《愛在。貴族學園》: Ch 8 ~ 逃過一劫的吻 Part 1

Ch 8 ~ 逃過一劫的吻 Part 1（連載日期：2021/11/09）

喺林家嘅座駕裏邊，俊軒喺上車之後，一直都非常緊張，手心已經出哂汗之餘，仲唔敢拖住身為自己個“女朋友”—張韻喬嘅手。

無非都係怕對方唔鍾意而發脾氣，畢竟韻喬今日都係被逼咁做。

果然，當自已要面對嘅，係全級考第一嘅天才嘅時候，俊軒根本完全冇辦法控制呢一切。

由其係韻喬依家内心嘅想法，所以先會搞到有一種完全由deadair而引起嘅尷尬。





但俊軒都知道，咁樣繼續deadair都唔係辦法，於是就做咗破冰嘅人，輕聲問一問隔離嘅韻喬「小喬，其實你係咪真係…..」
 
韻喬聽到俊軒嘅問題會為自己同對方，埋下一個非常危險嘅伏線，於是韻喬就即刻一手掩住俊軒個口，再喺佢耳邊細聲講

「（林俊軒，你都應該好清楚知道，依家唔係講呢啲嘢嘅時候）」「（知道啦！）」

不過，韻喬都知道，可能林家嘅司機，都會覺得自己同俊軒貌合神離，萬一林太問起司機，呢對“小情侶”喺座駕上面嘅表現嘅時候，都可能會令到大家前功盡廢。

於是韻喬就主動咁，慢慢拖起俊軒隻手。





面對韻喬突然之間肯拖起自己隻手，俊軒即刻做出一個不可置信嘅表情。

但係好快又畀韻喬開聲提點「（好心你做戲就認真啲做全套啦！至少我地都要過咗auntie嗰關先！）」

「（不過，本小姐之後都會再慢慢同你算賬！唔好諗住依家我肯拖起你隻手，就可以當冇事發生。知道未呀死人頭？）」
 
「（知…知道啦，多謝你小喬！）」俊軒隔咗一陣，終於都知道要點樣去畀反應對方。

當然俊軒都要賣下口乖「不過小喬，話説你今晚真係好靚，呢套衫好襯你，真心覺得你同平時喺學校嘅你唔同，完全變咗另一個人咁」





喺俊軒稱讚韻喬嘅時候，韻喬完全紅都面哂，明顯又怕醜又開心。
 
「哦！係咩？你又喺度口花花啦你！都唔知邊個成日教你講埋呢啲咁嘅嘢，唔使問都知一定係你平時溝女嘅時候成日講咖啦……」

韻喬又偶爾寸一下自己個“男朋友”，但都補充一點「不過，如果你要多謝嘅話，就多謝天殷大小姐啦！」

俊軒聽到頭都側埋，於是韻喬就繼續講「呢套靚衫呢，本先就係天殷佢嘅，因為我呢個窮小妹平時都唔會有機會去你地啲高級社交場合嘅）」

「（仲有你啲auntie相睇派對，我根本就冇呢啲衫，所以佢先借畀我着咖咋！）」
 
「咩呀，咁你本身都咁高顏值，當然着咩都係好睇咖啦」俊軒繼續賣口乖「不過我都要重申一點，我唔係心甘情願去呢啲party咖！」
 
「好煩呀你！」韻喬抗議道「我話你知呀！（一陣你呀！唔該交足戲呀！唔好揸流攤呀！）」

「（唔係一陣你畀auntie識穿你講大話，然後再要你去相睇party，娶個大嬸返屋企，到時就真係賠了夫人又折兵啦！）」





「（然後我就可以坐喺度恥笑你同個auntie拍拖哈哈哈！！）」但後面韻喬再講嘅時候，就笑到鬆唔到！
 
俊軒於是就好緊張咁話「哎呀得啦，不過求下你啦小喬，你一陣真係唔好……唔好爆我seed就得咖啦！」

「得啦長氣！你再咁長氣我就真係爆你seed呀啦！」話口未完，韻喬又一次好大力打落俊軒手臂度

「痛痛痛！饒命啊小喬！」「哼！唔教訓下你都唔得咖你個衰人！」
 
至於喺李家嘅座駕上面，同坐嘅天殷同禮謙，同樣都感到非常不安

「好緊張呀！」禮謙首先打破沉默「唔講就以為係要搞場戲黎呃自己呀媽。咪就係唔想去相睇啫，我都唔明點解學霸軒要玩到咁大？」
 
「冷靜啲啦！其實我地再緊張都冇用啦，可以做嘅我地都已經做哂……」天殷回應道





「依家都係等佢地幾個到時點樣互動咖啦，我地身為局外人嘅，真係管唔到佢地太多，平常心面對就得啦。」

天殷雖然好似好冷靜，但心裏面其實都好擔心韻喬嘅情況......

（待續 ~）

IG link https://instagram.com/bear_big_big_writer

另雙平台點擊數喺11月8日突破3萬次，再一次多謝大家支持，預計會喺周末進行加更