撞鬼咩地產Agent(實體書已經出版): 垃圾屋
垃圾屋
垃圾屋經常有報導，作為不受歡迎單位之一，經常臭氣薰天，影響鄰居。屋主不停檢垃圾的原因有很多，其中可能背後藏著驚天地，泣鬼神的故事。垃圾屋對旁人的影響固然很大，你可有想過，這同樣對屋主自己做成不能挽救的傷害？
作為地產Agent，處理垃圾屋當然不是我的工作範圍，可是，幫業主追租時遇到，又的確不能避免，只能算是我的一個經驗。
「嗡……嗡……」我的電話震了，來電顯示是張太，某單位的業主。
「喂，Charles，有嘢要揾你幫手。」我一接聽電話，話筒對面便傳來張太氣急敗壞的聲音。
「係，張太，有咩幫到你？」我的氣定神閒跟她形成強烈對比。
「我個單位，個租客已經過咗交租日半個月都未交租，人又揾唔到，變咗租霸，但明明哩幾年一直都好準時，唔知發生咩事，我可以點做？」張太道出她的來意。
「咁啊……租咗幾年，應該都Friend，係好租客先租咁耐，突然消失唔交租，係咪佢轉咗電話同有咩困難？可以試吓上門問問嘅。」我說出我的見解。
「係呀，個客本身自己一個人住，做生意，都做得幾大，對人又禮貌又Nice，無收到過隔離鄰舍投訴，但唔知今個月發生咩事，我又唔識處理，你可唔可以同我一齊去？」張太問。
雖然我也未遇過沒有經驗，但客戶有要求，而我又想從中得到生意，這些加分位送上門，無理由拒絕吧？於是我一口答應︰「好，無問題，我同你一齊去，你想幾時？」
張太聽到我的答覆後顯得放下心頭大石，鬆一口氣說︰「有你咁就好喇，今日晏晝得唔得呢？」
我查了行程，確定時間無問題，便應承了張太下午三點在屋苑入口等，這又是一次自找麻煩的旅程的開始。
由於我未試過做這事，故特地請教一些老前輩，當中另一Team的Lo哥給了我一個很重要的建議︰「哩啲事最好就揾執達吏，唔揾嘅話，都要揾個第三者見證，因為有機會要破門入屋，如果係差佬就最好，無嘅揾保安都得，最緊要有個無關係嘅第三者。」
得到重要建議後，我跟張太商量完，決定到時找保安一同前往單位。
時光飛逝，轉眼便到三點，我準時抵達，數分鐘後，一位衣著靚麗、骨肉均稱、相貌娟好的一位年輕婦人向我揮手走來，我也露出笑容迎接。
寒喧客套一輪，我們便進入屋苑。這屋苑要經商場進入，乘電梯上平台，再往各座樓下，而這屋苑的平台花園佔地也不少，園景、池景、球場景的景色也很美。這屋苑在林林屋苑中間，只有少量單位景觀開揚，所以園景單位是很受歡迎的。屋苑由七座大廈分布成半圓圍著平台花園，其中三、五、六座是中間座數，能享受到園景和開揚景，當中五座更是最受追捧，因為是正中間，景觀是最美麗壯闊，而張太的單位正正是在五座。
來到五座電梯大堂，張太本身打算直接上樓，我叫停她，並詢問管理員︰「唔好意思，哩位係十六H業主張太，想問吓你最近有無十六H住客嘅咩消息？因為張太最近都揾佢唔到，又收唔到租，怕佢出咗啲咩事。」
管理員很快的答道︰「十六H麥生？無喎，佢份人都幾易相處，幾有禮貌，無聽過隔離左右同佢有咩爭執投訴，係最近十六樓有人話有啲異味，不過之後我上去睇過，都唔覺有。但講開又講，最近都好似無乜點見到佢，佢係咪有咩事？」
