《愛在。貴族學園》: 特別篇 1 ~ 韻喬與野豬一族奇遇記

特別篇 1 ~ 韻喬與野豬一族奇遇記（連載日期：2021/11/19）

（本文與正文内容冇太大關係，可以當獨立短篇故去睇）

某一日放學嘅時候，韻喬如常帶住一大堆書，由學校行出去大街坐巴士返去北角嘅屋企，但有陣時韻喬就會一邊玩手提電話，一邊行出去。但就喺離開學校門口冇幾遠嘅時候……

「GWE！GWE！GWE！」一連串類似豬叫嘅聲音，喺馬路山邊嘅草叢裏面傳出黎，而且聽落好似慘叫咁。

但正正就因為咁，於是成功引起韻喬嘅注意「嗯？點解會有啲gwe gwe聲傳出黎嘅？」





韻喬於是停下腳步，嘗試尋找聲音嘅來源。但韻喬都用咗一兩分鐘，先搵得到啲聲嘅來源地。

但係當韻喬見到嘅時候，佢完全唔敢相信眼前所見到嘅影象……

「Gwe！Gwe！……」「啊！陰功囉！點解會咁咖！？」韻喬眼前所見嘅，係有一隻啡色嘅野豬仔，用個口擔住一個裝有食物嘅背心膠袋。

但係個頭就卡住咗喺一個鐵欄上，狀甚可憐，用水汪汪嘅眼睛望向回頭經過嘅韻喬。

不過，當韻喬行埋少少去隻野豬度嘅時候，就發現野豬嘅頸部上，有一個少少嘅傷痕......

「啊，隻豬仔……豬仔有傷喎，會唔會係因為掙扎，所以搞到自己傷？」同時間隻野豬繼續喺度叫，就好似希望韻喬會救自己咁。

「但係點算好呀？雖然我救佢嘅話我會有危險啫，但係隻豬仔再咁樣卡落去嘅話，豬仔一定會死咖！」韻喬急得猶如熱鍋上嘅螞蟻，喺自己冇能力，但係又想救出受困嘅野豬仔，於是就決定「都係返學校搵老師。睇下幫唔幫到手先」

「豬豬，你等我一陣呀，姐姐好快搵人救你出黎」「Gwe……」韻喬於是即刻跑返學校，但好好彩學校其中一位負責STEM嘅老師Mr Tan，係動物方面嘅專家，所以佢聽到韻喬嘅報告之後，就帶埋一個校工同工具，同韻喬一齊返現場救豬。

