《指戒的同棲故事》[完]【純愛】: 05 - 咒語·言緣
「小敏，做緊咩呀？」MJ走到她旁邊，左手就差一點碰到她的腰，正面看得我不是味兒。
「冇呀，傾下計啫~」小敏回望他。
「係咩~」他看了我一眼，微微一笑：「Sorry呀~啊謙，佢係咪煩到你？等我幫你教訓佢~」說罷便一手拉下她的馬尾。
「喂！好痛呀，咪拉啦。」她說着，同時用力拍他的手臂。
他的出現打破了眼前的美夢。
明明剛才還和小敏有傾有講，現在一瞬間，煞風景的人就變成了我。
「呀...佢冇煩到我，哈哈。」我淺淺一句，盡力把不快吞回肚子。
「咁就好~你知佢㗎啦傻更更咁樣~得罪咗人都唔知咩事~」MJ一邊說一邊拍她的頭。
「你個MJ！成日串我...」她扁著嘴說。
「哈哈，咁我講事實啫~」佢笑笑，手依然拍著她的頭。
「喂呀！咪拍啦，唔蠢都俾你拍傻啦。」她拉下他的手，現在他們順勢拖著了對方。
他們一臉快活的玩着，有如世界只剩下他們一樣......
其實世上最難受的事情從來都不是單戀或失戀，這些隨著時間都可以過去，真正難受的是你看到但控制不到，這一事。
為什麼他們可以如此親密？有如交往中的情侶一樣...
看著的我真的痛苦萬分......
「係喇，啊謙你哋嗰組邊個跟緊新project？」MJ突然一問。
「呀...呀Candy……」我的眼睛看向別處，真的不想和他有眼神接觸。
「哦~Candy呀，我仲以為係你添~~」
「下？」他突然一句，令我有點驚訝：「...點解係我？」
「冇呀，見你咁耐冇乜成績咁，諗住你都係時候做返啲野咁~」他笑說
「！！！」
聽著的我雙手早以握成拳頭，他的意見就算不是當事人也聽得出絕對不是單純的問候。
「喂MJ…」小敏擰著頭，想把他叫停。
「哈哈，講笑啫，唔講邊有得笑~」他依然笑著。
「啊謙唔會咁小氣咁就嬲嘅~」
看著他猙獰的面孔，真的想就這樣一拳打下去，可是，我根本就沒有這個選項......
我的選擇只有一個，就是忍耐下去。
處於下風的我根本就沒有還擊之力......
可是...
心，真的很不甘心......
在心愛的女人面前戰敗的感覺，真的很難受。
「咁當然啦~ 依個男人不嬲都冇皮氣嘅~」
突然一把女聲從門口傳來，眼睛一看，是她。
「Candy咁啱嘅~」小敏，興奮的走向她，牽著她手
「冇呀，諗住入嚟斟杯水咋嘛。」雪盈也牽著她。
「點知畀我聽到啲得意野。」說罷，雪盈向MJ報以一個意味深遠的微笑。
「係喇MJ，我頭先行見到Kenny好似搵緊你喎，你會唔會過去睇下咩事先？」
「呀...嗯，我知喇，唔該曬你candy。」說罷，MJ變慢慢離開了。
「咁我都行先啦，kenny搵得佢應該都關我事。」
接著小敏也跟著離開，這個小小的茶水間只剩我和雪盈二人。
我低著頭默不作聲，現在氣氛真是差極。
接著雪盈走到水機斟好水
「咁我走喇，你都唔好喺度咁耐。」說罷，她就離開了。」
剩下的我呼了一口悶氣。
「搞錯......」
默默一句。
。。。。。。
9：00後的中環比較上午的時候更要耀眼，在這小小的香港入黑後可是最精彩的。
就在一所大排檔的一處
「嗯..嗯..嗯..呀！......」我爽朗的喝下一杯冰冷的啤酒，酒精的感覺真係太美妙了~
「好喇，飲漫啲啦，濁死你呀。」阿基說着，一邊拍我背脊。
「兄弟！今晚陪我不醉無歸！我今晚真係好需要你！」我捉住阿基大叫，真的有點醉呢。
「邊有可能呀聽日唔使返工咩~」阿基一臉無奈：「好喇，你唔好飲咁多喇，我送唔到你返去呀~到時你瞓街㗎啦。」
