《愛在。貴族學園》: Ch 14 ~ 入院 Part 5

Ch 14 ~ 入院 Part 5（連載日期：2022/03/25）

「喬喬，不如我依家同咗你去沖涼先啦，費事一陣阻住姑娘幫你吊鹽水」

「好啦殷殷，唔該你」於是韻喬就拎出自己嘅内衣褲，然後喺天殷嘅陪同之下沖涼，而兩個男仔就負責留守大本營，順便都開始做功課。

喺韻喬同天殷出去之前，韻喬都同望向俊軒同身邊嘅禮謙，然後就話「唔該你地先啦兩位男士」俊軒於是抬起頭望向韻喬，但係俊軒就發現韻喬塊面又係好紅咁望住自己。

然後俊軒就話「唔使多謝啦，你就快啲去冲涼先啦」韻喬冇再講任何嘢就同天殷出去。





喺韻喬冲完涼之後，天殷就撳鍾，請姑娘入黎幫韻喬整痘痘同吊鹽水，同時都要同韻喬打第一次嘅針藥。

由細到大都好怕打針嘅韻喬，喺見到堆好粗嘅針筒之後，就差少少想逃走。

俊軒為咗唔畀韻喬逃走，於是都叫天殷幫手捉住韻喬之餘，順便都要摸下韻喬個額頭去安撫一下對方，當然韻喬塊面都紅哂啦。

陳姑娘好快就幫韻喬，種好粒痘痘同埋調較好個鹽水架。喺打針藥嘅時候，受到藥物影響嘅關係，韻喬都感覺到手有少少痹

「韻喬，如果你見到大筒裏面嘅水就快滴完，或者直頭成包水吊完嘅話，就撳鍾叫姑娘幫你整啦」陳姑娘再一次吩咐韻喬。





「另外，你都要記得去洗手間嘅時候，推個鹽水架要小心啲，同埋洗手唔好濕到個痘痘呀，知道未？」

「知道，唔該陳姑娘」韻喬非常感謝咁講「咁好啦，你地幾個都休息下先啦」説罷，陳姑娘就將韻喬病房嘅門閂埋。
 
天殷第一個走到韻喬身邊照顧對方「點呀喬喬，你隻手痛唔痛呀？」

韻喬搖搖頭表示麻麻「痛就唔係好痛嘅，不過要綁住一包鹽水同個架，就好有感覺囉。都唔知今晚訓唔訓得着」

「但係醫生要你吊鹽水，都係想你快啲好啫」原本喺度做緊功課嘅禮謙，都抬起頭嚟開解一下韻喬。





但係天殷就好似有少少不滿「喂你地兩個男仔，我係叫你地嚟幫手照顧喬喬咖！你地居然當醫院呢度係自修室？！」

「唉呀殷殷呀，咁佢地都有一邊做，一邊陪問我地啦，而且小軒唔係都要預備好筆記畀我learn from hospital咩？」

韻喬今次居然幫住俊軒，搞到天殷都忍唔住抽韻喬水話「哈哈，原來入醫院之後，張韻喬都仲係wing下wing下咁，仲要喺度幫住之前最唔鍾意嗰個男仔，真係世界變啦可，定其實張韻喬你燒壞腦啦！」

韻喬聽到之後就面紅紅，仲瞪大對眼話「喂呀……我邊……邊度有幫住佢同燒壞腦喎！只不過佢要空間，先可以做到我想要嘅quality咋嘛！你地兩個真係識……識條鐵呀！」喺度整理筆記嘅俊軒聽到都喺度笑，但係韻喬就冇留意到。

好快就到食飯時間，公立醫院嘅食物就…….大家都明啦，不過對於幾位公子同大小姐，佢地見到之後都話一定唔可以病。所以喺韻喬食完飯、清理好枱面之後，俊軒佢地三個都選擇陪多韻喬一陣，始終醫院都係一個陌生嘅環境，對於韻喬嚟講，點都會有少少不安……

「好啦喬喬，探病時間都差唔多到啦。我地都差唔多要走啦」天殷對一對表之後，原來「唔阻你休息啦！bye！」

「下，你地咁快就要走啦？嚟啦陪多我一陣啦」韻喬扁哂嘴咁喺度扭計。

「韻喬同學，呢個時間係醫院要求咖，如果我地仲留喺度嘅話，我怕我地幾個會畀護士閙呢！」禮謙安慰韻喬咁講「而且，我地聽日都會上嚟見你啦！你就乖乖地喺度休息啦。如果有咩事，你都可以打電話或者Signal畀我地呢。」





「哦，咁好囉，今日真係唔該哂你兩個呀，天殷、禮謙！」韻喬感謝道。

不過唔知點解，韻喬偏偏就冇多謝俊軒，所以俊軒就話……

（待續 ~）

IG link https://instagram.com/bear_big_big_writer