《指戒的同棲故事》[完]【純愛】: 39 - 小甜•小敏
我一如既往的在電腦面前埋頭工作，四周是平日的光景，每天也會見到的面孔。
在這平常的日子之中，要說有甚麼不一樣了的事，也許就應該是......
「嘔！......」阿基一面難受的裝作嘔臉。
「做咩呀你？唔舒服呀？」我不解。
對於我的問題他只是一臉無奈加上不肖的眼神說。
「望到你個樣都想作嘔啦，成個電車男咁喺度傻笑。」
「下？我個樣好怪咩？」
「點止怪呀，直頭見到想打鑊嗰隻。」啊基眼神依然鄙視：「家陣畀你追到鬆毛鬆翼呀？你條友真係應該求神拜佛你追唔到，日日見到你個樣都想嘔呀。」
「嘿嘿~可能呢個就係世人所講嘅愛情嘅滋潤啦。」我感覺自己鼻子都向上翹了。
「仆街仔，家陣上咗岸就虐待單身狗咁話呀？」
「咁你都識返個女朋友囉，又或者同nana表白囉~」
「都話咗我哋唔係呢種關係...」他一臉無奈。
「係啦係啦係啦聽到厭呀，你話係就係啦吓。」說罷我就重新投入手上的工作。
「但係呢...唔係話做兄弟嘅唔提你。」
「又想講咩呀？」
「你同candy嘅事，處理好啲。」他用認真的臉孔說著。
「你講咗去邊呀？我哋都唔係依啲關係，我哋係同事兼好朋友~」
「我唔想見你出事啫，總之自己小心啦。」
我一副你小題大做的眼神：「得喇得喇長氣，我去交嘅畀佢啦，走先。」
說罷我就拿著做好的文件就走了。
。。。。。。
我四圍尋找着呀盈想話把文件交她過過目，然而當我走到茶水間時。
眼前正好出現兩個人。
一個是我正找着的呀盈，而另一個則是我不太想見到的人，MJ。
「如果冇其他嘢嘅話我返去先。」說罷，他就轉身離開，經過的時候正好我們對著視線，而他只是眼神閃縮的迴避了一下就走了。
接著我馬上上前。
「啊...Candy你冇乜嘢吖嘛？」我有點緊張的不知道這個人又過來搞什麼花樣。
呀盈看一看我，接著語氣平平的：「會有啲乜嘢？咪就係傾兩句咋嘛。」
「條友之前咁樣發癲，我驚佢又走過嚟唔知對你做乜。」
「佢只係過嚟為嗰日件事道個歉啫，冇其他嘢，同埋...」她稍稍看了我一眼：「我嘅事你就唔使咁操心啦，冇咁嘅需要。」
「咁點得，你係我最重要嘅朋友呀，點可以唔理你畀人蝦。」
她看了我一眼，然後又移開視線。
「有時間做啲無聊嘢不如快啲做好我畀你嘅嘢呀。」
「係嘅係嘅~喺度！」我馬上把手上的東西交給她。
「下...算你幾快手。」
「梗係啦，你訓練出嚟㗎喎~」
「都係嘅。」她淺淺一笑：「而家咁樣我就安心喇......」
「呃？點解咁講？」
「你做到嘢我就唔使幫你執手尾囉。」
。。。
。。
。
時間飛快地過轉眼間已經收工了。
海邊的長廊，夜晚燈飾閃耀著四周，當中可以見到還有一些聖誕燈飾未拆除。
總感覺，那年聖誕節就像昨日發生的事一樣...
「謙！謙！！」小敏輕輕拍了我的頭把我叫醒了。
「你做咩係到發夢呀？」
「呀~冇咩，只係突然諗起嗰年聖誕就好似尋日先嘅事咁樣。」我摸一摸她的臉。
「嗰年聖誕呀~」她想了想：「又係喎，有種感覺，時間過得好快咁。」她跟我牽著的手捉得更用力。
我看著她的臉，臉上是一陣紅霧，使我也有點不好意思。
「話說，小敏我可唔可以問你一個問題？」
「想問咩呀？」
「點解...你會鍾意我？」我抓抓後腦。
「你點解咁問？」
「冇，只係突然間想知，明明畀我出色嘅人仲有好多不過點解係我？」
她看著我，眼神有點無奈。
「下...」她輕輕嘆息沒好氣的說：「謙，呢個係你個壞習慣。」
「呃？」
「對我嚟講你已經好出色喇，只係你自己唔覺得自己好。」他用手指篤了篤我的臉。
「乜係咁咩？」
她雙手摙著我兩邊臉蛋：「係呀，你比你想像中更加好，你嘅好我全部都知道，所以我至會鍾意你。」
「係...係咩......」
她放開手，接著順勢走到我的心口靠著。
「你又溫柔又為人着想又願意保護人，我就係鍾意咁樣嘅你，同你一齊我好安心~」
她說著說著，不經不覺我感覺到自己的臉有點熱。
「不過呢~我都好唔鍾意你啲壞習慣。」
「唉？！」
「例如你有時冇自信啦，又或者咩都收埋係心唔比人知，我唔鍾意咁樣，你成日咁樣搞到我好擔心㗎。」她把頭側開，感覺有點鬧別扭。
「sorry呀小敏，依啲我會努力改好佢，要你擔心唔好意思......」
她伸一伸小舌，接著用手摸我的頭。
「咁就乖喇，好叻好叻。」
我感受著頭髮傳來的觸感，既甜蜜又溫暖，有如暖流一樣直到心窩。
「果然，小敏你好溫暖，有你係喺我身邊真係好幸福。」我捉住他的手拉到臉上，把臉上的熱力傳到她的手心。
她聽了後馬上收起手來。
「仲有你呢樣都唔好！......」
「吓？！」
「成日偷襲完人又當冇事發生，你咁算點喎...」
「呃？！偷襲？」
「係呀！成日唔覺唔覺就做啲令人唔好意思嘅嘢，但係之後就可以冇咗回事咁！」她翹著手鬧的別扭變得更嚴重了。
「對唔住......」
「唔接受，唔原諒你！」
「呃？！？！」我非常無奈。
「咁你想我點樣做至唔嬲我？......」
她生氣的樣子雖然也很可愛，但還是盡快平息一下比較好。
她看了我一眼，接著手指指向坐落在不太遠的一間酒店。
「請我去住一晚我就原諒你。」
「呃？！？！？！？！」這刻我真的有點驚慌失措。
「做乜嘢呀？唔得呀？」
「唔係呀，不過...點解係去酒店？」
她低著頭有點不好意思的說：「有一次我地出街，你約我喺酒店等，我咩都準備好曬你就唔帶我上去...我嗰陣時真係有啲失望囉......」
說罷，她就用水汪汪的眼睛看著我：「得唔得呀？」
試問有哪一個男人能夠抵受這樣的誘惑？
「如果你可以嘅話冇所謂啦......」
「嗯~」
然後我再次牽起她的手向酒店走去。
筆主的話：
本身打算減情節...但最後都係算了。
反正差不多~~
下一話正式進入結局篇~