「就係唔知佢係咪有咩事，所以我哋先想上門揾佢了解吓，不過我哋都需要一個第三者在場，所以想揾你幫吓手。」我道明來意。
管理員為免麻煩，本身不太情願，但在張太再次解釋，而且威逼利誘之下，最終還是就範，跟著我們上十六樓H室。
管理員按下門鈴，一首旋律優美的樂曲隨即響起，無錯，是《歡樂頌》，然而在《歡樂頌》響完後，單位內始終沒有動靜，張太按捺不住，敲門說︰「麥生，我係張太，你唔開門我就爆門喇。」但仍舊無動靜。
由於門鎖已經換了電子門鎖，張太雖然不知密碼，但她有一張備用的門卡，簡單一拍，門鎖便打開，我們便能輕鬆進入。
不過，這或許是一個錯誤的決定。
門甫推開，撲鼻的垃圾味隨即而至，率先映入眼簾的是胡亂堆砌到天花板的垃圾山，寸步難行，要跨過大大小小的垃圾堆才能勉強進到廳內，但依然是垃圾圍繞，蟑螂、蒼蠅滿屋都是。
「Oh shit！搞乜？我間屋唔駛要啦？」眼前景像令張太快要瘋了。
「你啱啱話有異味投訴，之後又無咗，我諗都係哩度傳出嚟，但咁臭點解關門就聞唔到呢？」我不解的問管理員，但都知道是沒有答案的。
「麥生，你喺唔喺度？」我在垃圾堆裡搜索著，全屋搜遍，終於在其中一間房內發現麥先生躺在用垃圾堆砌成的床上，身旁有一個一比一的當紅明星攬枕，我即時呼喚張太和管理員過來。
「佢係咪死咗？」張太開口便問，然後叫管理員檢查，但管理員連忙拒絕。
「放心，佢未死。」我開腔打救了管理員︰「你睇佢，仲有呼吸。」麥先生的胸腔還有起伏。
「唉，污糟邋遢死。」張太邊說邊行去叫醒麥先生，終於把他弄醒了。
「咦，張太？點解你喺度嘅？」麥先生睡眼惺忪的問。
「我嚟追你租㗎，你過咗半個月都未交租，揾又揾唔到人，所以特登上嚟，點知見到你搞到我間屋污煙瘴氣，我唔會再租畀你，唔該你下個月搬走。」張太氣得七竅生煙，立即出逐客令。
「唔好呀張太，我唔搬得走㗎，我會交返租，你畀幾日時間我，我自動轉帳個戶口咁啱唔記得入錢啫，你通融吓，我會交返。」麥先生聽到張太說要趕他走，立即下跪求饒，然而張太並不買帳，依然堅持要終止租約。在聽到張太如此強硬後，麥先生顯得很徬徨，不斷自言自語︰「咁我一定死硬，唔好殺我，我唔想㗎。」
起初我也不以為意，直到我目光再次跟攬枕接觸，便知事情並不是如此簡單，點解呢？因為攬枕上的明星，動作跟剛剛完全不同，像是活人般會郁動。
我藉詞說攬枕很漂亮，嘗試拿起它看，但被麥先生狠狠地打手拒絕，而且面色一變、目露兇光的對我咆哮︰「咪用你隻污糟手掂佢！」這一連串舉動嚇呆了全場人士，而攬枕上的明星表情亦起了變化，露出陰森的笑容。
「係係係，咁我唔掂喇。不過咁靚嘅攬枕，你喺邊買？我我想買返個。」我試圖緩和氣氛，但卻被張太和管理員投來奇異的目光。
「你都覺得好靚呢！」麥先生望著攬枕，中了邪般甜笑著說︰「我都唔知喺邊買，我有日行過樓下見到，一眼就愛上，好自然咁就執咗返嚟。」
「嘩！真係好，我都想執返個，你就好喇，咁都執到。」我繼續無視張太及管理員的鄙視目光，盡力令麥先生放下戒心。
