《愛在。貴族學園》: Ch 5 ~ 張韻喬同學，請你幫一幫忙吧（上） Part 4

Ch 5 ~ 張韻喬同學，請你幫一幫忙吧（上） Part 4（連載日期：2021/10/03）

「唉，唔講由自可，一講起就把幾火啦！」俊軒突然之間情緒非常亢奮，好大聲咁講

「入面呀，成班都係啊叔同auntie喺度，大我少少嗰啲姐姐，就嫌我太細個，照顧唔到佢......」

「於是我咪就係好似Eason首《浮誇》”那年十八 母校舞會 站著如嘍囉“咁，樣衰到核爆，都唔明去黎做乜！？總之我以後唔想再去呢啲咁嘅鬼地方啦！」
 
「Wow！原來聽你咁形容，都好似好風趣咁，唔錯唔錯。」「我頂你啦，兄弟有難都仲喺度寸我！」俊軒有少少不滿咁講。





「但係我覺得啦下，你都係可以試下去你個價值連城嘅名單度搵，睇下有冇女仔肯配合你先嘅。」禮謙深思之後再提出建議。

「如果搵完都真係唔得嘅話，咪到時候再諗辦法啦，你點都應該有橋可以解決到嘅，學霸軒。」

「係啦，我突然之間有野做，係咁先，唔講住啦，bye」就係咁樣，禮謙於是就cut咗俊軒嘅電話。「頂你！！」

就係咁樣，俊軒就嘗試去佢個contact list裏面，搵幾個平時比較傾得埋嘅女同學，嘗試説服佢地幫手去扮自己個“女朋友“。

雖然啲女同學如果真係做俊軒女朋友嘅話，大部分都應該會應承。





但因為今次要”見家長“嘅關係，再加上都係因爲要幫俊軒講大話，班女同學其實都會覺得委屈，基本上就係上去畀人玩。

所以個個都直接拒絕俊軒，結果來來回回之下，俊軒嘅“後宮”冇一個願意去做呢個角色。
 
「唉，搞咗我成晚，一個女同學都唔肯應承，都唔知點算好」俊軒自己一個坐喺書枱前面同自己自言自語，而且喺腦海裏面，佢一浮現到自己又要出席相睇party嘅畫面，就顯得格外不安

「早知唔玩到咁大啦，睇黎我最後又要去嗰個變態party咖啦，而且我老婆好大機會一係就仲大過我阿媽，一係呢就成pat豬油塞住個腦嘅，唉我林俊軒感情路上真係悲哀呀！」

俊軒一諗到自己讀書成績咁好，外表又喺學校裏面數一數二，將來個老婆根本就應該要配一個同自己差唔多年紀嘅美女先係，邊會有可能會喺咩auntie或者肥婆先係咖。





不過，正當俊軒仲喺自己個位度愁緊嘅時候，突然佢醒起有一個人未問。

冇錯，就係同班嘅李天殷同學「唔係喎，殷殷話哂都同我有啲交情，我唔係應該都要試下問佢咩？」於是俊軒就即刻打開個Signal，向天殷求救......

「5A林俊軒：Heyhey殷殷同學，我想問依家你方唔方便講兩句？        21:38」

初時天殷都冇即刻回答俊軒，俊軒佢一等，就等咗差唔多一個鐘頭。

不過喺呢一個鐘頭裏面，對於俊軒黎講簡直就係煎熬。所以當佢收到天殷回覆嘅時候，人生先再有一絲希望

「天殷：咦，稀客喎。唔好意思呀，啱啱行開咗依家先見到       22:29」
「天殷：搵我做咩事呀俊軒？     22:30」
「5A林俊軒：唔緊要，我搵你……呃…其實……我都唔知道要點樣開口同你講，不過我有啲嘢其實想你幫一幫我手啫      22:32」

於是俊軒再將整件事同天殷講多次。




 
不過，天殷並冇直接喺Signal上面回答，而係喺得到俊軒同意之後，就直接打電話畀對方。

喺俊軒接電話之後，天殷就隨即大笑「哈哈哈哈！正一傻仔黎！唉呀笑死我啦今次！哈哈哈哈哈！」

「唔好笑囉，李家大小姐！你知唔知去嗰啲場合呀，真係比死更難受呀！」俊軒有少少不滿情緒，但天殷就好輕佻話

「車！依家又唔係我去，我點知你咁多嘢啫？」「頂你啦！」「搞錯呀！學霸做咩放咗學之後就咁爛口咖？」天殷不滿咁抗議道。

而天殷又趁機會繼續問俊軒「但係你係唔想去相睇啫，都唔使講個咁大嘅大話黎呃auntie下話？好啦，依家學霸你今次真係自己玩死自己啦！！」天殷非常强烈咁恥笑俊軒，搞到喺電話另一面嘅俊軒，塊面已經黃哂。

但天殷就繼續講落去「嗱好坦白啦軒軒，雖然我見你都好似好慘咁，本來都想話賣個人情想幫下你嘅......」

（待續 ~）





IG link https://instagram.com/bear_big_big_writer