《愛在。貴族學園》: Ch 4 ~ 遲到 Part 1

Ch 4 ~ 遲到 Part 1（連載日期：2021/09/19）

（回復第三人稱視角）就係撞跌書事件當日嘅夜晚，喺林俊軒嘅夢境入面，竟然上演住今日下晝放學事發時嘅情節……

（林俊軒視角）
 
「啊！唔好意思啊林俊軒同學，我唔係有心整跌你啲書咖！」張韻喬同學喺撞跌我啲書之後，帶住一點歉意同我講「不如我幫你執返起佢地啊？？」
 
「唔緊要啦張韻喬同學，係我自己睇唔到你經過啫。不如我同你一齊執啦？」講呢句嘅時候，突然間成個人好緊張，到底應唔應該順便要埋張韻喬同學嘅電話號碼呢？

嗯，經過一輪腦交戰之後，都係順便問埋啦，反正都係時候要完成大滿貫啦。
 
「唔該哂。」執返起啲書之後，我就同張韻喬同學不停講唔該。然後我決定要實行我嘅計劃「啊，張韻喬同學」

「係，有咩事我可以幫到你咖？」佢嘅笑容真係好甜呀，加油呀林俊軒！

「張同學，我…呃…我….可唔…..可以….要…..」
 
「你想要咩啊？講到一舊舊咁」死啦，張韻喬同學已經開始用好奇嘅眼神望住我啦。得唔得你都係鼓起勇氣啦林俊軒！只許成功不許失敗呀！
 




「張韻喬同學，我想同你……交換電話號碼，始終大家都係同班同學，有咩班上嘅嘢同學業上都方便啲，唔知你o唔ok呢？」
 
張韻喬同學佢諗左幾秒，而且面色都同頭先有少少唔同。不過喺幾秒之後，佢就話......

「哦，好呀，咁你拎支筆同memo紙畀我，等我寫畀你啦」
 
我二話不説就喺書包拎左支筆同memo紙出黎，然後交到張韻喬手上「嗱，呢度俾你寫上去啦，唔該你」
 
「Thanks」然後張韻喬就開始寫。估唔到張韻喬同學佢咁快就應承我，早知佢係咁爽快嘅話，就唔使同謙謙喺上堂嘅時候喺度度呢度嚕啦！
 




隨住張韻喬同學佢一直寫，心裏面就有無比嘅興奮“Yes！我得咗啦。終於可以儲齊全級女同學電話啦！”
 
「嗱，軒軒，呢個就係我電話號碼，你自己收好佢啦，如果有咩功課想傾、想要幫手或者其他話傾閒計嘅話，你就搵我啦，不過都要我得閒先得喎」張韻喬話。

「明白啦，多謝你啊，張韻喬同學！」我臨急臨忙同張韻喬講多謝。

「軒仔，你唔好再叫我張韻喬咁見外啦，以後你就叫我韻喬，或者叫我小喬都可以咖！」佢微笑住同我講，同一時間佢塊面都好紅，唔知道係咪因為怕醜呢？
 
啊！張韻喬同學佢真係好可愛啊！如果我都有一個咁甜美嘅女朋友就好啦。

「好啊，小喬同學。我返去add你啊，咁我地聽日返學再見啦, bye bye。」

之後因為我趕時間嘅關係，所以我就急急腳就離開課室衝去校門，其實都係因為我有少少怕醜，所以先走得咁快……

「鈴鈴鈴鈴……」可惡嘅鬧鐘將我呢個仲訓緊喺床上嘅大少爺，（呃應該係二少爺先啱，因為我仲有一個喺英國讀書嘅家姐，）冇錯，就係我，林俊軒，嘈醒咗。





「我點解會……點解會…….發到一個同張韻喬同學有關嘅夢咖！？天啊，救命啊！冇可能、冇可能咖！林俊軒你冷靜小小先啦！」我不斷咁嘗試喺度說服自己，尋日放學嗰陣喺班房發生嘅事，只不過都係恰巧咖咋。

而且講真啦，張韻喬同學又點會咁容易俾佢電話號碼我啦。如果係真係咁容易呀，點解我會過咗咁耐，成幾年都拎唔到個電話號碼呀？

不過我都有再反問自己，其實到底我係咪唔夠主動呢？定還是我之前太過高調去周旋喺其他女仔之間，搞到張韻喬同學對我有戒心……？

然後我居然自己發起夢黎，呆咗喺度差唔多成半個鐘頭有多…..「咯咯」突然之間就有人敲我房門......

聽到之後個人真係醒左，於是我就對住門口問「請問係邊個？」

（待續 ~）

IG link https://instagram.com/bear_big_big_writer