「喂，Charles，你有無搞錯呀？我叫你上嚟幫我收屋，唔係叫你上嚟同佢追星！」張太怒道。其實我又怎會忘記，但要令麥先生清醒，消滅攬枕上的明星「住客」才是關鍵，只是現在我有口難言罷了。
麥先生突然醒起什麼，向張太說︰「張太，你唔好趕我走，我會交租，畀多幾日時間我，我會有錢。我唔可以畀佢同佢啲屋企人無地方住，如果唔係我實死。」
麥先生又再說出會被殺等的說話，看來事情真的很嚴重，而且單位應該不只有一個「住客」，為了弄清數目，我安撫道︰「放心放心，我會同張太講唔踢走你畀你繼續租，不過你話佢同佢啲屋企人，咁究竟Total有幾多人住喺度呢？」張太看到我這樣問，以為我也發瘋了，氣得差點暈倒，沒好氣的走了。
「佢係一個大家族嚟，計埋我，總共有十三個人住喺度，不過我哋相處得好好，無任何糾紛㗎。我同你介紹，嗰度係大哥住嘅，而嗰度係阿爸阿媽……」麥先生指著不同的垃圾堆興奮的介紹，而「他們」果真也逐一現身。待他一一介紹完後，我禮貌的跟「他們」打了聲招呼，然後告辭。
「金翅仆街鳥，估唔到有咁多個『住客』，雖然全部都唔係好高級，應該都係『Studio』到『一房』，但數量咁多都唔易搞，而且佢哋手上仲有人質，睇嚟要揾老闆幫手先得。」我邊行邊想，並跟張太會合。
「張太，雖然有啲難以置信，不過我都要講你知，麥生佢撞咗邪，而單位入面而家總共有十二個『住客』，即係鬼，數量太多我一個人搞唔掂，所以我返到去會揾老闆幫手。我估計所有事情嘅開端係個攬枕，而大大小小唔同嘅垃圾堆都住咗唔同嘅鬼，我諗每堆入面應該都有一件嘢係被鬼附身先會咁，我哋會搞得掂，放心。」我跟張太解釋，但她正如我所料，一頭霧水，將信將疑。
「即係點？我個單位變咗凶宅？」她問。
「當然唔係喇，你單位都無人喺入面唔自然咁過身，所以唔算係凶宅，只係唔乾淨啫，不過如果唔快啲處理，真係好快會變凶宅喇。」我再加以解釋，令她釋疑。
「咁你快啲幫我搞掂佢，變咗凶宅就麻煩。」她心急如焚，而我也不敢怠慢，立刻跟Kerry匯報。
「咁你等我一陣，你同業主行個圈先，十五分鐘後喺屋苑入口等。」Kerry見事態嚴重，立刻動身前來協助。
我跟張太說完後，跟她到會所坐了一會，聊了一會兒樓市走勢，Kerry便跟我說已經到了，我們在屋苑會合後，跟他再詳細說了一次情況，便動身前往單位。
「保安姐姐，今次又要麻煩你同我哋行一轉。」我跟大廈的保安說。
「又嚟？唔好喇……」她想拒絕，但看到張太凌厲的眼神，恍惚告訴她︰「唔好就Port死你。」所以她最後還是逼於現實、無奈答應。
再次來到門前，垃圾的臭味依然嗅不到，而且也感覺不到寒意。
按下門鈴，《歡樂頌》依舊響起，但門還是無人應，張太再次拿出後備門卡開門。
門一打開，單位光潔如新，之前的垃圾堆憑空消失，臭味變成香味，蟑螂、蒼蠅半隻也看不到，整個單位一塵不染，而麥先生也乾淨整潔，剛剛的垃圾堆床變了一張標準的雙人床，攬枕的影也看不到。
「咦？張太？乜咁錯盪啊？我啱啱執完屋去咗沖涼，今個月租金我一陣會畀到你，哩排出咗差都唔記得個戶口無錢過唔到數，唔好意思。」麥先生神態自若，剛剛的垃圾屋猶如幻覺。