隻野豬仔喺見到韻喬同另外兩個陌生人，仲有一個籠喺度之後，就顯得非常不安，於是開始瘋狂掙扎，同Gwe得好大聲i.e.叫到劏豬咁款。

韻喬同Mr Tan於是就嘗試安撫下隻野豬，慢慢等隻野豬知道，眼前嘅人類其實係幫自己脫困。





不過，經過評估之後，Mr Tan都係決定要切爛個欄杆，先可以幫隻野豬脫困。於是喺校工用工具協助之下，將鐵欄剪爛，然後用食物作為引誘，將野豬趕入籠裏面。

當然，今次韻喬都有份幫手，畢竟韻喬嘅作用，就係要取得隻野豬嘅信任。

喺返到學校之後，Mr Tan就幫隻野豬檢查一下傷勢，發現隻豬有外傷，於是決定喺喂食之後，帶出去獸醫診所檢查

「張同學，呢度交畀我地處理就得啦，真係唔該哂你，你做得好好」Mr Tan讚賞韻喬道。

「唔客氣啦Mr Tan，都係我咁啱經過聽到有叫聲，我先知道有豬仔困住咗咋。但係隻豬仔真係會冇事？」韻喬非常擔心咁講。

Mr Tan於是都要安撫一下韻喬嘅不安情緒「暫時睇都唔會有太大問題，放心，我地都會暫時照顧好隻野豬，直到好返先會放返上山」

韻喬知道之後都暫時鬆一口氣，然後話「咁拜托你啦，Mr Tan再見！豬豬再見！」不過隻野豬今次冇叫，只係眼泛淚光咁望住韻喬，好似好感激對方將自己救起。

喺返到屋企之後，韻喬都有趁住食飯嘅時候，同張生張太提及過呢件事，佢地都話韻喬今次都做得好好，而且都叫韻喬唔好太過擔心，話隻野豬一定會好番咁話。

臨訓之前，韻喬都再一次諗起隻野豬……

「豬豬，我都希望你可以冇事啦，雖然我知道Mr Tan可以照顧得你好好」韻喬之後就去咗訓覺。

之後幾日，學校裏面都陸續有人提過野豬嘅事，但係發現原因就不得而知，畢竟喺韻喬發現嘅時候，大部分同學要麽坐私家車離開，要麽就已經一早放學，而韻喬每日放學之後，都有去睇下隻野豬仔。

雖然Mr Tan唔建議韻喬同隻野豬，有直接嘅接觸。但係隻野豬仔經過幾日嘅相處之後，都開始認得韻喬，甚至有對韻喬「嚄」叫、搖下條豬尾咁。

後來甚至有其他同學，專登去花園度睇下野豬，順便都當係STEM學習嘅一部分。

不過，紙最後都包唔住火，好快呢件事就搞到全香港都知道……

原因係當日Mr Tan帶野豬去睇獸醫之後，獸醫要求隻野豬觀察咗幾日，先可以由Mr Tan接走。

但係喺之後幾日，學校附近嘅小路，就不停有其他大大小小野豬出沒，懷疑就係呢隻野豬仔族群嘅其他成員，一齊喺度搵返失蹤成員嘅下落。

而知道發生咩事嘅韻喬，雖然見到啲野豬比自己救嘅大隻好多，自己都有少少驚，但好好彩啲豬都只係喺度來回咁行，並冇要挑戰甚至攻擊韻喬同其他人嘅計劃。

唯一就係會搞到附近會塞車，同司機經過都要避開豬隻。

而韻喬自己都知道，當日決定救豬嘅做法決定正確。但係，一樣米養百樣人，偏偏其他人就唔一定有韻喬嘅愛心同同情心。

就喺一個星期之後嘅放學時間，學校外面嘅小路，突然之間泊滿漁護署同執法部門嘅車輛，而且仲將相當長嘅一段路圍封起黎，地面上仲鋪滿麵包，一時之間如臨大敵，氣氛非常緊張。

初時韻喬都唔知道，到底一大班政府嘅人喺度做乜。

不過，韻喬好快就認出，圍封自己上次救返被困野豬嘅位置之後，心裏面就即刻大吃一驚

“會唔會佢地想喺度趕走啲豬呀？但呢度明明係山邊，有野豬都好正常啫？”





但係，現場嘅緊張氣氛，就搞到韻喬越來越唔安心，於是韻喬就問一個喺度駐守、手持盾牌嘅警察「唔該，我想問下呢度發生咩事？」

「哦妹妹，因為我地近日收到有市民投訴，話呢度呢兩日多咗好多野豬出現，怕會擔心駕駛者同行人嘅安全」

「所以一陣間我地就會封路，然後會聯同漁農署，展開清理野豬嘅行動。但係為咗你嘅安全起見，麻煩妹妹你都盡快離開現場啦」警察非常有禮貌咁同韻喬講。

不過韻喬聽完之後，表情就非常不安，於是同警察講咗一句之後，就即刻掉頭返入學校裏面，去教員室搵Mr Tan。

「咦，張韻喬同學？請問你搵我咩事？」Mr Tan見到韻喬之後，就非常疑惑咁問。

自從隻野豬離開獸醫診所之後，Mr Tan都將野豬暫時放喺學校裏面其中一個遠離山邊嘅花園裏面，等佢可以慢慢復原。

韻喬之後就好心急咁講「Mr Tan，依家喺學校門口附近條馬路，有好多警察同漁農嘅人喺度，而且路上都鋪滿麵包，佢地話要清理附近嘅野豬，因為最近收到好多投訴，話呢度有好多野豬出現」





