《愛在。貴族學園》: Ch 8 ~ 逃過一劫的吻 Part 4

Ch 8 ~ 逃過一劫的吻 Part 4（連載日期：2021/11/14）

林太繼續用親切嘅笑容回應韻喬，但其實韻喬頭先奇怪嘅面部表情，就已經引起咗林太嘅注意。

不過林太都暫時當冇事發生，只係繼續對韻喬講話「不過小喬，如果小軒佢平時有蝦你，或者小軒對你唔好、甚至出軌嘅話，小喬你都可以直接話俾我聽就可以咖啦，然後我就可以幫你教訓下佢。哈哈。」
 
「哈哈，好呀，唔該你呀auntie！」韻喬微笑回答道「平時俊軒呀，佢都叫咗好乖嘅，就除…..」

「嗱聽到啦媽媽，連小喬都話我乖呀…..」





當聽到“就除”兩個字之後，俊軒就意識到韻喬可能會借機爆自己seed，於是就算係好冇禮貌都好，佢都要強行插嘴。
 
「小軒，媽媽叫過你幾多次，喺人地講緊嘢嘅時候，係唔可以插嘴咖？咁樣係好冇禮貌咖，就算係非常熟悉嘅人都好，都唔可以咁」林太非常不滿道

「小軒你就快啲同你女朋友道歉啦，如果唔係因住人地嬲咗你呀。」
 
俊軒喺畀林太提醒過後，就同韻喬道歉「對唔住呀，小喬，我頭先唔係有心插嘴，希望你唔會嬲我啦」

「冇事啦小軒，我唔會咁小氣嘅。林auntie，我都知道小軒佢都係想同我玩下嘅啫，係咪呀小軒？」韻喬用一個帶有殺機嘅微笑反問“男朋友”俊軒。





俊軒於是連忙點頭表示同意，而林太就請大家坐低「係呢小喬呀！」「係……請講呀Auntie！」

「Auntie想八卦一下呢，其實你同我地小軒一齊咗幾耐呀？因為上一次我問小軒嘅時候，小軒都同我講話自己未有女朋友」

韻喬其實都預料到，對方家長一定會問自己呢啲問題，所以喺心裏面都已經有答案去應付林氏伉儷。

韻喬於是好自然就答「我地…其實都係喺埋一齊三個禮拜左右，唔算係好長時間，依家我同小軒都仲慢慢培養緊感情同默契」

「默契呢啲都唔急得嘅」林太道「最重要都係雙方都愛、願意為對方付出就得。當然，坦白都非常重要啦」





林太講頭先呢句嘅時候，將視線射向自己個細仔，喺衆人面前暗示俊軒對自己唔坦白。

「不過小喬呀，Auntie都想聽下，點解你會鍾意我地小軒嘅原因？」林太再次向韻喬提出問題。

不過，呢條問題對於韻喬黎講，係有少少難度。畢竟平時喺學校嘅時候，俊軒嘅行為一直都遭到韻喬嘅討厭。

但係，依家林太就要自己解釋鍾意俊軒嘅原因，韻喬今次都冇得揀，就唯有求其答少少嘢應付林太

「啊……Auntie，雖然小軒佢喺學校，之前成日都冇黎正經，經常周旋喺一大堆女同學之間」最後韻喬都係要爆下俊軒大獲，先可以平衡返心裏面嘅不滿。

「不過，之前因為有一次，我喺學校幫老師搬嘢去教員室嘅時候，唔小心將啲嘢整跌，全部倒哂落地下。」

「咁啱小軒佢經過，見到我一臉無助咁，於是就幫我執返好哂啲嘢，然後再幫我一齊拎去教員室」

其實頭先韻喬只係將上次撞跌書嘅事件，輕輕咁改一改個故仔，再話畀林太知道。





所以韻喬同目擊者天殷都知道發生咩事。當然，俊軒都知道韻喬講咩，於是塊面都紅埋，好似不堪回首咁。

「而且，小軒喺學校成績都一直好好，有時候如果我因為唔舒服而absent嘅話，好多時小軒都會幫我整理notes，畢竟我地兩個嘅成績，都叫做差唔多。」

「久而久之自然都習慣咗對方為自己準備嘅嘢。所以咪……一齊」講完之後韻喬塊面都紅一紅。

林太聽罷，就非常滿意咁點頭「做得幾好呀小軒，而且媽媽我都睇唔出，原來小軒你都會咁主動熱心幫小喬」

「都唔知點解有時候天殷小姐想你幫手嗰陣，你反而會唔理天殷小姐喎」

天殷聽到林太嘅説話就即刻配合，鼓起自己泡鰓不滿道「係囉，平時有時候我喺學校想佢幫手，佢都係咁對我啊auntie！」

「不過依家小軒就真係有異性冇人性囉，自從同小喬一齊咗之後呀，成個世界都好似得小喬一個人咁！」





俊軒聽完之後，表情非常無奈……

（待續 ~）

IG link https://instagram.com/bear_big_big_writer