撞鬼咩地產Agent(實體書已經出版): 新樓開賣，要入飛嗎？
新樓開賣，要入飛嗎？
「今個星期六有個新盤開示位，係你哋入職以嚟第一個，雖然唔係我哋主區盤，但始終係一個世界盤，所以都想你哋出去企吓感受吓，我哋唔同啲樓花Team次次企，但哩啲世界盤都可以企吓試吓。」經理Kerry跟大伙喊話。
「知道。」眾人回應。
「今次我對大家要求唔係好高，每人撈到一枱就夠，雖然未做過，不過我相信你哋可以做到，始終你哋質地唔差。Chris，你作為大師兄之前有經驗成功撈到過，一單就落袋十幾萬，大家有咩唔明可以問我或者問佢都得。」Kerry繼續對大家大派定心丸。
「嘩！乜大師兄你咁勁，要跟你學吓嘢先得喇。」Alex率先發言，Chris聽著很自滿，完全聽不出說話背後的意思，還是特意忽略了背後的意思呢？
「一單落袋十幾萬，正喎，我都想，咁就可以一次過買返隻AP戴。」我心裡下定決心，要跟他們倆都討教，畢竟有成功經驗定必有可學習之處。
「大家要幾多張價單、攻略圖同對數表？我諗住Print定，星期六撈客用。」Chris問眾人，但大家也沒有頭緒。
Kerry眼見大家不知所措，便代為答話︰「每人兩份喇，唔夠之後再印。」Chris收到指示後，便立即去辦，很快眾人的手上便多了一疊撈客工具。
「仲有一樣嘢好重要要提大家，因為除咗Chris之外大家都未有牌，所以到時要醒目啲，小心EAA啲人捉，到時我會再詳細講。而家大家睇熟份攻略圖先，起碼到時有人問都知有咩貨同咩價，一陣再教大家計數。」Kerry說完後便離開了。
此時，我捉了Chris坐在一旁，認真的問他撈客技巧和細節，而他也毫無保留的傾囊相授，畢竟難得有他能表現的機會，這對平時常被輕視的他來說是絕對難得的機會。
「Charles，仲有一樣嘢一定要提醒你，到時撈客見到啲著背心外套、背脊大大隻字寫住EAA嘅人就要醒水收埋啲嘢行開坐坐，佢哋專捉無牌嘅人。」Chris温馨提示，我隨便的點點頭應付了他。
「另外，」Chris煞有介事的輕聲說︰「我知你見到『住客』，考吓你，你知唔知點解發展商會畀我哋Agent優先去睇示位同地盤？」我被他這突如其來的一問考倒了，一時半會想不出答案。
「都係同啲鬼有關？」我由他的問題嘗試推理答案。
「係有咩關呢？」Chris再問，而我真的想不到，只好低頭向他再請教。
「示位係將個樓盤嘅賣點整出嚟Show畀人睇方便賣樓，但整個示位咁大工程，要用咁大空間，而哩個Area絕對唔係話有就有，換言之即係哩個Area本身係長期丟空For整示位用，長期丟空的話你覺得會有咩問題？」Chris繼續用半解釋半啟發的大師兄腔來教導我。
「你意思係會有污糟嘢？」我絕對不是愚笨蠢鈍的人，Chris的意思我絕對明白，但還是將信將疑。
「Bingo，所以先要畀我哋Agent優先睇，順手清埋啲『住客』。」Chris顯得非常滿意，就像我是他親手培育的一樣，續說︰「遲啲棟樓起好之後會有啲單位現樓發售，又會先畀我哋Agent參觀咗先，之後再畀客參觀，你知唔知點解？」
我稍為想了想，始終想不到原因︰「唔知喎真係，斷估你唔會想我答『因為要我哋愛上先賣到』哩啲咁行嘅答案啩，但新樓係最乾淨，點會有鬼呀？」
Chris左面嘴角微微上揚，露出有點陰險又沾沾自喜的笑容，然後告訴我答案︰「雖然新樓理應最乾淨，因為照理未入伙係唔會有人上到去跳樓燒炭自殺，但事實真係咁咩？」他頓了頓，像是想我回話，但我並無此打算，於是他無奈繼續說︰「新樓的確係未有住客自殺，但地盤工業意外呢？又或者塊地本身已經有人枉死過呢？特別係後者，哩啲真係無人知，所以要我哋Agent去望一望，清潔清潔，以免以後嚇親啲買家。」聽後我恍然大悟，我承認我忽略了這些原因，亦更清楚知道發展商做的任何事背後的真正意義，大機構果然每一著也暗藏玄機。
跟大師兄學習過後，我便埋頭苦幹去研究攻略圖，但除了價錢跟戶型外，其他我都一竅不通︰付款辦法有這麼多，哪個才是真？關鍵日期又是什麼？「一柱」是什麼意思？要計什麼數？這些問題一直纏擾著我，大概要到經理Kerry再次回來後才得到答案。
