撞鬼咩地產Agent(實體書已經出版): 鬼影幢幢
鬼影幢幢
「嚟緊東九龍有個新盤開賣，聽講好猛料。」鄰Team的Lo哥對Kelvin說。
「有幾猛？開價好平？」Kelvin問。
「唔係，係哩個盤前身猛。」Lo哥答。
「早幾年咪有單迷李倉火燭嘅，後來拆咗咪起樓，就喺哩個盤。」他們的經理Patrick開口道。
「咁咪好邪？」鄰Team另一同事芙蓮姐說。
「咪生人唔生膽，又唔係你害佢，怕咩？再講，哩個世界邊有咁多鬼。」Lo哥搶白道。
這是今天下午我偷聽到鄰Team的對話，然而，相似的對話在傍晚時在我們Team也出現了。
「聽日十一點我哋會去Preview東九龍個新盤，大家準時。」Kerry在會議最後宣布。
「聽講個盤前身係出過事。」Justin說。
「吓？咁咪好驚？」Rita顯得有點害怕。
「勁驚囉，會唔會有鬼㗎？」Fion也直話直說，令Rita更加害怕。
「唔會有嘅，哩啲做哂法事超渡哂㗎嘛。」我嘗試安撫她們。
「有無聽過佐敦嘉利大廈？」Alex不懷好意的說，明顯是想嚇她們，但想不到她們竟然搖頭表示沒有聽過，Alex只好當沒說過，不多加解釋，怎料卻有人衝出來認叻。
「我知，嗰時大火燒死咗好多人，後來拆咗重建，但都有好多靈異事件，啲人會聽到有人叫救命、聞到燒焦味、甚至見到燒燶咗嘅人，做幾多法事都無用。」Chris說，他就是認叻的人。
「嘩！乜咁恐怖？哩個盤我唔做喇。」Rita和Fion異口同聲說，Kerry雙眼厲了Chris一眼，他也知道自己說錯話，連忙解釋︰「啊，你個Alex呀，引我講錯嘢。嗰啲都係江湖傳聞，無根據嘅，嚇吓人啫，唔可信嘅。」可是已經於事無補，她倆已經認定那是猛鬼公寓。
「放心喎，一定唔會有鬼。」我十分肯定的說，她們對我的肯定帶有懷疑，所以我繼續說︰「你估個發展商買塊地返嚟之前知唔知發生過咩事？你估佢為咗工人安心、買家安心、住客安心，會唔會有啲咩儀式特別去做，會唔會喺棟樓入面再加啲保護？做咗咁多功夫，你覺得仲有啲咩會留得低？而且成單嘢都係死咗兩個消防，邊度會有你哋諗得咁恐怖。」
她們聽後，一時之間未能意會，前後花了約十分鐘才終於明白，但我們早已討論完畢了，她們也同意翌日一起去Preview，但其實她們也不能不同意就是。
時間一轉，已來到翌日的十一時，我們準時去到示範單位，參觀過發展商搭建的數個不同戶型的清水和有改動單位後，我們便去到大樓模型處等待發展商的代表以及主區同事Briefing。
這都只是例行解說，沒什麼特別，反正就算這屋苑真如嘉利大廈般有嚴重鬧鬼事件，也不會出現在示範單位。
在Briefing後，因為示範單位跟屋苑所在都是同一區，所以Kerry便著我們去看地盤︰「最近我哋區都未有咩新盤好推，今次哩個個價收到風應該啱射，係我哋射程範圍之內，所以要認真去睇睇。」
「睇地盤會唔會見到嗰啲嘢㗎？」Rita擔心的問，害早已忘記此事的Fion也一塊擔心起來。
「日光日白呀阿嬋，邊會有呀？」Alex搶白，大家千萬別誤會，雖然Alex看似經常針對她，但其實我們是很好關係的，反而是關係太好所以才會互相開玩笑。