Mr Tan聽完韻喬嘅形容之後，隨即眉頭深鎖，然後就話「我可以肯定，堆野豬應該都係想搵返之前受傷嘅豬仔，所以最近先會不停出現。但我都冇諗過，居然有人會投訴，而政府都居然咁快對啲野豬落手」

「下，咁可以點算呀？」韻喬聽完Mr Tan咁樣講，就再一次緊張起黎「我地冇可能畀……畀啲豬就咁畀佢地清理咖！」

「冷靜少少先，張同學」Mr Tan一邊考慮方案嘅同時，都要冷靜一下韻喬嘅情緒。

「張同學，我想問頭先喺出面，你見到大概有幾多警察同漁農署嘅人喺度？」Mr Tan問依然好擔心嘅韻喬「嗰都都有十幾架車，而且應該有裝到籠喺度，我估佢地想捉走啲野豬」

「得，我入去問一問校長，睇下佢有冇時間同政府啲人交涉，我估計啲大野豬都係想接返隻豬仔走」Mr Tan都抛出最新嘅方案

「另外我都叫工友，準備好將隻豬仔還畀佢地個家族先」

「張同學你依家得閒嘛？」「我ok！」「咁你一陣帶埋我同校長，仲有工友去見現場啲人啦！」「知道啦Mr Tan！」

韻喬講完呢一句，Mr Tan就入去教員室聯絡相關嘅人。

最後校長、Mr Tan、Ms張、工友帶埋隻野豬，喺韻喬嘅帶領之下，去到政府工作人員嘅組長面前。

不過喺佢地埋到去之前，Mr Tan見到當局嘅架勢，就輕輕搖頭嘆息。而隻野豬仔，就繼續喺個籠裏面，不停發出「嚄嚄」嘅叫聲。

校長首先同漁農署嘅組長話「唔好意思，我想問你地嘅現場負責人喺邊？同埋點解喺我學校附近封路，都冇事先通知我地？」

一個着西裝嘅人員就即刻上前「我係，請問先生你係？」

「我係皇家XX學院嘅校長，我姓陳，請問你貴姓？」陳校長道「我姓曾」「曾生，請問你地喺度做咩？」校長繼續問眼前姓曾嘅負責人

「我地最近連續收到市民投訴，話呢度附近突然有大量野豬出沒，我地擔心市民嘅生命同財產安全，所以今日決定聯同警方聯合行動，清理呢度嘅野豬」

同樣關心動物權益嘅陳校長，聽到局方嘅負責人咁樣解釋之後，就非常唔明白「點解要咁做？呢度本身就係山頭，係野豬生活嘅地方，咁樣有野豬出沒唔係都係好自然嘅事咩？」

「但係，萬一啲野豬全部聚集喺馬路或者行人路上面，會嚴重威脅到道路使用者嘅安全，同埋大家都唔知道啲野豬會唔會帶有病毒，萬一傳畀人引發疫病嘅話，後果都不堪切想」呢位曾姓官員繼續堅持消滅野豬嘅觀點。

「既然係咁，不如就等我地呢位同學，簡單講下到底發生咩事」陳校長喺同Mr Tan同埋韻喬，打過眼色之後，就叫韻喬解釋整件事嘅來龍去脈，畢竟野豬仔嘅受傷，都同依家豬群聚集有關。

