《愛在。貴族學園》: Ch 15 ~ 告白 Part 16

Ch 15 ~ 告白 Part 16（連載日期：2022/05/09）

「作死你呀林俊軒！」韻喬一聽到俊軒離園之後，就好大聲咁喺電話裏面抗議。

但係就苦了聽住電話嘅天殷，因為隻耳仔就喺部電話旁邊「喂！張韻喬你唔好咁大聲叫得唔得呀？我隻耳真係畀你叫聾啦！」

「好啦對唔住啦殷殷」韻喬好細聲咁講「我講下笑啫喬喬，我地就到咖啦，一陣我地上到嚟先再傾啦，bye！」「Bye」

韻喬同天殷佢地兩個講完就收線「喂！你地兩個！真係頂你地唔順呀！」天殷於是鼓起泡鰓喺度抗議，但俊軒就冇任何回應。
 




林家司機都好配合，果然聽俊軒講開快少少，結果就梗係準時過頭去到醫院，喺落車之前，俊軒就吩咐話「唔該哂司機，你返去屋企先啦。同埋幫我同太太、譚管家講，今晚我唔會喺屋企食飯。」

「知道啦，二少爺。咁請你差唔多要離開嘅時候，打電話聯絡我地，等我地安排車接你地離開醫院。」司機回答道。

「ok，拜拜」「再見！」俊軒同天殷落車之後，都喺門外嘅櫈度等咗差唔多成10分鐘，先可以入去病房探韻喬。
 
「咦同學！你地兩個又嚟探韻喬呀？」講嘢嘅，正正就係負責收韻喬呢個病人嘅病房駐院醫生--梁醫生。

不過，因為梁醫生係喺俊軒同天殷後面同佢地打招呼，所以俊軒同天殷都即刻擰轉面……
 




「係啊，梁醫生你好！」俊軒同天殷一齊微笑咁講「因為韻喬佢喺電話同我地講話有少少悶，而且都想我地同佢解釋下啲功課，所以咪準時過嚟囉」天殷解釋道。

「原來係咁，咁我都唔阻你地幾位啦！」

「阿，梁醫生呀，我想問問下呢張韻喬依家情況點呀？」俊軒喺梁醫生走之前，及時追問梁醫生。
 
「等等下！」梁醫生於是打開韻喬嘅排版，然後就講話「張韻喬佢嘅情況都ok，今日再安排照過肺片都已經冇咁花，但係都要吊多兩日鹽水同打針藥，星期一再安排照多一次x-ray，如果冇咩事就可以拆鹽水。」梁醫生道。

「肺炎所引起嘅發燒嗰度，基本上都控制到，就係都仲係有少少低燒啦。至於腳傷方面，今日我巡房嗰陣，我都聽韻喬佢講話好咗好多。總括而言都叫慢慢好轉，所以你地兩位都唔使太過擔心！」
 




「真係太好啦，今次真係唔該你呀，梁醫生！幫我地照顧韻喬個大頭蝦照顧得咁好就真！」天殷非常感謝道。

「唔使客氣，呢啲都係我分内事嚟啫！」梁醫生好謙虛咁講「不過你地兩個快啲去搵韻喬啦，頭先我見到佢個樣好似好困惑咁，應該都係有功課唔識。我走先啦，有機會再見啦！」
 
「梁醫生再見」道別之後，梁醫生就一面認真咁，走出病房嘅大門，而俊軒同天殷兩個，就慢慢行去韻喬嘅房間。
 
「梁醫生話小喬好困惑喎，而且可能同功課有關，到底係咪我寫嘅notes寫得唔夠好呢？」俊軒好好奇咁問身邊嘅天殷。
 
「會唔會其實唔係功課呢？雖然我記得你都教咗小喬好多嘢，但係小喬好少喺大家面前咁困惑咖喎，會唔會……其實係喺度諗其他嘢呢？」天殷提出質疑，想排除功課嘅可能性。
 
俊軒腦裏面於是就記起，尋日自己同禮謙各自同韻喬表白，可能就係因為咁，搞到韻喬依家非常困惑，所以......

「希望係啦，但係我最怕係因為我同謙謙尋日各自表白，所以會嚇到佢，先會變得咁困惑掛」俊軒突然擔心起嚟。
 
「或者真係係啦，你地對喬喬做過咩自己心裏有數，但係我地都係唔好諗咁多啦，一陣費事要韻喬見到我地奇奇怪怪咁，又要佢擔心我地唔知搞咩嚟！」天殷提醒道。好快佢地就已經去到韻喬嘅病房門口。




 
「咯咯！」「係，麻煩請入嚟啦！」韻喬聽到敲門聲之後，就示意門外面嘅人入去。

「喂！小喬！」「俊軒、殷殷，你地到啦！」俊軒同天殷一打開門，第一時間就同韻喬打招呼，而韻喬見到佢地兩個就顯得非常高興。
 
「係啊！我掛住你呀嘛！而且我個“女朋友”頭先喺電話話怕悶之餘，仲開到聲要我地早少少到喎，所以我地咪聽你話，一開始探病我地咪過到嚟囉」俊軒先回答韻喬，而且都喺放低啲食物之後，走到韻喬身邊。

不過……

（待續 ~）

IG link https://instagram.com/bear_big_big_writer