「咩阿嬋呀？我唔係大你好多喳。」Rita反駁。隨著我們的你一言，我一語的互動，大家也帶著歡笑向地盤進發，早已忘記了什麼鬼鬼怪怪了。
步行了十數分鐘，便來到地盤所在。這屋苑會新建一段天橋接駁原來的天橋，然後直達地鐵站，所以即使打風下雨也不太怕。我們行到將會接駁天橋的部份，遙望地盤，還只是一塊滿是地基的工地，什麼雛形也未有，而且看似範圍很小，跟剛才規模很大的大樓模型相去甚遠。
「由地鐵站行過嚟五分鐘多啲，可以當係地鐵站上蓋盤咁Sell喎。」Justin說。
「而且哩面已經好多年無新盤開，所以一定有好多人有興趣。」Chris也說。
「勁喎大師兄，果然係做一手嘅材料，留意到啲我哋留意唔到嘅嘢。」我對Chris使用了突擊，他無力還擊，只好弱弱的說︰「啊，Charles你個死仔，我都已經無講啲咩㗎喇。」
「點呀肥婆，係咪無鬼呀？」這次到Alex向Fion發動攻勢。
「死喇你，我好肥咩？」Fion完全錯重點，捏了一下自己的肚，然後說︰「最近真係肥咗啲，我好努力減㗎喇，一陣唔食晏。」
「唔食嘢減唔到嘅，要做多啲運動同食得聰明啲先得。」我立即向她拋出一些專業知識，畢竟我曾經也從事這一行。
「好喇，睇就睇完，而家大家可以收定客先，等佢開價就可以射，而家去食飯先。」Kerry總結。
「我唔食住，我喺附近行吓睇吓個環境。」我對Kerry說，似乎他也立即意會到我的含意，只是簡單拋下一句「咁你一陣自己返鋪頭」便離開了。
在這裡我要先替自己辯護，不是我不合群，只是我真的很少會吃午餐，而且在剛才的地盤中，我還看到工地鬼影幢幢，很不尋常，所以絕對不能袖手旁觀，否則這班建築工人都會成為替身，到時真的會變成猛鬼公寓了。
我在工地外圍繞了一圈，試圖尋找那麼多靈體出現的原因，可惜沒有半點頭緒，加上礙於地盤還在動工的關係，除非我偷走進內，如果不是便無法調查。
「我老實咁講話有鬼索佢哋命，佢哋肯定唔會信，唔會肯放我入去，應該點做先得呢？」我邊行邊思考對策。
「扮工人？唔得，入去有哂登記，又要有牌，無可能。扮行錯路？點行錯都唔會行到入地盤喇，唔Work。真係無咩計，睇嚟只可以喺外圍兜圈，喺天橋度離遠睇吓入面。」我苦無對策，呆站在地盤入口傻傻的看著。
整個地盤的靈體等級都不高，只是數量多得驚人，它們所集合形成的寒氣也不容忽視，我在入口三米外也感受得到。更誇張的是，工人們每人也有一個背後靈跟著，運氣不好的工人甚至有三個依附著他。不過值得慶幸的是，縱然每人也有一個背後靈，但地盤動工到現在數月，還未發生過一宗工業意外，這真是令我嘖嘖稱奇，但再想深一層，難道它們正密謀一次極大的事故嗎？
一想到這，我不由得打了一個哆嗦，如果這想法成真，我現在更加不能袖手旁觀，我人微言輕，但如果是Raymond跟發展商開口，可能事件會有轉機。
「無錯，一定得。」我自己鼓勵自己，然後便走回天橋，居高臨下再觀察多一會，並拍下照片和短片作證。
