講就停筆，諗一諗之後就話「唔…其實我覺得都還好啦，兩個我依家都仲喺度觀察緊，但都仲未睇清楚哂佢地到底係點。」

「之不過，今日發生嘅事，我真係接受唔到啦，因為當住咁多人面前喺度嘈，而且仲要喺街上面，實在太太太丟架啦，同埋我真係好嬲囉！」
 
「其實換轉係我嘅話，今日見到佢地咁，嬲都係正常嘅！」天殷聽到韻喬咁講之後就話「嗱，有啲嘢我唔知你點諗啦下，不過我自己就覺得，你其實應該會鍾意俊軒多少少囉…」

（待續 ~）

（Penana版《愛在。貴族學園》已經獲得500讚好，將會喺7月份嘅時候加更，多謝大家嘅支持同鼓勵）





IG link https://instagram.com/bear_big_big_writer