《愛在。貴族學園》: Ch 1 ~ 中五那年的數學堂 Part 3

Ch 1 ~ 中五那年的數學堂 Part 3（連載日期：2021/09/03）

「天才喬！依家得你先可以救我咖啦！你今次一定一定要幫我啊喬喬！」...

韻喬被天殷過於誠懇嘅表情嚇到，於是就一臉好奇咁問天殷「做咩啊李家大小姐？你會唔會浮誇咗少少呢？講到我好似聖母咁！？」

「你要記住一樣好重要嘅嘢，我同埋你，應該話我同大家其實都係一樣，都係human beings黎咖咋！」

天殷繼續一臉緊張咁講「咁human beings都有分好多種咖嘛，又唔係個個都好似你咁，聰明到年年都考第一喎。」





「黎啦，小喬呀，頭先Mr Ho咪話，下個星期咪會有數學quiz嘅？我其實由開學到依家，都未聽過嗰個老嘢講書呢！」

「嘖！你真係吖！好心你啦李天殷！平時上堂就專心啲啦-,-，我地過多年幾就要考DSE咖啦，你係咪想到時冇U收，要放榜周圍去十一大、十二大度撲學位啊？」韻喬一面無奈咁教訓佢身邊懶到出汁嘅好姐妹。

不過天殷就一面委屈咁繼續望住韻喬，搞到韻喬都開始心軟「哎呀，你唔好用個咁嘅樣望住我啦！」

但天殷依然面不改容，仲用手捉住韻喬「喬喬呀，黎啦，幫下呢個可憐嘅我啦！」

再過多一陣，韻喬見天殷都仲係咁望實自己，於是都係被逼破防「哎呀！怕咗你個皇帝女啦真係，咁你係咪要我幫你吖？」





天殷聽到韻喬咁講，表情瞬間轉晴，天真地道「知我者莫喬喬也！錫哂你啦！遲啲再請你食飯！」然後天殷就真係準備一嘢錫落去韻喬度。

天殷既然都講到咁，韻喬都完全冇佢符，冷冷的道「喂呀李天殷，你啲口水呀！真係冇你咁好氣。好啦、好啦，我幫你啦！不過唔該你以後上堂專心啲啦！唔好下下都要我放水畀你呀！」

「知道啦，多謝你啊喬喬！」天殷一臉感激咁望住韻喬。之後韻喬繼續聽書。

不過上上下堂嘅時候，天殷老毛病又開始發作，因為佢又開始嫌Mr Ho講得太悶而唔聽書，喺自己個位做自己嘢。

韻喬見到咁樣嘅情況，覺得天殷言而無信，於是就出聲話對方「喂喂喂！李天殷小姐！你頭先幾個字之前應承過我啲咩咖？」





「我同你講呀，如果你再唔收埋佢，然後專心聽書嘅話，我就以後都唔幫你，等你次次派quiz之後放學要去402做數！」

天殷聽到之後當然好驚，於是就拿拿聲收埋手上做緊嘅其他嘢，然後拎返Maths嘅筆記簿出黎，然後就抄寫Mr Ho喺黑板上面說寫嘅數學例題。

而韻喬見到之後就露出一絲冷笑「哼！都算你醒目！果然都係要靠嚇先有用，哈哈哈哈！」
 
「Good bye class！」「Good bye Mr Ho...」經過個幾鐘嘅瘋狂車輪式嘅講解，難捱嘅數學堂終於上完，有聽書嘅同學都已經覺得好攰。

至於發夢嘅就應該雲遊太虛去到大西洋，但更多同學都已經將本書訓出一灘口水。

喺上通識堂之前，大家都趁機會，抱怨一下Mr Ho「何Sir都癡線咖，無時無刻都要quiz！」「都唔知Mr Ho個位收埋咗幾多個version嘅quiz卷喺度！」「肯定有多過500個version啦，好似珍藏咁！」「我就覺得有1000啦，基本上班班都唔同題目嘅！」「真係好變態呀......」

「嘩你地班人，做咩喺度講何sir壞話呀？仲要講得咁大聲！」通識科老師Ms Wong入到5A班房之後，都用一種另類嘅方式，去提醒佢地。

「你地係咪都想我呢科都有quiz呀？係就出聲唔好怕醜喎，我好樂意奉陪大家咖！」





全班5A喺聽到Ms Wong咁講之後，即刻變得鴉雀無聲，完全唔敢再抱怨Mr Ho之餘。而且喺上堂嘅時候，仲非常之積極咁喺度抄notes，畢竟大家都真係唔想再有咁多quiz，就唯有喺呢啲位上面取悅Ms Wong，搞到Ms Wong都非常受落，而且心情大好。

（Ch 1 中五那年的數學堂 ~ 完）

IG link https://instagram.com/bear_big_big_writer