不一會，Kerry低著頭按著電話回來，站在眾人面前說︰「我哋晏啲去Preview，半個鐘之後出發，而家教你哋點計數先，一人拎張紙坐低。」隨後他用了其中一個單位作例子，教會了我們計數︰「大家重點記住，Down返我哋公司個App，照㩒就會幫你計埋幾錢先過壓測，好方便，同埋啲日子要好清楚，臨約後幾多日正約，訂要畀幾多，稅要畀幾多同幾時畀哩啲。無問題的話，記得拎埋頸繩同卡片，我哋而家出發去Preview。」
「啊，之前同你哋提過，我哋Team仲有兩位師兄，做咗好耐好熟，有咩都可以揾佢哋幫手，」此時鋪外出現了兩人的身影，一個比較樸實，另一個比較花俏，Kerry續說︰「阿Tom同Simon，你哋可以揾佢哋合作多啲，學多啲唔同嘢，而家真係出發，遲到。」說畢，大伙便魚貫走出鋪，分別乘上由Alex和Simon駕的車出發到荃灣。
「而家係發展商畀我哋公司嘅專屬時段，係咁多間地產裡面嚟講嘅第一間睇，一陣可以影定啲相同拍定啲片，放上網吸客同遲啲Send畀客。」Kerry在示範單位入口跟大伙說完，便帶領我們進場。這是我首次參觀示範單位，接著下來兩天，我便要做未入行前最不想做的工作──撈客。
入場先看一段發展商準備的樓盤介紹宣傳片，然後順著指示前行，會看到電梯大堂的標準、樓盤特色的介紹、數個不同的戶型展示，有已裝修，亦有無改動的交樓標準、會所的特色設施、最後是大樓模型。
這一路走來，沒有看到什麼異樣，整個場地除了是人，都還是人，並沒有之前大師兄所說的「住客」，是因為人太多所以躲了起來，還是已經被清除了，抑或是根本不存在呢？我狐疑的朝Chris看去，他當下也立即意會到我的疑問，於是招了我過去。
「Charles，啱啱你有無留意到一房有裝修嗰度有兩個人企咗喺露台？」Chris問道，我搖搖頭表示沒有留意，於是他繼續說下去︰「啱啱佢哋喺度講緊數，你無留意無人行過去咩？」我繼續搖頭，於是他便帶我到該單位解說。
他看了看單位之後直接問︰「你覺得哩個單位同其他單位有咩分別？」
「有咩分別？無咩特別啊，裝修咗靚啲囉。」我認真的答。
「嗯……睇嚟你都仲要啲時間鍛鍊，唔好用眼睇，而係用感覺去睇。」Chris試圖指導我。
「感覺？好虛無喎，有啲難。」我盡力嘗試，但始終沒有什麼特別感覺。
「咁你見唔見到露台角落頭嗰個耷低頭企喺度嘅女人？」Chris再問。
「見到。」我簡短的回答。
「佢唔係人，係『住客』，你睇下佢腳踭唔到地，不過應該啱啱傾掂數，所以就仲喺度無收佢。」Chris說完後我特別留意腳根，果然不到地。
這更讓我疑惑了，之前他不是說所有「住客」都是不懷好意的，怎麼這次看到又不收服呢？當我想問時，他搶先開口。
「既然個師兄見到都無收，咁我哋都唔好多管閒事，不過唔知其他公司會唔會唔收佢。題外話，講多少少畀你知，我哋幾間公司收『住客』嘅方法都唔同。我哋紅色就用傳統中國道家，即係林正英嗰啲，符呀、童子尿呀、黑狗血呀咁；黃色就用西方方法，聖經聖水嗰啲；藍色就用佛教方法，唸經佛珠嗰啲；綠色就用泰國方法，養鬼仔佛牌嗰啲，鬼打鬼；其他細行就古靈精怪，各適其適乜都有。亦都因為方法各異，大家對『住客』嘅態度都唔一樣，所以唔知之後其他行家會點處理。」Chris一次過向我解釋，但我不打算認真記在心。
看完示範單位後，我們一行人再乘車到大圍的施工地盤實地考察，大概了解了位置、地形之類，眾人也沒有發現什麼異樣，只是對附近景觀有意見，看著攻略圖研究不同單位應怎樣銷售，唯獨Kerry說了一句當時令人不以為然的說話︰「哩個地盤希望順利。」而在大半年後，這地盤的第三期的確出現了沉降問題，幸好未有人命傷亡，但要整幢拆卸重建，但都已經是後話。
在看完示位跟地盤後，我們便收拾心情，準備一連兩日的撈客。而撈客期間並沒有什麼特別事情發生，最後大部份人也撈到最少一枱客，雖然無入飛，但總算達成Kerry的目標。