《愛在。貴族學園》: Ch 7 ~ 綁架 Part 1

Ch 7 ~ 綁架 Part 1（連載日期：2021/10/14）

於是到咗小息嘅時候，天殷一打鐘就賣甩咗韻喬，同俊軒、禮謙喺Form 5A班房推門行出走廊，商量下一步嘅對策，去説服韻喬會幫助俊軒，完成呢場就快變成大頭佛嘅大龍鳳。
 
「嗱軒軒，你頭先自己都聽到咖啦，小喬依家唔肯應承你啊，我就已經盡哂力做好游說小喬嘅工作咖啦......」

「咁你依家諗住點算啊？照去相睇party定再有其他辦法？」天殷首先開口問俊軒。

依然一臉灰嘅俊軒諗左幾秒，就話「是但啦，我都已經豁咗出去」「去party？」禮謙問俊軒道。





但係俊軒就搖搖頭「唔會，我打死都唔會去相睇！既然對張韻喬用軟嘅唔得嘅話，咁我地就唯有用硬嘅啦…」

天殷都認為夾硬已經係唯一方法，但係就有少少擔心「咩話！？你要夾硬嘅話，軒仔你咁樣做得唔得咖？」

「雖然你都已經冇哂其他辦法啫，但係你要面對嘅，係有少少暴力傾向嘅小喬喎，可能…會對你有少少困難。如果真係夾硬嘅話，咁你諗住點做呀？」

不過俊軒好快就諗到一個好辦法「不如放學嗰陣，直接將張韻喬趕上車咪得！」

但禮謙就look大對眼望住俊軒，兼且有少少激動咁話「大哥，咁多解決方法唔用，走黎喺學校玩綁架同學？」





「師父，咁樣好似唔係好得喎，你唔怕訓導會介入，甚至學校會報警咩？」

「點解唔得呀？」天殷同俊軒同時問反對嘅禮謙，而天殷就繼續問「而且，我地都冇話過要用條大麻繩去綁住小喬，再夾硬押佢上車，你會唔會諗多咗、太過於杞人憂天呀？」

「下！？唔得嘅原因都已經好幾個啦！？第一，正如我頭先已經話，張韻喬同學可以報警啦，因為咁樣綁架本身就已經犯法...」

「以張韻喬同學嘅性格，佢知道咗係你幕後策劃嘅話，佢一定會告發你……」禮謙一本正經咁講。

「而且你要我地幫你，我同殷殷佢就會係共犯，張韻喬同學一定會拖埋我地落水。到時我想問大家點收科？」





「仲有，就算張韻喬同學唔出聲，萬一佢嘅父母走去問個女去邊嘅話，張韻喬又會點答呢？」
 
「你個程禮謙吖！依家諗住大難臨頭各自飛啦喎？！做咩依家先至提出咁多唔同嘅可能性出黎呀？之前你又唔同我講？！」俊軒好不滿咁講。

但禮謙隨即反駁「喂！咁我唔知道你會玩到咁大咖嘛！」
 
俊軒塊面繼續表示不滿，而禮謙已經知道俊軒想講嘢，於是又繼續講落去「聽埋我講先啦老友！我知道你依家好心急，冇哂辦法咁」「咁你就快啲講埋佢啦！」

「我想講嘅係，就算佢肯去你屋企食飯、見家長都好，萬一張韻喬同學突然之間又有咩不滿你，然後喺你阿爸阿媽面前，拆穿你嘅詭計嗰陣，到時候你自己又點落台啊？」禮謙繼續同兩位解釋問題嘅嚴重性

「始終把口生喺人地度，張韻喬同學會講啲咩，你根本都控制唔到，而且都冇可能控制到！」
 
「啊，咁我仲可以點做呀？」俊軒抱住自己個頭，喺度懷疑自己嘅諗法，不過天殷就望住禮謙，唔知喺度做咩咁「救命啊！唔通我林俊軒真係要繼續參加呢啲咁荒謬嘅相睇party咩？」

「啊！我諗到有一個辦法啦！放心一定唔會係用夾硬黎或者綁架嘅」天殷突然靈機一觸道，令陷入艱苦腦交戰嘅俊軒，仿佛感覺到有一線生機





「殷殷你有咩好辦法呀？快啲分享下分享下啦」

「我嘅計劃係，一陣我返埋位同小喬講，邀請佢聽日去我屋企玩咪得囉！」

「反正聽日係星期六，而且小喬原先都話冇嘢做嘅，佢自然會以為我會約佢去行街咖啦！」天殷同兩位男仔交代計劃。
 
「咁之後呢？你地唔會一陣間買到好幾袋手袋上我屋企下話？」俊軒追問天殷。

（待續 ~）

IG link https://instagram.com/bear_big_big_writer