「發生咩事？點解半個鐘唔夠就乜都無哂？」保安大惑不解，非常吃驚。
而張太也同樣不知所措，她一心上來想徹底解決問題，怎料問題竟然不翼而飛，令她一時之間失去了方向，答不上麥先生的話。
想當然，我也同樣被眼前景像所震驚，自言自語道︰「吓？點解會乜都無？明明啱啱我哋三個都見到唔係咁，無理由集體幻覺、記憶錯亂，中咗曼德拉效應㗎……」
而一旁的Kerry果然是經驗老到，看到此事依然臨危不亂，能打圓場之餘同時亦能仔細查看，尋找破綻︰「麥生，你好，我係Kerry，因為張太話你無交租又揾唔到人，所以想上嚟了解吓，無咩特別嘅，而家知係誤會一場就得。」
「不過，」他突然話鋒一轉，對著廳的牆角大喝，同時擲了一張卡片出去︰「喺間屋裡面嘅『住客』我唔可以坐視不理，始終佢哋會慢慢吸哂你啲陽氣，令你衰弱死亡。」
卡片不偏不倚正中「住客」的額頭，是「住客」哥哥，同時美麗的景象瞬間回復成為垃圾屋。眾人──包括我──都顯得非常吃驚，我們再次身處垃圾屋中間，被各個高低大小的垃圾堆圍繞著，剛剛看到的椅子、桌子、茶几等，全部都是垃圾堆，我暗自慶幸剛才沒有觸摸它們。
「你嘅『化妝』技術可能可以呃得到佢哋，但對我就完全無用，嗰陣獨有嘅死人除實在太攻鼻。」Kerry英氣的說，同時也掩著鼻。
「死人除？除咗垃圾味，我乜都聞唔到嘅。」我心裡想，看來這就是我們之間的實力差距。
與此同時，麥先生發出哀鳴，並且立刻跑到「住客」哥哥身邊，拔走卡片，痛哭流涕的說︰「阿哥，你唔好有事呀，Sita無咗你會唔掂㗎，振作啲呀……」
「無用㗎，我已經幫咗佢超渡，佢嚟緊會去投胎。佢哋只係普通遊魂野鬼，並唔係咩阿哥家姐，佢哋唔係你家人嚟，清醒啲喇。」Kerry語重心長的對麥先生說，但明顯他完全聽不進去。
「阿哥！」淒慘的叫聲由攬枕傳來，寄宿在內的「住客」痛失親人，悲痛萬分，命令道︰「Honey，幫我趕哂佢哋走！」麥先生聽到命令後便立刻行動，變得十分強硬，與剛才斯文的形像大相徑庭。
「睇嚟佢就係你口中所講嘅Sita，」Kerry面對暴怒的麥先生非但沒有膽怯，反而更進一步挑釁︰「從來都係得把聲唔敢露面，因為你根本唔係真嘅Sita，今日我幫你哋全部超渡，積返啲陰德。」語畢，瞬間再次擲出一張卡片，麥先生見狀，立刻以肉身阻擋，卡片亦被彈開。
「唔准你傷害佢！佢係我嘅Sita！」麥先生失去理智，衝向Kerry，把他撞跌在垃圾堆上，一股「我要打十個」的氣勢，葉問上身，不斷往Kerry的頭攻擊。我見勢色不對，正要衝上前捉住麥先生，下一秒他便被過肩摔放倒在地，昏過去了。
「唔通我空手道黑帶又要話畀你知咩？」Kerry神氣的對倒臥在垃圾堆的麥先生說，然後別過頭，矛頭直指罪魁禍首──攬枕上的「住客」、偽裝成Sita的鬼喝叱︰「你嘅傀儡已經暈咗，到你喇，現身喇！」語畢，兩張卡片又再往攬枕飛去。
「噠、噠」兩聲，正中紅心，但都不是攬枕，而是其他家具。
「阿爸、阿媽……」攬枕「住客」驚叫。
「頂，又有其他幫佢頂咗。不過唔緊要，反正全部都要收，仲淨低九個。」Kerry再拿出四張卡片，分別向四堆垃圾擲去。
