《愛在。貴族學園》: Ch 12 ~ 好從實招來啦下 Part 1

Ch 12 ~ 好從實招來啦下 Part 1（連載日期：2022/02/16）

就喺俊軒離開福生大廈之後，俊軒喺通知司機黎接自己。喺等嘅時候俊軒就打電話畀自己死黨禮謙「喂，謙謙呀，我想問你依家得唔得閒呀？」

「今日…我得閒呀，做咩呀？」「你依家返咗屋企啦可？」俊軒依然好緊張咁問。

「我喺屋企呀，不過軒少你做咩呀？點解你好似好緊張咁嘅？」禮謙非常疑惑咁反問俊軒，俊軒於是就答話「喺就得啦，咁我依家過一過黎你屋企啦，有少少嘢想同你傾下咁」

禮謙差少少就畀唔到歡迎「你真係呀，又會咁突然都有嘅？不過我依家ok呀」





「多謝你呀謙謙，咁等等喺你屋企見啦」
 
「客咩氣呀大家咁熟，不過你都快啲啦，一陣間我都有少少嘢要問你！」今次就到禮謙好心急咁回應俊軒，搞到俊軒都忍唔住要寸下個死黨「真係吖，又會突然之間到你咁鬼緊張都有嘅？咁一陣見啦！」

好快，林家嘅座駕就返到韻喬屋企樓下接俊軒走。而喺上車之後，俊軒就指示司機將車開去程家大宅。
 
另一邊廂，得自己一個喺屋企嘅韻喬，喺送走咗俊軒之後「呀！點解開咗冷氣都仲係咁熱咖？」

其實同頭先一樣，韻喬根本就唔知道，自己係因為冷親，所以先會發燒而令到自己個身熱，而唔係自己真係熱。





所以韻喬呢個喺朋友眼中，屬於完全唔識照顧自己嘅大頭蝦，結果顯然就係做錯決定啦

「係喎，橫掂屋企又冇人，窗簾又冇開，直接除咗套校服咪得囉！反正都冇人見到我咖啦」

於是韻喬就直接除低條校裙同底裙，身上剩低内衣褲喺度抖涼，之後就去自己個書包度拎書出黎做功課同溫習。

但正如上面所講，韻喬其實唔知自己已經發緊燒，所以其實佢個人都越來越熱，而且人都越黎越攰，幾乎都要做到訓着咁滯。

講返俊軒，司機好快就將車開到去程家大宅。喺大門外面，俊軒就同程家嘅李管家講「唔該我想搵程少爺」





「好嘅林二少爺，呢邊請。」畢竟俊軒都常去程家大宅，所以程家嘅工作人員，絕大部分都認得俊軒。

俊軒之後就跟隨李管家入屋，而禮謙早就喺大門口恭候「喂！學霸軒你到啦！」禮謙興奮道「係呀，等我除鞋先！」

「快快快，有咩要講都好，一陣上我房先傾！」

「有咩咁急呀程大哥？依家你好心急趕住去投胎咩？」俊軒都冇個死黨咁好氣。
 
喺俊軒除好鞋之後，兩人就上去禮謙嘅睡房，然後喺入房後隨即鎖門「程禮謙！你到底做咩咁急啫？乜你依家好鍾意食花生咩？」俊軒再一次質問禮謙「總係覺得你知道我上黎之後，奇奇怪怪咁」
 
「坐低先啦！」禮謙叫俊軒坐喺自己旁邊嘅一張櫈上「你頭先呢，咪送小喬同學返屋企嘅？我想問下小喬隻腳依家點呀？」

禮謙一臉擔心咁問俊軒，俊軒聽完之後就喺度笑，再不懷好意咁反問對方「哦！原來你關心人地呢個平民女神下話？」

「你使唔使咁mean呀軒少？！我關心因為我而受傷嘅同學咋嘛，急住追問情況，我諗都應該好正常啦」禮謙反駁道。





但俊軒就駁上駁道「咁你唔係都應該有小喬嘅電話咩？你有嘅話，點解你唔自己打電話去問呢？」
 
「咁韻喬同學應該都唔知道你會上黎我度嘛，咁如果我都事先知道太多嘅話，你唔怕韻喬同學會覺得奇怪甚至懷疑咖咩？」

禮謙繼續反駁道，但諗諗下就話「呃，不過，其實係我令到韻喬同學受傷嘅，我都應該要自己打」

「但係你喺我打之前，至少都畀我知道，韻喬同學依家到底咩情況先得咖」禮謙續道。

（待續 ~）

IG link https://instagram.com/bear_big_big_writer