皇天不負有心人，就在我拍攝期間，正好看到有一個背後靈按捺不住，要出手索命，把本身吊著工字鐵的鋼索弄斷，好讓工字鐵飛墮形成工業意外，這背後靈真的心狠手辣，明明用鐵枝都可以，但偏偏要選工字鐵，令工人完全沒有生還機會。這幕看在我眼裡，不由得大叫一聲︰「小心呀！」但工人根本不會聽到，換回的反而是途人奇異的目光。
「Michelle！」我急忙召喚她幫忙，但遠水救不了近火，眼看鋼索就快斷開、工字鐵搖搖欲墜，竟然有另一個靈體衝過去加入行動，還把本身的背後靈趕走，獨自弄斷鋼索，幸好有剛才的小爭執，工人才有時間離開，「嘭」一聲，工字鐵跌下也沒有造成傷亡。
「又跌？日日都好準時兩點就一次，準時過鬧鐘。」剛好經過的婦人跟旁邊的先生說。
「不過每次都無造成傷亡，真係好彩。都唔知點解咁多次都唔紮實啲，咁落去真係遲早一鑊。」先生回答，隨著他們遠去，我也聽不到後續的對話。
「每日一劑都無事？啲背後靈咁廢？」我對此事有點好奇，突然靈光一閃，有一個想法在腦內閃過︰「唔通係因為啱啱第二個靈體？睇佢啲衣著有啲似消防員，如果可以近啲睇到就好。」我呆望著地盤發呆。
Michelle看穿了我，開口道︰「你入唔到去啫，我入到喎。」之後便飛了過去找那第二個靈體，一會後便帶著他一起飛回來。
「你……你係消防員？」我驚訝道，而他亦點點頭，不知怎的，由他點頭那一刻起，我便覺得整件事也很合情合理，因為消防員的職責之一是救人，雖然當初殉職，但做鬼也繼續貫徹自己的使命，保護活人不受傷害，真的很偉大。
「但我記得單嘢好似有兩個消防員殉職㗎，另一個呢？」好奇的我忍不住問。
靈體消防員聽到我這樣一問，整個也被愁雲慘霧圍繞，如果有背景音樂的話，一定會是奏起那一首由二胡拉奏的、不知名的、經常在舊電視劇和電影中悲慘場面會響起的音樂，他頓了頓，調整好情緒便說︰「阿升佢就係我點解仲要喺度嘅原因。」
「哦？」我很自然便吐出這個音，而靈體消防員也繼續說下去︰「阿升同我一齊殉職之後，佢諗歪咗，覺得個世界欠咗佢，想要報復，於是唔知喺邊度揾到一班孤魂野鬼，要喺度揾人陪葬。」他把我的疑惑一語道破了。
「我唔係無勸過佢無阻止過佢，但可能我牙力唔夠勸佢唔掂，佢已經諗埋哂一面，我又去唔到制止佢，唯有喺有事發生之前盡救。」他言語中帶點自責。
「點解去唔到制止佢？」我追問。
「因為佢身邊有四大高手保護。」靈體消防員越說越激動︰「我太廢，一個唔夠打，我好驚就嚟保護唔到啲人……」
「突然變到咁武俠劇Feel嘅，」我吐糟，然後又認真說︰「我總算知點解個地盤會有咁多鬼揾替身，其實我本身都想去幫手，但我入唔到去。」
「有無試過鬼揞眼？」他隨口說。
「鬼揞眼？係喎，點解我諗唔到？」我被他一言驚醒夢中人，但很好便理智再上線，覺得行不通︰「地盤咁多工人，計埋Michelle都係得兩個去揞眼，點揞得切同揞得哂？」
「鬼揞眼唔一定係揞對方嘅眼嘅，你諗吓先，鬼揞眼嘅效果係咩？」他問。
「令佢睇唔到某啲嘢？」我嘗試作答。
「Bingo，咁你諗到我嘅方法未？」他拍了我一下膊頭，讚揚我的慧根。