身為學校模範生、代表學校出席大小場合嘅韻喬，當然都好流暢咁，講出整件事。

同時都將學校照顧咗幾日嘅野豬仔，畀漁護署嘅官員望一望。初時佢地都對韻喬嘅説話半信半疑。

但就喺佢地講到一半嘅時候，一大群野豬就開始喺山頭行出黎……

韻喬好快就認得出，呢一堆就係今日不斷喺學校條小路出現嘅野豬家族，佢地其實初時都好輕鬆咁，喺狹窄嘅小路上，悠然自得咁散步，偶爾都會睇下會唔會有食物畀佢地果腹。

漁護署嘅官員同埋在場把守嘅警察，喺見到呢堆野豬之後，猶如面臨大敵，甚至警察仲動用布袋戰術，將封鎖範圍不斷收細，等班野豬去食堆麵包，再將野豬家族一網打盡。

韻喬同陳校長覺得再咁樣落去，對野豬家族同埋在場嘅人，都可能會有危險，於是陳校長佢地幾個，就越過封鎖線，然後打開裝有野豬仔嘅籠，等裏面嘅野豬仔可以同自己家族嘅成員重逢。

野豬仔喺認出外面嘅豬係自己媽媽之後，就好高興咁搖住條短短嘅尾巴跑去，而野豬媽媽都好好似好開心，同樣都係不停咁搖自己條尾。

​​​​​​​野豬仔返到媽媽身邊之後，就一直跟喺野豬媽媽身邊，形影不離咁，然後再緊緊跟住家族其他成員，繼續慢慢散步同搵嘢食。

在場嘅人員喺見到一連串咁溫馨嘅畫面之後，都選擇相信韻喬同陳校長嘅説話。喺觀察一段時間之後，雖然野豬見到咁多人喺度，點都會有啲驚，但係佢地性格都好溫純，完全冇要主動攻擊人類嘅意思。

喺過多一陣，豬群就陸續消失喺大家視線之中，返上學校附近嘅後山上面。在場人員於是就陸續收隊，將現場解封。

陳校長見狀就趁機教訓在場嘅官員，認為人同其他生物，都應該和平共存，由其係本來係屬於佢地嘅地方，就更加唔應該打擾佢地嘅生態，去捉甚至用捕獸器令佢地受傷甚至死亡。

但係呢位曾官就當然冇聲出，直接同其他官員收隊離去。

「校長，咁樣嘅結局都係最好可？」Mr Tan問陳校長。陳校長好快都點點頭話

「係，而且本來就應該係咁，雖然幫野豬絕育都係其中一個控制野豬數量嘅好辦法，但係，我就唔同意要趕走甚至所謂“人道毀滅”結束動物生命嘅做法」

「張韻喬同學，你今次真係做得好好，識得對野生動物有愛心，而且都好負責任，日日都有去探下野豬仔。我會同你班主任講，加你操行分同表揚你」

「多謝校長」韻喬對校長微笑「但係Mr Tan都照顧得野豬仔好好，如果唔係，佢今日都未必可以返到野豬家族身邊」

「韻喬同學你太客氣啦，我都係用我嘅知識盡量去幫佢，見到佢可以同家族重逢，我都覺得好開心」Mr Tan道「多謝你呀，張韻喬同學」

「好啦，張同學，出面都開始天黑啦，你都快啲返屋企，唔好要父母擔心啦！」陳校長吩咐道。

「知道，再見校長，再見Mr Tan！」同師長道別之後，韻喬就自己一個踏上歸途。而喺返到屋企之後，韻喬都再一次同張生張太，分享今日發生嘅事。

佢地都讚個女做得好，而且都覺得當局對於野生動物嘅保育其實都做得唔好。但普通市民非法喂食野生動物都唔應該。

自此之後，學校對出嘅小路，都冇再成日見到野豬嘅蹤影，但有時候韻喬都會重遇野豬仔同佢媽媽。

​​​​​​​而每次重逢嘅時候，豬媽媽同豬仔都對韻喬報以感激嘅眼神，或許喺呢堆野豬裏面，都已經視韻喬係佢地嘅救命恩人。

但願，人與世界上其他動物，都可以和平共存，放棄傷害、殺戮……

僅此紀念11月17日，被當局無辜殺害而結束生命嘅7隻野豬


（特別篇1  韻喬與野豬一族奇遇記 ~ 完）

​​​​​​​IG link https://instagram.com/bear_big_big_writer