《愛在。貴族學園》: Ch 6 ~ 張韻喬同學，請你幫一幫忙吧（下） Part 2

Ch 6 ~ 張韻喬同學，請你幫一幫忙吧（下） Part 2（連載日期：2021/10/10）

俊軒、天殷同禮謙三個，就喺度交換眼神，佢地都覺得韻喬會係一個理想嘅對象「小喬返咗黎啦！咁你諗住點做呀軒仔？」

天殷細細聲咁同兩個男仔講，但係俊軒就好驚咁回應話「你…..你地覺得小喬真係肯咩？」

「都話咗要包裝囉，我同你講咗幾多次啫？你聽唔聽我講嘢咖到底？」天殷好唔耐煩咁講，但同時都揸實自己個拳頭

「不過今次呢，睇黎都係要等老娘我親自出馬咖啦！」





「你出馬？你諗住搵邊個先？」兩個男仔異口同聲道。

天殷於是就將眼神，轉向坐喺位上面嘅韻喬，而兩位男同學瞬間就明白天殷嘅意思

「係喎！等張韻喬同學黎扮咪得囉！反正林家之前都唔識呢個女仔。」禮謙低聲問道「不過，要小喬同學扮嘅話，會唔會太委屈佢啊？」

「其實都可以試下啊，反正我屋企都唔會同佢屋企有任何接觸咖啦」俊軒突然間笑笑口講，而且態度都甚為輕佻。

可能都係因為可以同自己心愛嘅女仔，享受幾個鐘情侶身份嘅滋味，所以就笑得好奸下。





「算啦軒仔，見到你個咁嘅死人樣，都係等我黎幫你問小喬啦，我諗你機會應該會大啲嘅」天殷無奈道

「雖然呢啲嘢為表誠意，其實就應該要自己去問嘅。但係如果你自己去問嘅話，以小喬性格，基本上就唔會應承你咖啦」

「所以呢，為咗等你機會大啲，就等我幫你黎問小喬啦。」

「不過，講明先呀！我唔包保小喬會應承你呀下，你自己做好兩手準備呀！」

「唔好到時候失敗咗，就走埋黎怪我呀！你夠膽怪我，本小姐我一定會打死你咖！」
 




「好啦，多謝天殷你肯出手相助呀！今次…今次真係靠哂你啦！放心我真係唔會怪你」俊軒聽到天殷咁講十分感激。

但同時又提出自己嘅憂慮「不過，你諗住點同張韻喬同學講呀？」
 
「點講？咪直接同小喬講囉，我可以點做呀？」天殷再一次非常不滿咁回應道

「鬼叫學霸你唔提供方法carry我，等我可以包裝囉，咁我自然就冇其他好辦法可以carry到你啦，係咪呀呢位施主！」
 
「咁我真係諗唔到啊嘛！你依家喺度話我都冇用咖喎？！」俊軒抗議道。
 
「哼！鬼叫平時其他女仔對你咁順攤呀？你就好似完全唔使用腦咁，要問人電話號碼下下都一問就有。又唔見我地其他男仔好似你咁，有成百個女仔嘅電話號碼？」禮謙又再一次放下謙謙公子嘅性格，見到有位入就喺度寸俊軒。
 
「喂程禮謙你出少句聲當下幫忙得唔得啫？寸得你咁開心下話？」

「好囉，之後如果我唔carry你嘅話，我肯定你啲test就一定死緊！」俊軒心有不甘就當然要反擊「好啦，真係唔該你啦。我愛死你啊殷殷！」俊軒色咪咪咁對住天殷講。





「鬼愛你啊你個死鹹濕佬！」天殷一面嫌棄咁回應「你都唔知係咪真嘅，假到死，係人都知道你對小喬有意思啦！」

「咁我返埋位同小喬講啦」「唔該你！」講完呢句之後，天殷就坐返去韻喬隔離。而俊軒同禮謙就負責睇戲。
 
「喂早晨啊親愛嘅喬喬！今日auntie又買咗咩畀你做早餐呀？」天殷先同韻喬打招呼，當然，打招呼都係要講下廢話先，如果唔係直接就講嗰件事嘅話，就算再蠢嘅人都會有戒心嘅。
 
「早晨呀！李家大小姐！」韻喬一路睇書，一邊食早餐，再一路回答天殷。

不過，韻喬都聽到天殷對自己嘅早餐有意思，於是就畀天殷睇一睇「冇呀，呢個包係我今朝上巴士之前，喺巴士站附近間麵包舖買嘅」

天殷於是探頭看過究竟，然之後就話「睇落都好似好好食咁嘅？」

「做咩呀？李家大小姐居然對我個早餐有興趣呀？」韻喬笑一笑之後講「使唔使我聽日買一個畀你試下？」





天殷聽到韻喬話買一個麵包畀自己試下，其實心裏面都好高興。

但係韻喬就話「不過呀，你地啲大小姐唔係習慣喺大屋裏面，食個好豐富嘅早餐，先至再由司機送返學校咖咩？」

「係就係」天殷一面唔好意思回應「咁…我見到個麵包咁靚咁新鮮，所以咪對佢有少少興趣囉」

「咁我聽日幫你買一個啦！」韻喬諗咗一諗之後就話「好呀！多謝小喬！」
 
雖然吹咗一陣水，但係天殷其實都冇忘記要同韻喬傾計嘅原因

「喬喬呀，我有少少嘢想問你咖…」「嗯？做咩呀殷殷？」韻喬繼續喺度食早餐「關於功課咖？」

「唔係呀小喬」「少有喎，居然唔係問我要功課參考。咁你想問我啲咩呀？」

此時喺遠處嘅俊軒同禮謙，已經非常留心注意天殷同韻喬嘅對話





「我係想問…你今日放學之後，或者聽日放學之後有咩做呀？」天殷慢慢開始講幫助俊軒嘅計劃，同時神色都比較認真......

（待續 ~）

IG link https://instagram.com/bear_big_big_writer