「你意思係令佢哋睇唔到我，唔一定係喺佢哋身上落手，而係可以喺我身上落功夫？只要揞住我令我隱形就得？」說完我都有點難以置信，總覺得是匪夷所思。
「Hey man！You got it。無錯，就係咁，你有無試過想揾一樣嘢，但你揾極都揾唔到，叫埋人揾都揾唔到，點知轉個頭就發現原來一直喺你眼前？」他問。
我在記憶中搜索了一下，發覺這情況經常發生，便點點頭，他見到後便繼續說︰「咁唔駛我多加解釋，至於點操作呢，就交畀我地，我會稱哩個方法做『鬼遮人』。」語畢，他和Michelle便圍著我轉了數圈，之後對我說︰「搞掂，行得！不過記住一樣嘢，千祈唔好行出哩個圈，否則就會破法；另外，哩個法對鬼係無用，只有人先見你唔到，記住。」
「Okay。」我簡單應了一句再配合Okay手勢，便跟著他們大搖大擺的進地盤。甫進入地盤，我感到很多無形的壓力，亦感受到四面八方有很多對眼虎視著我，我只好加快腳步，避免不必要的戰鬥。
或者是有靈體消防員的帶領，那些孤魂野鬼始終沒有行動，我們暢通無阻的去到地盤老大──另一靈體消防員阿升面前。阿升身處的是地庫層，平時人跡罕至，又陰森詭秘，絕對適合作為最終Boss的藏身之所。
「歡迎光臨寒舍。」阿升用熱情又陰險的聲音對我們說︰「阿傑，乜咁大禮呀？你終於諗通咗同我一齊報復，所以帶個人嚟上貢等我原諒你？」
只見阿傑低頭冷笑了一聲，然後說︰「咪傻喇！」之後抬頭看著阿升，厲眼喝叱︰「我帶佢嚟就係要阻止你！我諗通咗，既然勸你唔掂，咁強硬啲都要做，我唔可以畀你再行差踏錯落去！」
「阿傑啊阿傑，點解你係都要冥頑不靈？咁即係無偈傾喇？咁唔好怪我唔客氣。無論你帶咩人過嚟都係無用，唔會有人過到我風水電土四災。人啊，喺大自然面前真係好渺小，太渺小喇！」阿升說完，整個人也燃燒起來，而他的四大高手也不知從哪裡突然冒出來。
一時之間，整個空間寒氣極重，大概是「四房」強度，要我一個對付他們，恐怕很難全身而退，不過正所謂輸人不輸陣，我強裝鎮定，輕鬆自若的問︰「你哋幾個都算係高手，個個都可以獨當一面，點會甘心Under佢？唔通你哋無人想做大佬？」本來打算藉此令他們的合作出現裂痕，可是他們就似行屍走肉般，樣子木訥，完全沒有感覺和反應。
「睇嚟你哋真係好甘願做傀儡，生前仲做唔夠，死咗都想繼續做？」我並未放棄，繼續遊說，但他們繼續步步進迫，面無表情。
「我唔想收咗你哋，只想幫你哋投胎，但如果你哋依然執迷不悟，就咪怪我唔客氣。」我口裡逞強，但心裡顫抖得有如黎克特制十級地震般，奈何他們沒有停止的跡象，依然維持同樣的表情向我來襲，我只好拿出我的武器──卡片和頸繩準備應戰。
「阿傑，睇嚟你揾咗個淨係得把口、無料到嘅人嚟送死，我真係多謝你呀。」阿升猙獰得很，差點整個人也笑翻在地。
「你……你掂唔掂㗎師兄？」阿傑也被阿升影響，對我的能力產生懷疑。
我大力深呼吸，吸入一大口氣再慢慢吐出，心裡平靜了不少，然後自信的笑道︰「啱啱的確有啲怯，但冷靜完之後，我已經睇穿咗佢哋，或者正確嚟講係睇穿咗佢！」
阿傑一時之間追不到我的思維，一臉迷茫，我也不多加解釋，只是拋下一句「睇我表演喇」便迎戰。