我聽到後靜了一下，呆呆滯滯看著他：「係喇係喇~ 你要返去陪老婆呀嘛，知你籠嘢啦，都唔知你前世做咗咩好事，可以畀你搵到nana咁好嘅女仔......」
「唉...講咗幾多次我同佢唔係依啲關係，我當佢阿妹㗎咋。」
「係嘅，係阿妹，阿妹晚晚同人傾電話咁開心~」
「咁...佢一個人喺美國悶咪陪下佢囉......」
我整個人攤在枱上：「個個人都有人陪係我一個A0仔孤零零...又廢又冇用......」
「你有我吖嘛，兄弟~」阿基笑笑說~
「妖~要個男人有鬼用咩...我要小敏呀......」憑著酒勁我又再一次表白。
「唉...成年啦，你哋都冇咩進展不如轉下target咪仲好，全世界又唔係得返佢一條女。」阿基語重心長
我搖一搖頭：「冇人可以代替佢...佢係最特別㗎，冇佢冇我......」
「唉~」阿基也搖頭：「人哋都冇望你啦，你點追啫。」
「之前有望㗎......如果唔係MJ條PK…...」我迷糊說著
「咁人哋又真係叻仔嘅~ 佢溝到係佢本事~」阿基笑笑說
聽到阿基這樣一句，感覺突然就清醒了一點。
「我唔會輸......」我輕輕說
「下？你講咩話？」
我站了起來：「我返去喇。」說罷，吧二百放到枱上轉身就走。
「喂！你得唔得呀？」後面的阿基叫著，我只是揮揮手示意就走了。
。。。。。。
回到家中已經不多11：00。
我打開大門，發現四邊沒有開燈只有電視機的光照著。
雪盈穿著睡衣就坐在沙發上看著書，戴著眼鏡的她比起平時多了一份文雅味道。
「返嚟拿。」她看一看我，發現一身酒氣的我也有一點驚訝。
接著她放下手上的書站起：「做咩你飲到咁呀？」
「呀...冇......」我說不出什麼。
「坐低先啦。」她走到廚房，拿了一杯水出來：「飲啖水先，會好啲。」
「嗯...唔該。」我接過水杯喝了一口，現在的我已經清醒了一點。
她坐到我旁邊，我看著面前的她：「今日唔該晒...」
「嗯？」
「係pantry嗰度...」我再飲一口水。
聽到的她淺笑一下：「好少事啫，佢真係過份在先。」
「係呢雪盈，可唔可以問你個問題......」
「咩呀？」她有點不解。
「我係咪真係好冇用......？」我緊握著水杯
四邊片刻寧靜，接著她翹起手來。
「你？認真講，都有啲嘅~」
「不求有功，但求無過係最差嘅地方。」
她不留情面的話，直接擊中我的內心，果然她是女王。
「人唔向前行，就唔會得到想要嘅未來，依個係基本中嘅基本。」
聽著她的話，我無法反駁。因為自己很清楚，這是事實。
其實，自己不是一切都清楚嗎？
可是，為何還是心有不甘？
「但係，你都有優點嘅~」她笑說
「矣？優點？」
她笑了笑，接著輕輕打了我肩膊一拳。
「你都係一個唔服輸嘅人嚟。」
聽到的我忍不住笑了。
「唔服輸，我係咩？」
「唔係你為咩整唔見我隻戒指呀？」她笑容可怕起來。
「呀...真係好對唔住......」我把眼閃開了。
「呀其實我唔介意㗎啦，唔洗咁緊張喎~」她依然笑著。
「唔好呃我啦，你咁嘅樣點會會唔介意~」
「哈哈哈哈哈~」接著我們都笑了起來。
「雪盈thank you。」我微笑說
「下次改埋唔洗人哄就最好喇~」
「我會比心機......」
說罷，我就回到房間，在關門前，我又偷偷看了客廳的雪盈一眼。
嘿~ 這就是女王大人溫柔的一面~
感覺也不壞呢~
。。。。。。
在小小的房間裏，我跟兩位女王四目交頭。
現在的我真的緊張得要命...
突然，霞姐開口了
「啊謙，今日開始你就同雪盈一直負責個project。」