「噠、噠、噠、噠」四聲清脆的聲音，宣告著多四個「住客」被超渡，攬枕「住客」泣不成聲，只能眼白白的看著她的家人被超渡。
此時，除了攬枕「住客」外，餘下的「住客」不再坐以待斃，決定主動出擊，用數量優勢襲向Kerry，可是經驗老到的Kerry，以簡單的步法，像跳舞般巧妙的避開所有攻擊，並每個都附加一張卡片，成功超渡。
終於，只餘下攬枕「住客」Sita。她眼見其他十一位家人被瞬間超渡，自己也覺得毫無勝算，但又不想輕易就範，所以決定放手一搏，上了昏迷的麥先生身。
「點解你仲係要咁執迷不悟呢？」Kerry慨嘆。
「住客」Sita沒有理會，向Kerry衝過來就是一拳，然而Kerry俯身躲開，右手拿著卡片一下拍在麥先生額頭，「住客」Sita頓時彈出來，元氣大傷，無力的跪在地上。Kerry行前，正要給予最後一擊之際，麥先生醒了，抱著Kerry的腳，大聲對「住客」Sita說︰「老婆你快啲走，我拖住佢，快啲！」
「住客」Sita本身想趁勢溜走，但看到麥先生因為Kerry的掙脫動作而被甩到牆上時，立即改變主意，飛過去摟著愛郎，細心呵護著他，並泣不成聲的說︰「係咪我跟你走，你就唔再傷害佢？」
「我從來都無打算傷害佢，我只係幫佢清醒返，傷害佢嘅人係你哋班『住客』！」Kerry義正詞嚴的答道。
「唔……唔好跟佢走，我哋咁難得先可以喺埋一齊，以前我哋因為身份問題唔可以一齊，點解而家等到佢死咗，我都唔可以自由咁同佢係埋一齊？」麥先生也痛哭流涕。
「就係因為人鬼殊途，咁樣一齊唔會有好結果！」Kerry不知為何如此狠心，跟往常的他有很大分別。
「條命係我嘅，我鍾意點就點，你哩啲外人憑咩幫我決定？」麥先生繼續駁斥。
「你仲係咁執迷不悟，如果真係愛佢嘅，你應該放手畀佢投胎，你而家係令佢永不超生！」Kerry也毫不退讓。
「夠喇！」插入對話的是張太，她早已感動落淚，她哭著說︰「佢哋都係苦命鴛鴦，你聽完佢哋嘅故事，睇埋佢哋而家嘅互相犧牲，唔通仲有假？唔通唔感動？我哋成全佢哋喇，畀佢哋繼續生活落去，唔好拆散佢哋 。」
但Kerry依然堅持︰「雖然你咁講，但咁係害緊佢哋，唔係幫緊佢哋。就算個故仔再淒美、再動人，唔啱就係唔啱，終究佢會後悔。」
「間屋係我嘅，我先係業主，我鍾意點就點，我而家話唔駛你幫手，唔該你走！」張太霸氣道，而身後的麥先生亦在「住客」Sita的攙扶下倚牆勉強站起來。
「就算間屋變凶宅都一樣無問題？」Kerry問。
「係，無問題，唔該你而家即刻離開。」張太斬釘截鐵道。
聽到張太如此堅持，Kerry也只好收手離開，而我也在跟張太道別後便跟著離開。
那天之後，我再也沒有看過張太的Whatsapp上線，她並沒有封鎖我，致電也只換來一句「你所打嘅電話號碼暫時未能接通，請遲啲再打過……」，無人知當天我們離開後發生了什麼事，不知是轉了電話號碼，還是出了什麼事，雖然我有想過去拜訪查證，不過最後也作罷。至於Kerry當天為何如此反常，原來是因為他的一段往事，他之前有一位好朋友，正正就是因為人鬼戀而離世，至於故事我就不便多說了。