《愛在。貴族學園》: Ch 14 ~ 入院 Part 1

Ch 14 ~ 入院 Part 1（連載日期：2022/03/16）

喺李家嘅座駕上面，韻喬嘅情況越來越辛苦，而且面色就更加蒼白。此時天殷已經畀韻喬嚇到花容失色......

「喬喬你點呀？係咪好辛苦呀？」韻喬於是就點點頭話「有少少呀，而且個人好攰好暈呀！」

天殷喺聽到韻喬嘅回應就更加緊張，於是同司機講「司機呀，麻煩你可唔可以開快少少阿？因為我同學依家好唔舒服，要盡快送到急症室」

「知道啦，小姐」李家嘅司機於是都揸快少少，務求可以喺最短時間内將韻喬送到去醫院。





好在嘅係，佢地幾個好快就到咗律敦治醫院嘅急症室，首先去到嘅天殷，就先將韻喬帶去分流站見姑娘。
 
「你好呀同學，請問有咩可以幫到你地咖？」

「阿…姑娘唔該，我個同學佢依家發緊高燒，頭先喺屋企探過熱燒到41.8度，而且面色好蒼白好辛苦咁，麻煩你地可以幫佢做檢查嘛？」天殷非常焦急咁，一次過講哂上面嘅説話。
 
分流站嘅護士於是就轉對蒼白嘅韻喬講「同學，你依家係咪好辛苦呀？」「有少少」韻喬點點頭回答道。

姑娘於是就話「唔緊要，依家我地先幫你量一量體溫先。呃，你地兩個男仔麻煩喺出面等一陣呀，唔該。」「唔好意思呀姑娘」





「好，唔該」韻喬回答。而俊軒同禮謙就好唔情願咁出返去等韻喬，但俊軒就將裝住行李嘅袋，留畀天殷處理。

護士就即刻用探熱器同韻喬探耳仔，結果就梗係好快都知道「42.1度，有燒。」於是護士都安排發燒嘅韻喬，坐喺指定位置。
 
「嗱！體溫又高咗啦你睇下，小喬，頭先你仲喺度死撐話自己冇事！依家就真係出哂事啦！」天殷擔心到想喊咁滯。

「對唔住呀，殷殷，你地唔好嬲我啦……」韻喬試圖反過嚟安慰天殷，不過天殷依家都冇乜心情「得啦，有咩之後先再講啦，最緊要係你人冇事先！」

「同學，麻煩借一借你個身份證嚟睇下，唔該」護士一邊開file一邊問韻喬一啲基本資料，方便之後嘅醫護人員跟進「請問你嚟急症室之前，自己有冇睇過醫生？」
 




「今朝早有睇過醫生。啦，我張身份證」韻喬一邊答，一邊喺銀包拎出自己張身份證，然後遞到姑娘手上

「唔該哂。好啦，同學，麻煩等陣你拎埋個file出去繳費處交錢，然後等叫名見醫生。」

「喺見醫生嗰陣，將事情話哂畀醫生聽就可以咖啦」護士做好韻喬個file後就吩咐兩位。

「唔該姑娘！」天殷同韻喬道，之後就離開分流站去交急症室費用，再去會合喺外面等緊嘅俊軒同禮謙。

喺呢個時候，俊軒同禮謙都分別同自己屋企人，交代返遲返屋企嘅原因。
 
「所以依家韻喬同學就要喺度等見醫生？」禮謙喺坐低之後就問。

「嗯，不過今日都唔知道要等幾耐」天殷一邊喺wechat上，同張太交代韻喬入院嘅事，一邊回答禮謙。
 
「咁小喬，你依家仲有冇好唔舒服呀?」坐喺韻喬隔離嘅俊軒，非常溫柔咁問韻喬「我仲有少少啦，不過都好多謝你地關心我」韻喬點點頭同時感謝





「唔使客氣啦，大家都係一場同學吖嘛，問候一下都好應該嘅」韻喬今次冇再回答俊軒，只係塊面好紅咁望住對方。

不過好在，今日醫院嘅急症室都唔算太唔多人，無意識咁挨落俊軒膊頭度嘅韻喬，只係等咗45分鐘左右，就可以見醫生。喺廣播叫出「張韻喬請到3號房」之後，天殷就扶住韻喬行去3號房，然後自己就坐喺出面等韻喬。

（待續 ~）

IG link https://instagram.com/bear_big_big_writer