風水電土四災對應的是颱風、海嘯、雷擊和地震，他們每人也有各自的看家本領，的確，凡人面對大自然的憤怒攻擊自然是無力抵抗，畢竟人類實在太渺小了，但卻被我發現唯一的破綻。
我以打籃球習得的過人技巧，一個低身瞬步便繞到他們四災身後，然後手持卡片胡亂揮舞，最後他們四個便手腳無力、無視關節限制、手腳扭曲的軟攤在地上，一動也不動，阿升看到後立即倒抽了一口涼氣，看得出來有點慌張，而阿傑則傻呼呼的還未意識到發生了什麼事，只懂問︰「點解佢哋好似扯線公仔無人操控咁跌哂喺地嘅？」
「原因你啱啱已經講咗。」我冷靜的答。
「吓？唔明。」阿傑是真的不懂，不是扮作無知。
「因為佢哋真係扯線公仔，有咩可能我啱啱對佢哋講嘅嘢，佢哋連一絲臉部變化都無？連眼都唔眨喎，唔奇怪咩？然後再諗深一層，我連『Villa』都遇過，都未見過有任何一個識用魔法，大佬，你哋係鬼喳，唔係妖魔，點會識用魔法？所以越諗越唔對路，再望埋阿升，自從哩四隻嘢出現之後，佢啲手指無停過，雖然好輕微，但都係畀我發現到。然後再仔細望埋周圍，好彩人眼識調節，啱啱適應咗黑暗環境，你望吓四圍，有好多冷氣風口位，你就知點解凍咗咁多，我都差啲畀佢大到，我估佢應該最盡都只係『兩房』，淨係識故弄玄虛。」我一口氣解釋清楚，阿傑終於恍然大悟，作為對比，阿升則害怕得滿頭大汗。
「精精哋你就束手就擒，慳返大家啲時間同功夫，否則就唔好怪我唔客氣。」我氣勢十足，指著阿升說。
「呢段時間建立返嚟嘅嘢，我唔會咁輕易放棄，我要攞返屬於我嘅嘢！」阿升進入失控狀態，向我飛撲過來，我擺好姿勢準備迎戰，可是……
「小心呀！」阿傑二話不說衝出來替我擋下他，害我白擺了帥氣姿勢。
「阿傑，你都要睇吓個形勢先得㗎，明明我Pose都擺好，準備好型咁擋住佢㗎嘛……」我抱怨道。
「Sor，不過身體自然反射就咁。」阿傑一邊道歉，一邊輕鬆捉著阿升。
「好惡，你幾時勁咗咁多？」阿升奮力掙扎，但完全掙脫不了阿傑雙手。
「佢勁咗係正常喎，日日都有唔同情況畀佢當鍛鍊，邊似得你做山寨王，玩扯線公仔？」我狠狠的嗆他一番，然後再問︰「究竟你想攞返啲咩？點解唔肯投胎，要喺度揾替身，仲收埋一大班遊魂野鬼一齊害人？」
「哈，做咩呀，想用嘴遁說服我？我唔受哩一套㗎喎，慳返啖氣暖肚喇！」阿升雖然身體反抗不到，但嘴巴依然不肯屈服認輸。
「Okay，fine。我只係想知，之後同返你屋企人講啫，睇嚟都係唔駛幫你轉達啲咩遺言。」我拿著EA證向他走近。
「我……我走得咁突然，我都想返去見佢哋最後一面，所以我先喺度揾替身頂咗我等我可以自由活動……」阿升聽到我提家人，便向我哭訴。
「機會過咗，我已經唔想知。」我走近阿升，雖然他不斷哀求我，讓我轉達他的遺言，但我並未理會，口裡唸唸有詞，然後EAA字樣由EA證飛出，我立即令阿傑放手，好讓EAA字樣能緊緊縛著阿升，繼而拉他進EA證封印他，正當他臨被拉進去之際，我無情的瞪著他說︰「有咩遺言，留返你哋遲啲有機會見到先講喇！」之後他便消失了。
