《愛在。貴族學園》: Ch 11 ~ 首次獨處 Part 8

Ch 11 ~ 首次獨處 Part 8（連載日期：2022/01/31）

（見有讀者想追下正章，唯有趁年廿九加一集畀大家，順便提醒下大家記憶）

「你地，係咪想問我可唔可以放學之後，抽時間送韻喬同學返屋企？」
 
「下！唔使啦殷殷，我自己……慢慢返去咪得囉，無謂麻煩到小軒啦……頭先已經麻煩咗佢一次啦」韻喬其實知道天殷嘅意思，但覺得頭先已經麻煩咗俊軒一次，於是想拒絕天殷嘅提議，但係今次又有人插嘴……

「小喬同學呀，我地都知道你喺度諗咩，但係萬一又整親就麻煩啦......」





「而且uncle、auntie又唔喺香港，夜晚冇人可以照顧到你，學天殷同學話齋，你又唔識得照顧自己，再整親嘅話，到時候可能你就要喺屋企休息咖啦！」禮謙呢番說話又將逞強嘅韻喬KO。

不過，韻喬又點會咁容易就範呀「我…咩唔識照顧自己呀？！我邊有你地講到咁冇用喎?！」所以韻喬又鼓起泡腮向禮謙抗議，同時俊軒同天殷都喺度笑。
 
「唔使講啦喬喬，橫掂小軒話佢今日放學得閒，就叫小軒送啦，而且佢送你嘅話，小軒就可以幫你搽多次藥油。」

「所以阿學霸，今日又要麻煩多你一次啦！你應該唔會介意咖可？」天殷笑意盈盈咁講。
 
「唔會介意，咁一陣我地放咗學，就喺班房等啦，小喬」俊軒溫柔道





「咁……好啦，唔該哂你啦…小軒！今次真係又要麻煩到你啦！」韻喬一臉感激對住俊軒講。

不過，其實講下講下，時間已經踏入十月中尾，天氣預報話今日會突然轉涼，不過呢位名叫張韻喬嘅大頭蝦，因為出門口返學之前，冇睇到天氣報告，所以韻喬都冇帶冷衫返學。

但韻喬又繼續喺班房裏面吹冷氣，結果喺午後嘅課堂，韻喬都開始有頭痛同埋少少鼻水，而且個身有少少罄。

但係韻喬都冇為意到，自己其實已經開始冷親。“應該冇事嘅”韻喬心裏面喺度諗。
 
轉眼就去到放學嘅時候，俊軒都有幫韻喬將書放到locker裏面，然後就扶住韻喬，慢慢咁行出去校門。





唔少同學見到佢地兩個居然同時出現之後，都望住佢地兩個喺度竊竊私語。

韻喬見到之後當然就好唔舒服啦，畢竟事實都唔係佢地所諗嘅一樣，於是就用一個無助嘅眼神望住俊軒。

俊軒好快就收到韻喬嘅意思，於是都輕輕拍一拍韻喬嘅背脊「放心啦小喬，唔使理佢地講咩」俊軒好細聲咁喺韻喬耳邊講。

同一時間，俊軒都用保護韻喬嘅心態，同附近喺度食花生嘅同學講「我知你地想講咩，但係件事唔係你地想象中咁嘅，我今日只係要送一個腳受咗傷嘅同學返屋企。而且我地兩個都冇做過啲咩嘢，唔怕畀任何人講…」

「不過，我地對於會喺學校secret散播不實謠言嘅同學，可能會report去Disclipine度處理」俊軒嘅重話，自然都令到同學們都唔敢亂黎。

雖然韻喬聽到之後，覺得俊軒好似講得太嚴重，但同一時間都感到好窩心，感覺俊軒同喺星期六之後，變得有唔同咗。
 
「司機，麻煩先去北角福生大廈先，我要送我“女朋友”返去，唔該你」同韻喬上車之後，俊軒就同司機講

「知道啦，二少爺」司機回應俊軒嘅説話之後，就將車開向北角渣華道。




 
雖然頭先喺學校裏面，俊軒的確留咗個好印象畀自己，但係喺韻喬聽到“女朋友”三個字之後，自然都再一次感到周身唔自在，畢竟自己根本就唔係俊軒嘅女朋友。

不過，因為自己依家坐咗喺林家嘅車裏面，為咗唔好令司機向林太報串，指俊軒同自己其實係假扮情侶，所以韻喬都冇出聲，而選擇靜靜咁同俊軒坐。

但好快韻喬就因為頭痛嘅關係，所以就好自然咁挨喺俊軒嘅膊頭上邊訓着咗，而且仲訓得出奇地舒服。

（待續 ~）

IG link https://instagram.com/bear_big_big_writer