《愛在。貴族學園》: Ch 14 ~ 入院 Part 3

Ch 14 ~ 入院 Part 3（連載日期：2022/03/21）

陳醫生同韻喬以及姑娘講完之後就離開診症室，但係喺陳醫生一打開布簾嘅時候，就見到憂心忡忡嘅天殷企咗喺度。

原來，一直非常擔心韻喬情況嘅天殷，一直就企喺布簾外面，希望可以知道韻喬嘅情況。
 
「請問妹妹你係….病人嘅同學？」

「係……係呀，醫生呀。我想請問呢…張同學佢依家嘅情況到底如何呀？唔該」天殷非常誠懇咁問陳醫生，當然舉止都變得比起喺學校更加優雅，就係一個典型嘅富家公主一樣。
 




「你好呀同學，我叫陳醫生。張同學佢…我地依家懷疑佢有急性肺炎，需要留院觀察，但係喺咪肺炎就要等X光片出咗之後先知道」陳醫生回答道......

「所以呢幾日，你同你嘅同學都可能要辛苦少少，幫手照顧張同學嘅嘢，由其學校功課方面嘅事。」

「至於其他嘅嘢，例如日常飲食，又或者起居用品嘅話，病房裏面嘅同事會好樂意幫手。喺上到病房之後，如果你地有任何疑問嘅話，就直接問佢地就得咖啦，佢地都會好樂意幫手」

「好嘅，唔該醫生。」天殷點點頭表示道謝，而陳醫生就去救助下一位病人。
 
再過多冇耐，病房助理就推住輪椅，安排韻喬去觀察病房，當然天殷、俊軒同禮謙都跟埋一齊過去。





喺去到韻喬嘅病床之後，因為韻喬需要即刻去照X-光片，所以剩地佢地三個暫時喺病房裏面等，同時都幫韻喬整理喺醫院需要用嘅物品。
 
經過檢查同醫生分析韻喬嘅情況之後，醫生認為韻喬嘅情況都唔係太好，於是就直接安排韻喬去内科病房。

上到内科病房過後，喺病房當值嘅陳姑娘，就開始同佢地幾個，簡單介紹張病床同其他注意事項……

「張同學，病床嘅左手邊有個遙控，可以調較張床嘅斜度，等你日頭坐喺度嘅時候，可以舒服少少；右邊就調校張床本身嘅高低。喺旁邊就有個call bell，如果有咩需要或者覺得辛苦嘅話，就直接撳落去，姑娘就會入嚟睇下你咩事，甚至需要時醫生都會入嚟。」

「而喺床嘅左手邊，有個櫃仔可以裝私人物品。不過如果你行開去洗手間或者抹身嘅話，就記得一定要鎖好，或者將銀包、電話等等貴重物品跟身，費事病房裏面有人偷嘢。」





「至於喺床頭嘅牆上面，有幾個插蘇，除咗寫住[緊急]同[儀器專用]嘅唔用得外，其他都可以畀你叉手提電話或者奶媽用。另外都有個閲讀燈，如果夜晚要睇書而病房燈已經熄咗嘅話，就可以用」

「另外床尾有張枱，係畀病人你食飯或者做功課用。同時提醒一下我地派飯嘅時間會係早上6點、中午11點、下晝5點同宵夜夜晚8點，而醫生會大概喺8點、2點同8點都會巡房，所以呢啲時間就盡量唔好行開啦」

「另外我地病房嘅探病時間，係上晝嘅11點-1點，同埋下晝4:30-7:30，其他時間謝絕探訪。大致上我要同大家交代嘅就係咁，如果有咩想問或者有咩事，就請撳call bell叫姑娘嚟幫手啦。」

「知道啦….唔該陳姑娘」陳姑娘一口氣講完一大堆嘢，結果搞到韻喬佢地都差少少頭暈。
 
「救命呀，醫院呢度嘅規矩真係多！個姑娘一次過講咗一大堆，我都都差少少記唔哂」天殷完全投哂降咁講。

「我都覺得呀，真係要打醒十二分精神呀，頭先隨時仲快過我地做Listening添呀」俊軒額頭滿頭大汗，顯然都聽到好辛苦。

「但係我地為咗韻喬同學，冇辦法啦！始終如果我地唔熟病房規矩嘅話，我地幾個都有可能會撞板呢」禮謙道。

韻喬見到大家咁嘅樣就好唔安樂，都唯有再一次表示歉意「其實都係我唔好，所以先會搞到依家咁，真係好對唔住大家」





（待續 ~）

IG link https://instagram.com/bear_big_big_writer