「估唔到你咁無情。」阿傑對我的表現有點愕然，有點吃驚的說︰「連遺言都唔幫佢轉達，佢生前已經講唔到，估唔到死後都依然講唔到……」
「我好似係講留返見到先講喎，況且我哋仲要處理出面嗰班遊魂野鬼。」我並沒有望向阿傑，只是邊收拾邊往地面走去。
甫步出地庫，數十對詫異的目光頓時投向我，我才意識到阿傑和Michelle對我施展的「鬼遮人」效果已經消失，我只好趁被趕走前速戰速決。
「咦？奇怪，」我掃視整個地盤，竟然發現不到半個靈體，不要說沒有半個因為只有一個這等「捉字蝨」的說話，我意思是所有靈體也無影無蹤了，我十分困惑的問同樣跟我一樣困惑的阿傑︰「點解會無哂影？」
「我都唔知……不過既然阿升單嘢搞掂咗，咁我都要走喇。」說完後阿傑便跟我道別。
「等等，有啲嘢我要問埋你先。」我叫停他，問了他一個問題後，他燦爛的笑著跟我說︰「我都知你唔係嗰種人，拜託你喇，我走先，記住幫我同佢講我會等埋佢。」
跟阿傑道別後，我致電給Kerry告訴他事情的始末，並跟他說我要先去一個地方才回去，而他也批准了。
經過長途跋涉的乘車之旅，途中睡著了三次，終於去到大西北的某個公屋單位前，我收拾好心情、調整了思緒、深呼吸後鼓起勇氣按下門鈴。
「嚟緊，等陣。」屋內傳來一把沙啞的女人聲，不一會門便打開了，是一個白髮斑斑的老婦，目測最少年過七十，她身後又傳來了兩把稚嫩的聲音︰「係邊個、係邊個？」老婦叫停了一男一女兩位應該是唸幼稚園或初小的小朋友，然後禮貌的問︰「先生，請問你揾邊位？」
「唔好意思，咁唐突打攪你，我叫Charles，係阿升嘅朋友，請問阿升太太喺唔喺度？」我微笑問道。
「佢去咗返工，六點就收工返嚟，你入嚟坐低等陣。」老婦熱情的招待我，眼見她盛情難卻，我也不好拒絕，便應邀入內坐下。
幸好有兩位活潑的小朋友，時間不算難熬，我還嫌過得太快，不知不覺間，阿升太太已經回來了。
「唔好意思，要你陪我對仔女玩，自從阿升走咗之後，佢哋都無咁玩過。」阿升太太說，她是一位樣子秀麗的女士，只是因為現在要扛下家庭這重擔而有點憔悴。
「唔緊要，佢哋咁可愛，我都唔介意陪佢哋玩。不過今次我係專登嚟揾你，唔知方唔方便同你單獨講兩句？」我斬釘截鐵的問。
她點點頭後便帶我走到露台，並著兩位小朋友去做功課。到露台後，我也不瞞她說︰「其實有嘢要講嘅唔係我，而係你老公，一陣見到嘅嘢都係真，你唔好嚇親。」給了她心理準備後，我把卡片遞給她，教她把卡片屈曲成一圈以看到阿升，接著便拿出EA證釋放阿升。
「師傅，求吓你畀我見多次老婆仔女同阿媽，我想同佢哋講多兩句，見多佢哋一面先走。」阿升一出來便苦苦哀求我。
「老公……」阿升太太泣不成聲，而阿升聽到熟悉的聲音也轉身望去，接著的感人場面和肉麻說話我不好意思描述太多，總之就是還了他的心願，讓他看到家人，並在他小朋友睡覺後才離開。
雖然整個過程只有阿升太太一人看到他，但他也已經心滿意足，還差點給我蓋響頭，最後他亦順利前往投胎。
「唔好要阿傑等太耐，佢去咗幫你探路先。」說完後他便消失於我眼前，而我亦是時候下班回家了。