《愛在。貴族學園》: Ch 13 ~ 吵架 Part 3

Ch 13 ~ 吵架 Part 3（連載日期：2022/03/13）

（三平台20萬次總點擊加更，多謝大家一直嘅支持。之後嘅加更安排，本熊都會再適時檢討）

「不過，好在我地今日得閒，而且覺得你唔係好對路，所以先話上嚟睇下你咋，韻喬同學……」講嘢嘅係禮謙
 
「你講得啱呀謙謙，如果我地幾個今日唔抽時間上嚟嘅話，我真係怕你發生咗咩事都冇人知呀...」俊軒好擔心咁補充。

「多…多謝你地咁關心我呀，不過要勞煩到你地全部人上嚟我度，好似麻煩到…咳咳…大家，真係唔好意思」韻喬用一個抱歉嘅語氣道，但係都偶爾會有咳聲。





不過呢個時候，天殷一個唔小心就碰到韻喬嘅額頭，就突然之間發現韻喬嘅額頭好熱，基本上可以用辣手嘅溫度去形容都不為過，於是就好緊張咁問韻喬……
 
「喂張韻喬，你今朝唔係話有去睇過醫生、食過退燒藥咖咩？你個額頭依家做咩會咁熱咖？」天殷都不停用自己嘅手，來回咁摸自己同韻喬個額頭，發現韻喬個額頭真係熱過自己太多。

韻喬唔係太相信天殷嘅説話，於是就闊佬懶理咁話「下？乜有好熱咩？我覺得咪同食完藥嘅時候差唔多」

「唔係呢，真係滾咖喎！俊軒呀，你過嚟幫幫我手，睇下喬喬係咪仲發緊高燒？」
 
聽到天殷叫自己，俊軒都跟住天殷嘅意思去做，度一度自己同韻喬額頭嘅溫度。





俊軒摸完韻喬之後，都變得好緊張「殷殷，小喬個額頭真係好熱喎！小喬，如果你有準時食退燒藥嘅話，就唔應該仲會咁熱咖喎？」俊軒提出質疑道，而且都再三摸一摸韻喬同天殷嘅額頭。

於是，同樣擔心韻喬情況嘅禮謙，都忍唔住想伸手摸一摸韻喬額頭，不過，習慣都係改唔到「呃，韻喬同學，我可唔可以摸一摸你額頭呀？」

「可以呀，禮謙」禮謙本來都想放耐少少，但韻喬個額頭實在太滾，所以喺輕輕一摸之後，禮謙就即可縮手「真係好熱呀！」

「韻喬同學，我想問一問呢，你對上一次探熱嘅時間，係幾點探咖？可唔可以話畀我地三個知道？」禮謙一邊問，一邊摸埋自己同天殷額頭，搞到天殷反而有少少面紅。

「嗯，應該大概喺12點左右啦！咪就係喺頭先食完飯之後冇耐探過一次囉」韻喬回答之後其他三人都交換眼神





「但係喬喬呀，其實當你1點食完飯到依家，都差唔多隔咗四個鐘啦喎，不如你再探多次熱啦！」天殷於是就提議。

韻喬點頭同意之後，就將探熱針含到脷底。

喺兩分鐘之後，俊軒好仔細咁，查看探熱針上面嘅度數「軒軒，見到幾多度未？」天殷非常緊張咁問。

不過，喺獲得度數之後，俊軒隻手都開始震，然後瞪大自己對眼望向大家……

「4……41.8度啦！小喬呀，你依家冇退燒都不特止，仲越燒越高喎！你仲話同頭先食完藥嘅時候差唔多？！」俊軒驚呼之後。天殷就即刻掩住自己對眼，表示自己冇眼睇。

「韻喬同學呀，你……你到底真係有冇準時食藥咖？如果有準時嘅話，點解會退唔到燒不特止，仲會越燒越高咖？」禮謙開始再一次追問韻喬。

而俊軒加入埋追問行列「係囉小喬，你就誠實啲答我地幾個啦」
 
韻喬喺連續畀兩個男仔咁樣問法之後，面上都寫上咗少少不滿嘅表情。天殷好快就已經注意到，所以就開口話「喬喬你乖啦，我之所以帶埋佢地兩個上嚟，都係想幫你……」





「不過，你如果唔肯同我地講真話嘅話，我地幾個就算同理再熟都好，都冇人真係可以幫到你咖！乖啦喬喬，話畀我地知啦，好冇？」

韻喬承受唔住群衆壓力下，最終用一個非常哀怨嘅眼神道出真相

「我……咪遲咗個幾鐘食藥咋嘛！有咩咁大不了喎！你地幾個一上到嚟就係咁不停喺度話我，到底算點喎？！」

（待續 ~）

IG link https://instagram.com/bear_big_big_writer